Cuntegn da la pagina

Lescha davart l’assicuranza d’accidents

la lescha federala davart l'assicuranza d'accidents (LAA) cuntegna las prescripziuns davart la segirezza a la plazza da lavur (prevenziun d'accidents da lavur e da malsognas da lavur).
 

La lescha davart l'assicuranza d'accidents (LAA)

 
Las prescripziuns da la LAA davart la segirezza a la plazza da lavur che valan per tut ils manaschis sco er per tut las lavurantas e per tut ils lavurants sa chattan en la

ordinaziun davart la prevenziun d'accidents da lavur e da malsognas da lavur (OPA)

La OPA regla las pretensiuns da segirezza per edifizis e per autras construcziuns, per indrizs e per apparats tecnics, per l'ambient e per l'organisaziun da lavur. L'applicaziun da las prescripziuns en ils manaschis vegn, tut tenor la cumpetenza, survegliada da l'inspecturat da lavur u da la SUVA. 
 

Directiva da la MSSL da la cumissiun federala da coordinaziun per la segirezza a la plazza da lavur (CFSL)

 

Questa directiva concretisescha l'obligaziun da las patrunas e dals patruns da consultar spezialistas e spezialists da la segirezza a la plazza da lavur (MSSL) tenor l'artitgel 11a alineas 1 e 2 OPA e las mesiras per promover la prevenziun d'accidents da lavur e da malsognas da lavur ch'è orientada al sistem (segirezza a la plazza da lavur) sco er la protecziun da la sanadad.

La segirezza basegna in recept

La MSSL cumpiglia las pretensiuns las pli impurtantas sin il champ da la segirezza a la plazza da lavur e da la protecziun da la sanadad ad in bun sistem da segirezza. Per la patruna e per il patrun è quest sistem in instrument pratic che gida a surpigliar responsabladad e che gida a meglierar cuntinuadamain la segirezza e la sanadad en l'interpresa. La realisaziun succeda en trais pass:

  • determinaziun sistematica dals privels en il manaschi
  • installaziun d'in sistem da segirezza che resguarda ils privels determinads sco er
  • realisaziun consequenta da las mesiras da protecziun

Per questas incumbensas dovri per ordinari enconuschientschas spezialas. Sch'il manaschi sez n'ha betg las enconuschientschas e las experientschas necessarias, ston vegnir consultads spezialistas e spezialists.

Co procedis Vus il meglier?

Per realisar la MSSL As stattan a disposiziun differentas vias:

  • Soluziun da branscha:
    Las "soluziuns da branscha" mettan a disposiziun a l'interpresa in sistem da segirezza specific per la branscha (manual) e glistas da controlla. Ellas porschan er scolaziuns ed autras prestaziuns da servetsch. Ellas ston dentant vegnir concretisadas e realisadas en mintga singula interpresa.
  • Soluziun da model:
    Qua surpiglia l'interpresa d'ina firma da cussegliaziun in sistem da segirezza u da garanzia da qualitad, en il qual èn integrads ils aspects per la segirezza a la plazza da lavur ed ils aspects per la protecziun da la sanadad.
  • Soluziun da gruppas da manaschi:
    Questa furma è adattada cunzunt per interpresas grondas cun filialas en differents lieus u per interpresas che vulan manar communablamain in post local per la segirezza a la plazza da lavur e per la protecziun da la sanadad.
  • Soluziun individuala:
    Las interpresas pon er sviluppar in sistem da segirezza individual che s'orientescha als basegns specifics dal manaschi. Quai premetta che l'interpresa consulteschia spezialistas e spezialists externs per la segirezza a la plazza da lavur u ch'ella acquistia sezza las enconuschientschas necessarias.

Explicaziuns ed ulteriuras infurmaziuns

L'inspecturat chantunal da lavur e la SUVA controllan e cusseglian ils manaschis e porschan a tut las persunas interessadas meds auxiliars per realisar las pretensiuns tenor MSSL (p.ex. glistas da controlla per eruir ils privels e per planisar mesiras).

Ulteriuras infurmaziuns ed ina glista da las spezialistas e dals spezialists renconuschids per la segirezza a la plazza da lavur chattais Vus sut www.asa-inside.ch.