Program da barat durant la scolaziun: «learningbygoing»

I dat fitg bleras pussaivladads per in barat e per mobilitad durant la scolaziun: da la scola primara fin al studi.
Novs inputs enritgeschan ed inspiran noss sistem da furmaziun. Quai garantescha la qualitad da la furmaziun e sviluppa vinavant quella.

Cun la campagna «learningbygoing» vegnan barat e mobilitad promovids e sustegnids en Svizra ed a l'exteriur, durant la scolaziun e durant la furmaziun supplementara, entaifer ed ordaifer la scola.
La visiun: Durant lur scolaziun sa participeschan tut ils giuvenils ad in barat.

Per tgi è «learningbygoing»?

- Per giuvenils e per persunas giuvnas creschidas: Ellas ed els survegnan la pussaivladad da far in barat: en la regiun, en Svizra, en Europa, sin il mund. Da paucs dis fin in onn en differents formats: barats da classas, barats durant las vacanzas u barats singuls durant il temp da scola.

- Per persunas d'instrucziun sco er per instructuras ed instructurs: en il senn d'ina furmaziun supplementara u er d'ina ospitaziun en in'autra instituziun da furmaziun. Ultra da quai po er vegnir organisà il barat d'ina entira classa u gruppa.

Davart la campagna «learningbygoing»

«learningbygoing» è in program da la «Movetia» – l'agentura naziunala per il barat e per la mobilitad.