Zum Seiteninhalt

Terms impurtants

 Occurrenzas dal USS, per part en cooperaziun cun la SAPGR

 -

Primavaira 2019: Furmaziun supplementara obligatorica "Didactica ed organisaziun 3. classas sec I"

A partir dal mars 2019 vegn manada tras la furmaziun supplementara obligatorica "Didactica ed organisaziun 3. classas sec I". La furmaziun supplementara porscha savida fundada davart temas, concepts e noziuns centralas da las "structuras da temp per l'individualisaziun". La furmaziun supplementara duai cun exempels ed ideas ord la pratica gidar a sviluppar la realisaziun concreta en las scolas.Per l'approfundaziun da lur savida pertutgant las structuras da temp "individualisaziun" pon las scolas s'annunziar a partir dal matg 2019 il perfecziunament da scola intern "Neue individualisierende didaktische Formen in den 3. Klassen der Sekundarstufe I".

Primavaira / stad 2019: Occurenzas d'infurmaziun lingiuistic-regiunalas / Occurenzas da barat per direcziuns da scola

A partir da l'avrigl 2019 maina l'inspecturat da scola tras 8 occurenzas d'infurmaziun e da barat linguistic-regiunalas per las autoritads da scola (presidis dal cussegl da scola, commembers dal cussegl da scola) e 5 occurenzas regiunalas da barat per direcziuns da scola davart ils temas survista da la realisaziun formala dal Plan d'instrucziun 21 GR encl. medias ed informatica sco er davart la situaziun actuala dals meds d'instrucziun.

Atun 2018: Purschidas d'approfundaziun da l'inspecturat per scolas

Da l'atun 2018 fin il favrer 2019 organisescha l'inspecturat da scola occurrenzas d'infurmaziun en las regiuns linguisticas per las autoritads da scola e porscha cussegliaziuns per las direcziuns da las scolas sco er approfundaziuns per ils teams da chasas da scola davart il tema "structuras da temp per l'individualisaziun".

Onn da scola 2018/19

Il Plan d'instrucziun 21 GR entra en vigur per il nov onn da scola. El cumpiglia la scolina fin la 2. classa dal stgalim secundar I. Ma il nov plan d'instrucziun na cumpiglia anc betg l'instrucziun da la 3. classa dal stgalim secundar I. Qua vegn il plan d'instrucziun mess en vigur in onn pli tard per l'onn da scola 2019/20 pervia da l'introducziun da las structuras da temp per l'individualisaziun.

Stad 2018: furmaziuns supplementaras obligatoricas

Durant las duas ultimas emnas da las vacanzas da stad vegnan organisadas per l'emprima giada furmaziuns supplementaras regularas en didactica da differents roms en tuttas trais linguas chantunalas, e quai en las differentas regiuns dal chantun. Ultra da quai cuntinueschan er scolaziuns supplementaras ed en il Grischun talian vegnan organisadas furmaziuns supplementaras entaifer la scola.

A partir dal matg 2018: Infurmaziun dals geniturs tras ils purtaders da scola

Blers purtaders da scola infurmeschan ils geniturs e las persunas responsablas per l'educaziun davart l'introducziun dal Plan d'instrucziun 21 GR en furma d'occurrenzas d'infurmaziun.   

Primavaira 2018: Purschidas d'approfundaziun da l'inspecturat per scolas

A partir da la primavaira 2018 porscha l'inspecturat – tenor il princip da clamar – purschidas d'approfundaziun per teams da chasas da scola davart il tema "Diagnosa–promover–giuditgar" e davart il "set per l'infurmaziun dals geniturs". Las purschidas d'approfundaziun per teams da chasas da scola davart il tema "Medias ed informatica" èn vegnidas manadas tras tar tut ils purtaders da scola.

Mars 2018: sesidas da quartal

En las sesidas da quartal durant la primavaira 2018 metta l'inspecturat a disposiziun a las direcziuns da scola in set per l'infurmaziun dals geniturs. Quel po vegnir duvrà da las scolas per la communicaziun cun ils geniturs. Las scolas survegnan gratuitamain in leporello en las linguas chantunalas per infurmar ils geniturs u las persunas responsablas per l'educaziun. L'uffizi per la scola populara ed il sport (ingrid.lareida@avs.gr.ch) prenda encunter empustaziuns collectivas dals purtaders da scola.

