Cuntegn da la pagina

La lescha da lavur

 
La lescha federala davart la lavur en l'industria, en il mastergn ed en il commerzi (lescha da lavur, LL) cuntegna las prescripziuns davart la protecziun da la sanadad en il manaschi e davart l'approvaziun dals plans 
 

La lescha da lavur (LL)

 

La lescha da lavur ha la finamira da proteger las lavurantas ed ils lavurants cunter disturbis da la sanadad ch'èn colliads cun la plazza da lavur. D'ina vart cuntegna ella prescripziuns davart la protecziun generala da la sanadad, da l'autra vart prescripziuns davart ils temps da lavur e da paus. Questas ultimas prescripziuns duain proteger las lavurantas ed ils lavurants – per motivs da la sanadad – cunter temps da lavur memia lungs u autramain difficultus.

La lescha da lavur ha in vast champ d'applicaziun. Exceptads da quai èn tranter auter ils manaschis agriculs, ils manaschis dal traffic public e las chasadas privatas. Per las administraziuns publicas vala la lescha da lavur concernent la protecziun generala da la sanadad, dentant betg concernent ils temps da lavur e da paus.

Las disposiziuns detagliadas da la lescha da lavur èn cuntegnidas en las suandantas ordinaziuns: 
 

 

L'ordinaziun 1 (OLL 1)

regla la part generala da la LL, en spezial il temp da lavur e da paus, la controlla medicinala en cas da lavur da notg sco er la protecziun speziala per dunnas.
 
 
Ordinaziun dal DFE (CS 822.111.52)
davart las lavurs privlusas e difficilas en cas da gravidanza e da maternitad (ordinaziun davart la protecziun da la maternitad).
 

L'ordinaziun 2 (OLL 2)

regla las disposiziuns spezialas per tschertas gruppas da manaschis ubain per tschertas lavurantas e per tscherts lavurants. 
 
Mussavia tar las ordinaziuns 1 e 2 (per ils artitgels)
 

L'ordinaziun 3 (OLL 3)

regla las mesiras per la prevenziun da la sanadad che ston vegnir prendidas en tut ils manaschis ch'èn suttamess a la LL.
 

L'ordinaziun 4 (OLL 4)

regla las pretensiuns spezialas per la construcziun e per l'endrizzament da manaschis ch'èn suttamess a l'obligaziun d'approvaziun dals plans.
 

Mussavia tar las ordinaziuns 3 e 4 (per ils artitgels)
 

Ordinaziun 5 (OLL 5)

numnada er ordinaziun davart la protecziun da las lavurantas giuvnas e dals lavurants giuvens. Regla la protecziun da las lavurantas giuvnas e dals lavurants giuvens a la lavur.
 
Ordinaziun dal DFE (CS 822.115.2)
davart lavurs privlusas per giuvenils. 
 
Ordinaziun dal DFE (CS 822.115.4)
davart las excepziuns dal scumond da lavur da notg e da dumengia durant la furmaziun fundamentala professiunala.