Zum Seiteninhalt

Logo Lehrplan 21

Link Plan d'instrucziun 21 GR

Realisaziun 2016-2021

FAQ

FSI individualisaziun sec I

Manual Medias ed Informatica

Manual dal stgalim secundar I

Rendaquint custs da substituziun scolaziun supplementara

Durant la fasa da realisaziun da 6 onns 2016-2021 maina l'uffizi per la scola populara ed il sport (USS) l'implementaziun dal Plan d'instrucziun 21 GR cun agid da la scola auta da pedagogia dal Grischun. Ina gruppa da resonanza che consista dals partenaris socials da scola ils pli impurtants (Magistraglia Grischun LEGR, associaziun dals cussegls da scola dal Grischun ACSG, federaziun da mainascolas dal Grischun FMSGR, conferenza da las instituziuns d'uffants e da giuvenils IUG) sustegna la realisaziun.

Per ch'il process da realisaziun gartegia optimalmain, sustegna il USS las scolas cun mesiras da realisaziun chantunalas. Quellas cumpiglian occurrenzas d'infurmaziun, cussegliaziuns per las direcziuns da scola sco er furmaziuns supplementaras obligatoricas per las persunas d'instrucziun e sa repartan sin 6 onns (2016-2021). Cun quest proceder èsi garantì che tut las scolas dal Grischun realiseschan cumplainamain il plan d'instrucziun en lur classas a partir da l'onn da scola 2021/22.

La fasa da realisaziun dal Plan d'instrucziun 21 GR ha cumenzà l'atun 2016 cun occurrenzas d'infurmaziun per ils presidis dals cussegls da scola, per las direcziuns da scola e per las persunas d'instrucziun.

L'onn 2017 vegnan manadas tras las emprimas furmaziuns supplementaras obligatoricas tar il Plan d'instrucziun 21 GR. Gia il favrer ed il mars han las mainascolas ed ils mainascolas da las scolas regularas e da las scolas spezialas frequentà ina furmaziun supplementara obligatorica. La primavaira han ils emprims teams da chasas da scola cumenzà cun la furmaziun supplementara entaifer la scola "Instruir ed emprender a moda orientada a las cumpetenzas". In pèr paucs curs obligatorics da furmaziun supplementara da la didactica dal rom porscha la SAPGR gia questa stad, la fin da l'onn vegn lantschada la scolaziun supplementara obligatorica "Etica, religiuns, cuminanza".

Ulteriuras infurmaziuns davart la realisaziun en il chantun Grischun sa chattan en il Rapport tar la realisaziun dal Plan d'instrucziun 21 GR.

Avais Vus dumondas pertutgant la realisaziun? Qua chattais Vus respostas a dumondas frequentas. Quellas vegnan actualisadas permanentamain.