Enviern 2017/18: furmaziuns supplementaras obligatoricas

Dapi il cumenzament da november 2017 pon persunas d'instrucziun s'annunziar per las furmaziuns supplementaras obligatoricas tar il Plan d'instrucziun 21 GR, che han lieu durant l'onn 2018. Gia la fin da l'onn 2017 èn vegnidas lantschadas a la SAPGR las emprimas scolaziuns supplementaras per il rom "Etica, religiuns, cuminanza". Il cumenzament da l'onn 2018 èn suandadas ulteriuras furmaziuns supplementaras obligatoricas. Tut las scolaziuns supplementaras che han lieu en il rom da la realisaziun dal Plan d'instrucziun 21 GR, vegnan a cumenzar avant l'introducziun dal Plan d'instrucziun 21 GR l'onn da scola 2018/19. Medemamain l'onn 2018 organisescha la SAPGR en cooperaziun cun l'inspecturat tut las furmaziuns supplementaras entaifer la scola che pertutgan "Diagnosa – promover – giuditgar". 

Novembre 2017: plans d'instrucziun rumantsch e talian online

Tuts trais plans d'instrucziun grischuns pon vegnir consultads online a partir d'immediat sut www.lehrplan.ch. Il Plan d'instrucziun 21 GR è vegnì translatà cumplettamain en rumantsch ed en talian dal servetsch da translaziuns da la chanzlia chantunala dal Grischun. Quai cun excepziun dals plans d'instrucziun "Tudestg en scolas rumantschas" e "Terza lingua estra" ch'èn avant maun en tudestg. Ensemen cun ina glista supplementara da noziuns en sursilvan ed en ladin porscha la translaziun ina terminologia cumplessiva che po vegnir implementada cun success – en connex cun il Plan d'instrucziun 21 GR – en tut ils roms.  

November 2017: manuals d'agid

Ils manuals d'agid chantunals "Medias ed informatica" sco er "Diagnosa – promover – giuditgar" stattan a disposiziun a partir d'immediat en tut las linguas chantunalas. La versiun interactiva cun links directs a materialias ed ad infurmaziuns supplementaras po vegnir chargiada giu da la pagina d'internet. Tuts dus concepts fundamentals vegnan actualisads periodicamain.  

Primavaira/stad 2017: manuals d'agid/sesidas da quartal

Sin sia pagina d'internet publitgescha il USS dus manuals d'agid chantunals "Medias ed informatica" e "Diagnosa – promover – giuditgar". L'inspecturat approfundescha quests documents cun tut las autoritads da scola ad occurrenzas en las differentas regiuns linguisticas sco er cun mintga singula direcziun da scola a las sesidas da quartal. 

Stad 2017: Furmaziuns supplementaras en didactica dals roms – curs da pilot

Durant las vacanzas da stad han gì lieu a la SAPGR – per tudestg – emprimas furmaziuns supplementaras en didactica da differents roms. Questas furmaziuns èn stadas curs da pilot. Lur evaluaziun serva sco basa per far midadas necessarias dal cuntegn e da la concepziun. Ils curs regulars per persunas d'instrucziun da scolas rumantschas e tudestgas cumenzan la stad 2018. Per persunas d'instrucziun da lingua taliana han lieu la stad 2019 furmaziuns supplementaras en didactica dals roms.

Primavaira 2017: Furmaziuns supplementaras obligatoricas

La fin da mars han ils emprims teams da chasas da scola inizià las furmaziuns supplementaras obligatoricas tar il Plan d'instrucziun 21 GR cun la furmaziun supplementara entaifer la scola "Instruir ed emprender a moda orientada a las cumpetenzas". Er anc durant l'onn 2017 porscha la SAPGR in pitschen dumber d'emprimas furmaziuns supplementaras en didactica dals roms, e quai en furma da curs da pilot. L'atun ha lieu la scolaziun supplementara "Etica, religiuns, cuminanza".  

