Zum Seiteninhalt

Special Olympics

Special Olympics è il moviment da sport il pli grond dal mund per persunas cun impediments ed è represchentà en passa 170 pajais. Stgars 500 000 coaches e passa 1,1 milliuns voluntarias e voluntaris procuran che las circa 5 milliuns atletas ed atlets sa sviluppian en passa 30 disciplinas da sport e possian sa scuntrar a concurrenzas cuminaivlas. Il moviment è vegnì fundà l'onn 1968 en ils Stadis Unids da l'America dad Eunice Kennedy Shriver ed è activ en Svizra dapi l'onn 1995 sco fundaziun independenta.

Ulteriuras infurmaziuns davart Special Olympics.

Visiun e missiun

La visiun da Special Olympics è la stima, l'acceptanza e l'egualitad d'umans cun impediments.

Special Olympics gida umans cun impediments a sviluppar lur prestaziuns grazia al sport. Quai promova la conscienza da sasez, la fitness corporala, l'independenza ed il curaschi d'empruvar chaussas novas. Occurrenzas da Special Olympics permettan aventuras cuminaivlas cun autras atletas ed atlets, cun confamigliars e cun la societad.

Promoziun d'uniuns da sport inclusivas

Ina finamira strategica impurtanta da Special Olympics è quella d'applitgar la convenziun davart ils dretgs da persunas cun impediments da la ONU per ils dretgs da persunas cun impediments en il sectur dal sport, e quai cun dar access spezialmain ad uffants ed a giuvenils al sport inclusiv da buna qualitad. Cun il project UNIFIED, ch'è vegnì lantschà l'onn 2012 en Svizra, ha Special Olympics tschentà in term impurtant per realisar questa finamira.

Concretamain vul quai dir che persunas cun in basegn da sustegn pli intensiv pon sa participar regularmain ed activamain ad ina purschida dal sport regular – en in'uniun da sport u a chaschun d'ina occurrenza da sport da massa – sco er a la vita sociala da questas structuras da sport.Per cuntanscher questa finamira collavura Special Olympics stretgamain cun las uniuns da sport, gida quellas a concepir il project, a scolar ed a perfecziunar ils coaches e distingua questas uniuns da sport cun il label UNIFIED. Ultra da quai emprova Special Olympics da cuntanscher sin plaun naziunal ina convenziun cun las differentas federaziuns tetgalas. Questa convenziun prevesa che las federaziuns s'engaschian activamain en lur clubs da porscher trenaments per persunas cun impediments. En differentas federaziuns tetgalas è questa convenziun gia realisada.