Zum Seiteninhalt

Coaching e management da cas furmaziun professiunala

Coaching


Il coaching tras la furmaziun professiunala sa drizza a giuvenils a partir dal 2. semester da la 2. classa dal stgalim superiur fin a la finiziun dal temp da scola obligatoric, che
• dovran sustegn supplementar tar la tschertga d'ina soluziun da cuntinuaziun suenter il stgalim superiur.

Noss coaches
• sustegnan giuvenils tar la tscherna da professiun e tar la tschertga d'ina soluziun da cuntinuaziun;
• gidan per exempel a tschertgar in fufragnadi u ina plazza d'emprendissadi ubain a far in dossier d'annunzia;
• stattan en contact cun scolas, cun posts spezialisads e cun manaschis d'emprendissadi. 

Geniturs, persunas d'instrucziun dal stgalim superiur u ulteriurs posts participads pon fixar termins per ils giuvenils tar la cussegliaziun professiunala cumpetenta. L'annunzia per in coaching vegn fatga exclusivamain da la cussegliadra u dal cussegliader da professiun. 

Management da cas furmaziun professiunala

Incumbensas ed activitads  

La purschida sa drizza a giuvenils ed a persunas giuvnas creschidas tranter 16 e 25 onns, che abitan en il chantun Grischun e che n'han nagina soluziun da cuntinuaziun 
• suenter la finiziun da la scola obligatorica,
• suenter ina soluziun transitorica,
• suenter avair interrut l'emprendissadi

 

Tgi annunzia ils giuvenils tar il «management da cas furmaziun professiunala»?

1. Annunzia da la scola populara: Giuvenils che han terminà la scola senza soluziun da cuntinuaziun suenter la scola obligatorica vegnan registrads tras ina enquista a la fin dal temp da scola obligatoric e vegnan annunziads da la persuna d'instrucziun da classa.

2. Annunzia da la soluziun transitorica: Giuvenils senza soluziun da cuntinuaziun suenter ina soluziun transitorica (incl. program da giuventetgna Funtauna) u giuvenils che han interrut la soluziun transitorica vegnan annunziads da las persunas responsablas da la soluziun transitorica.

3. Annunzia en cas d'interrupziuns da l'emprendissadi: Persunas che interrumpan l'emprendissadi e che n'han betg in nov contract d'emprendissadi vegnan annunziads da la surveglianza da la furmaziun professiunala.

 

Co vegnan accumpagnads ils giuvenils?

Durant il process d'accumpagnament vegnan elavuradas mesiras coordinadas individualmain che duain manar ad ina terminaziun d'ina scolaziun postobligatorica. Communablamain cun ils giuvenils pertutgads vegn la situaziun registrada sistematicamain ed en tut ils secturs da la vita. Fermezzas e deblezzas, pussaivladads e problems vegnan scuvrids cuminaivlamain e furman la basa per l'ulteriur proceder.

Plinavant vegnan sviluppadas cuminaivlamain ulteriuras finamiras, messas prioritads e definidas pussaivladads d'agir. Per mintga singul cas vegnan planisadas mesiras individualas e consultads ils posts correspundents.

Las mesiras s'orienteschan a las resursas ed a las finamiras da las persunas pertutgadas.

Pertutgtant il cuntegn e pertutgtant il temp vegn il process d'accumpagnament coordinà dal «management da cas furmaziun professiunala».

Ils giuvenils e las persunas giuvnas creschidas duain survegnir uschè svelt sco pussaivel la pussaivladad d'agir en moda autodeterminada ed independenta. Per ils giuvenils participads al project «Management da cas furmaziun professiunala» vala il princip agid per gidar sasez!