Favrer/mars 2017: sesidas da quartal

La realisaziun dal Plan d'instrucziun 21 GR è vegnida tractandada per las sesidas da quartal. A partir da quest mument cusseglia l'inspecturat da scola las direcziuns da scola tar il process da realisaziun entaifer las structuras regularas. En quest rom vegn consegnà tut il material da communicaziun da las occurrenzas d'infurmaziun en furma digitala.

Favrer/mars 2017: furmaziun supplementara obligatorica per las direcziuns da scola

Las direcziuns da scola han approfundà ils instruments da planisaziun e las basas per planisar e per diriger tenor lur incumbensa legala la planisaziun da plirs onns per realisar tut la furmaziun supplementara obligatorica en lur scola.

Atun 2016: occurrenzas d'infurmaziun

L'atun 2016 èn las autoritads da scola, las direcziuns da scola e las persunas d'instrucziun vegnidas infurmadas davart la realisaziun:
- 11 occurrenzas per autoritads da scola en las regiuns linguisticas (plaun strategic)
- 2 occurrenzas per direcziuns da scola: 23-09-2016 e 16-11-2016 (plaun operativ)
- 43 occurrenzas per persunas d'instrucziun en las regiuns linguisticas

A l'occurrenza d'infurmaziun dals 23 da settember 2016 ha prof. dr. Reusser referì davant las direcziuns da scola davart la dumonda co che l'orientaziun a las cumpetenzas vegn realisada en il Plan d'instrucziun 21.

Zercladur 2016: Deliberà il credit d'impegn per la realisaziun dal Plan d'instrucziun 21 GR

Il zercladur 2016 ha il cussegl grond deliberà il credit d'impegn per realisar il nov Plan d'instrucziun 21 GR.

Mars 2016: Approvaziun dal Plan d'instrucziun 21 GR inclusiv las tavlas da lecziuns

Ils 15 da mars 2016 ha la regenza grischuna approvà il Plan d'instrucziun 21 GR inclusiv las tavlas da lecziuns.

Favrer 2016: Occurrenza d'infurmaziun dal cussegl grond

Ils 15 da favrer 2016 ha gì lieu in'occurrenza d'infurmaziun a l'ur da la sessiun da favrer dal cussegl grond. Las deputadas ed ils deputads dal cussegl grond èn vegnids orientads davart ils terms ils pli impurtants da la realisaziun planisada dal Plan d'instrucziun 21 GR.  

Schaner 2016: Hearing cun ils partenaris socials da scola

Ils 15 e 16 da schaner 2016 èn la scola auta da pedagogia dal Grischun (SAPGR), la Magistraglia Grischun (LEGR), l'associaziun dals cussegls da scola dal Grischun (ACSG), la federaziun da mainascolas dal Grischun (FMSGR) e la conferenza da las instituziuns d'uffants e da giuvenils (IUG) da la federaziun grischuna "chasas ed ospitals" vegnidas envidadas ad in hearing ensemen cun las instituziuns da la scolaziun speziala. Ils partenaris socials da scola han gì la pussaivladad da prender posiziun davart las mesiras da realisaziun, davart las adattaziuns chantunalas vi dal model dal plan d'instrucziun sco er davart las tavlas da lecziuns. Ils giavischs èn – sche pussaivel – vegnids integrads en il Plan d'instrucziun 21 GR inclusiv las tavlas da lecziuns sco er en il Rapport tar la realisaziun dal Plan d'instrucziun 21 GR.  

November 2015: Entrada en vigur dal plan d'instrucziun per il rom rumantsch sco lingua da scola

Il plan d'instrucziun per il rom rumantsch sco lingua da scola sco er las parts dals chapitels introductivs dals plans d'instrucziun da lingua ch'èn relevantas per las scolas rumantschas èn vegnids relaschads da la regenza ils 24 da november 2015. Il plan d'instrucziun per il rom rumantsch sco lingua da scola vegn mess en vigur il medem mument sco l'entir Plan d'instrucziun 21 GR per l'onn da scola 2018/19.