Zum Seiteninhalt

Basas

 

Ils 15 da mars 2016 ha la regenza grischuna approvà il Plan d'instrucziun 21 GR inclusiv tavlas da lecziuns. Quel vegn mess en vigur per la scolina fin a la 2. classa dal stgalim secundar I sin l'onn da scola 2018/19 e per la 3. classa dal stgalim secundar I sin l'onn da scola 2019/20.

Il Plan d'instrucziun 21 deliberà l'october 2014 da la conferenza dals directurs chantunals da l'educaziun publica da la Svizra tudestga vegn surpiglià en moda cumplessiva dal chantun. Adattaziuns chantunalas dal model interchantunal sa restrenschan a cuntegns nunliants sco er ad adattaziuns da las cundiziuns generalas chantunalas. Il Plan d'instrucziun 21 GR po vegnir consultà online sut www.lehrplan.ch.

Cun excepziun dals plans d'instrucziun davart il rumantsch e davart il talian sco lingua da scola èn tut ils plans d'instrucziun actualmain avant maun pir en lingua tudestga. Il Plan d'instrucziun 21 GR vegn translatà integralmain en talian. Il plan d'instrucziun Deutsch an romanischsprachigen Schulen resta tudestg. Ils plans d'instrucziun "rumantsch sco lingua da scola", "natira, uman e societad", "art applitgà", "moviment e sport", "chant e musica" sco er il plan d'instrucziun dal modul orientaziun professiunala stattan a disposiziun er en il 3. ciclus en rumantsch. Igl è previs per l'onn da scola 2017/18 da metter las parts translatadas dal Plan d'instrucziun sin la pagina d'internet..

Il conclus da la regenza sa basa sin in rapport davart la realisaziun dal Plan d'instrucziun 21 GR. A chaschun da dus hearings è quel vegnì preschentà il schaner 2016 a la scola auta da pedagogia dal Grischun (SAPGR ), a las instituziuns da la scolaziun speziala sco er a las federaziuns ed associaziuns las pli impurtantas en connex cun la scola (Magistraglia Grischun LEGR, associaziun dals cussegls da scola dal Grischun ACSG, federaziun da mainascolas dal Grischun FMSGR, conferenza da las instituziuns d'uffants e da giuvenils IUG) e repassà sin basa da lur resuns. Il rapport mussa cun tge mesiras che las scolas vegnan preparadas per il nov plan d'instrucziun, preschenta il basegn d'agir tar ils meds d'instrucziun e tar ils attestats, infurmescha davart ils custs da la realisaziun e cuntegna las differentas tavlas da lecziuns da las trais regiuns linguisticas. A partir da mez avrigl vegn quel ad esser avant maun en tut las trais linguas chantunalas.

Il zercladur 2016 ha il cussegl grond deliberà il credit d'impegn per realisar il nov Plan d'instrucziun 21 GR.