Tge è Cumpass?

Cumpass è in instrument da lavur. Cumpass sustegna persunas spezialisadas e persunas da referiment, sch'i sa tracta da constatar a temp svilups disfavuraivels e periclitaziuns dal bainstar d'uffants, da valitar sezzas tals e d'agir commensuradamain. Cumpass duai dar curaschi da sa fidar da l'atgna intuiziun e da restar attent.

Co funcziuna Cumpass?

Il manual maina tras la valitaziun. Il punct central è in schema d'agir structurà. Cun in sistem d'ampla gida il schema d'agir a valitar in svilup disfavuraivel u ina periclitaziun dal bainstar d'in uffant e preschenta mesiras adattadas.

En il schurnal vegnan documentadas infurmaziuns, observaziuns e percepziuns. En la protecziun d'uffants è la documentaziun fitg impurtanta per proteger ils uffants e giuvenils, per garantir la qualitad da la lavur e per segirar giuridicamain tut las persunas participadas.

Ultra da quai stattan a disposiziun ulteriurs instruments da lavur, sco models, propostas per discurs cun geniturs u cun uffants e giuvenils sco er infurmaziuns supplementaras per champs professiunals. Quests instruments da lavur gidan ad agir en moda professiunala, sistematica e reflectada. 

A tgi sa drizza Cumpass?

Cumpass sa drizza a persunas spezialisadas che han tras lur professiun contact cun uffants e giuvenils: persunas che pratitgeschan professiuns pedagogicas u pedagogic-socialas sco er persunas ch'èn activas en la tgira, en la promoziun ed en il sustegn d'uffants e da giuvenils. Latiers tutgan tranter auter:

• educaturas ed educaturs en canortas d'uffants pitschens, en chasas d'uffants e da giuvenils u en structuras dal di
• persunas d'instrucziun dals differents tips da scola e da la pedagogia curativa, mainascolas
• lavureras e lavurers socials en la lavur sociala da scola, en la cussegliaziun per dumondas da dependenza u en l'agid da migraziun e da fugitivs
• persunas ch'èn activas en la lavur averta d'uffants e da giuvenils, en la lavur da project u da prevenziun
• cussegliadras e cussegliaders da geniturs e.u.v.

Cumpass sa drizza ad ulteriuras persunas da referiment d'uffants e da giuvenils. Talas persunas da referiment pon vegnir da differents champs da la vita. Latiers tutgan tranter auter:

• trenadras e trenaders en uniuns da sport e da temp liber
• magistras e magisters da musica
• manadras e manaders da gruppas da giuvenils en champs da vacanzas
• vischinas e vischins

Las persunas da quests secturs da la vita han ina rolla impurtanta per la protecziun d'uffants. Ultra da la famiglia han ellas in stretg contact cun ils uffants e giuvenils. Perquai èsi impurtant, che persunas da referiment daventan activas, sch'ellas constateschan segns per in svilup disfavuraivel u ina periclitaziun dal bainstar d'in uffant.

Co sa differenziescha la Cussegliaziun spezialisada per la protecziun d'uffants cun Cumpass da la cussegliaziun anonima da la APUC?

L'Autoritad per la protecziun d'uffants e da creschids (APUC) porscha cussegliaziuns anonimas d'in cas. Savens vegni fatg diever da questa purschida, sch'igl exista gia in suspect concret d'ina periclitaziun dal bainstar d'in uffant. La APUC porscha ina valitaziun objectiva da la situaziun, infurmescha davart las basas legalas e sustegna la planisaziun e la realisaziun da mesiras en cas d'ina eventuala periclitaziun.

En cumbinaziun cun Cumpass intervegn la Cussegliaziun spezialisada per la protecziun d'uffants pli baud e cumplettescha il concept da la APUC. Ella sa drizza a persunas spezialisadas ed a persunas da referiment ch'èn malsegiras, co ch'ellas duain giuditgar ina tscherta situaziun, er sch'i n'exista anc betg in suspect concret d'ina periclitaziun. Cun Cumpass èsi er pussaivel da far sez ina valitaziun.

Co sa differenziescha la Cussegliaziun spezialisada per la protecziun d'uffants dal Standard grischun?

Il Standard grischun è in instrument cumplessiv e pratic che sa basa sin 10 elements centrals per la prevenziun, la registraziun structurada e l'elavuraziun professiunala da violaziuns da cunfins en il context d'ina organisaziun. Sia finamira surordinada è la protecziun da l'integritad da tut las persunas d'ina organisaziun. Il Standard grischun premetta, che l'instrument saja introducì en l'organisaziun. El vegn applitgà, cura ch'igl exista in eveniment concret. Ultra d'uffants e da giuvenils sa drizza il Standard grischun a differentas autras gruppas da persunas.

Cun Cumpass metta la Cussegliaziun spezialisada per la protecziun d'uffants ses focus sin svilups disfavuraivels u periclitaziuns dal bainstar d'uffants, er sch'i existan mo indizis intscherts, in nausch sentiment u irritaziuns. El sustegna las singulas persunas spezialisadas u persunas da referiment, independentamain da lur context organisatoric.