Il chantun Grischun preceda cun il bun exempel en il sectur da las purschidas da sport inclusivas. Ils GKB SPORTKIDS èn in program organisà da graubündenSport per promover il moviment d'uffants da 5 e 6 onns. En trenaments polisportivs s'acquistan els basas da moviment impurtantas per lur ulteriur svilup ed emprendan d'enconuscher en divers curs da fufragnadi las disciplinas da sport da lur regiun. Dapi l'onn 2015 existan ils GKB SPORTKIDS special. Uffants da 5 fin 8 onns cun impediments profitan d'in trenament da basa ch'è adattà a lur premissas individualas. Ils progress sin il champ motoric èn impressiunants. Er psichicamain pon ils uffants profitar enormamain da quests trenaments: els daventan pli curaschus e rinforzan lur confidenza en sasez. Ulteriuras infurmaziuns: GKB SPORTKIDS Specials

Las suandantas uniuns porschan ulteriuras pussaivladads da trenament ch'èn concepidas per persunas cun impediments. Las purschidas èn in element d'ina uniun da sport ed èn integradas en las structuras da l'uniun. Special Olympics Switzerland collavura stretgamain cun questas uniuns e las distingua cun il label UNIFIED. Persunas interessadas pon s'annunziar directamain tar quests clubs per survegnir ulteriuras infurmaziuns.

• Unihockey UHC Alligators Malans, distinguì cun il label UNIFIED da Special Olympics Switzerland
• Tennis Tennisclub Lenzerheide, distinguì cun il label UNIFIED da Special Olympics Switzerland
• Secziun da giuvens, skis alpin ed ir cun l'aissa, SC Fideris, distinguida cun il label UNIFIED da Special Olympics Switzerland
• Ballape SC Razén (infurmaziuns tar hitz@specialolympics.ch), vegn a survegnir il label UNIFIED da Special Olympics Switzerland
• Saut Tanzschule tanzerina, vegn a survegnir il label UNIFIED da Special Olympics Switzerland
• Nudar, gimnastica, unihockey, patinadi, passlung e gianellas, BTV Chur Behindertensport, vegn a survegnir il label UNIFIED da Special Olympics Switzerland