Cuntegn da la pagina

Artistas ed artists

Agid d'urgenza per artistas ed artists

Sco artista u artist, per la quala u il qual èn applitgablas las mesiras cumplementaras per il sectur da la cultura, pudais Vus dumandar fin il pli tard ils 20 da settember 2020 tar l'associaziun Suisseculture Sociale agid d'urgenza per cuvrir Voss custs da viver directs. L'agid d'urgenza importa maximalmain 196 francs per di e na sto betg vegnir restituì. Infurmaziuns latiers ed ils formulars chattais Vus qua: http://www.suisseculturesociale.ch/index.php?id=153


Indemnisaziun en cas da perditas da gudogn per persunas cun activitad da gudogn independenta

Per Vossas perditas da gudogn pudais Vus – sin basa da l'Urden da cumpensaziun dal gudogn (UCG; cumpensaziun dal gudogn en cas da servetsch e da maternitad) – dumandar ina indemnisaziun tar la cassa da cumpensaziun da la AVS da Voss chantun da domicil: https://www.sva.gr.ch/


Indemnisaziun da la perdita per artistas ed artists

Las artistas ed ils artists duain pudair survegnir en il chantun da domicil sin dumonda ina indemnisaziun per il donn finanzial che resulta en spezial pervia da l'annullaziun u dal spustament d'occurrenzas e da projects resp. pervia da serradas da manaschis. L'indemnisaziun da questas perditas cuvra maximalmain 80 pertschient dal donn finanzial. La Confederaziun surpiglia la mesadad dals custs ch'il chantun conceda. Cumpetenta per exequir l'indemnisaziun da la perdita per artistas ed artists è la Promoziun chantunala da la cultura.

Las indemnisaziuns da la perdita tenor l'Ordinaziun davart COVID-19 cultura èn subsidiaras envers autras pretensiuns da las artistas e dals artists. Ellas cuvran pia ils donns che n'èn betg cuvrids autramain (p.ex. tras in'assicuranza privata e tras assicuranzas socialas).
L'indemnisaziun da la perdita cuvra quels donns ch'èn resultads tranter ils 28 da favrer 2020 ed ils 20 da settember 2020. Far valair pon ins er ils donns per occurrenzas ch'èn vegnidas annulladas tranter ils 28 da favrer 2020 ed ils 20 da settember 2020, che avessan dentant gì lieu avant ils 31 d'october 2020.

Infurmaziuns detagliadas pon vegnir consultadas en l'Ordinaziun davart COVID-19 cultura ed en las explicaziuns correspundentas.

Questas dumondas ston vegnir inoltradas fin il plii tard ils 20 da settember 2020 per e-mail (corona@afk.gr.ch) u per posta (Promoziun da la cultura dal Grischun, Loëstrasse 26, 7000 Cuira).