Zum Seiteninhalt

Promoziun da la generaziun giuvna

Dapi intgins onns vegnan coordinadas las stentas da Swiss olympic en il sectur da la promoziun da la generaziun giuvna. Swiss olympic ha stgaffì per quest intent ina rait che consista d'incumbensadas ed incumbensads chantunals per la promoziun da la generaziun giuvna e da represchentantas e represchentants da las federaziuns naziunalas da sport. Communablamain duain ins empruvar da cuntanscher che la promoziun da la generaziun giuvna vegnia realisada en l'avegnir en Svizra en moda sistematica e tenor las resursas.

Per pudair ademplir la rolla en la rait da la promoziun da la generaziun giuvna en Svizra confurm a las pretensiuns e per satisfar als basegns dals differents acturs en il sport da la generaziun giuvna en il Grischun, ha graubündenSPORT fixà la finamira da coordinar ils divers interess e da procurar per enconuschientschas unitaras.

Promoziun individuala da sportistas e sportists

En il rom dal sectur da promoziun dal fond da sport "Contribuziuns a sportistas e sportists" pon persunas che retschaivan contribuziuns da promoziun da l'agid da sport vegnir sustegnidas supplementarmain cun ina contribuziun dal fond da sport. Plinavant pon sportistas e sportists che possedan ina carta actuala da "Swiss olympic talents", stgalim naziunal, survegnir ina contribuziun da sustegn dal fond da sport. Las directivas correspundentas e las dumondas respectivas chattais Vus qua.

Per atletas ed atlets da la generaziun giuvna che possedan ina carta naziunala da talent da Swiss olympic e che ston frequentar pervia da lur disciplina da sport ina scola extrachantunala dal label "swiss olympic", paja il chantun ils daners da scola effectivs. Ils documents necessaris respectivs chattais Vus qua.

Promoziun da las structuras (centers da prestaziun)

Il chantun Grischun vuless garantir a lunga vista structuras professiunalas per il sport da prestaziun e sustegnair perquai l'installaziun e la gestiun da centers da prestaziun regiunals e naziunals. Per sustegnair quests centers da prestaziun è perquai vegnì creà in nov instrument da promoziun en il rom da la nova lescha da promoziun dal sport. A centers da prestaziun en il chantun Grischun ch'èn previs en il concept da juniors da la federaziun naziunala e che vegnan determinads da l'uffizi federal da sport en ina disposiziun valaivla concernent la «promoziun da juniors da G+S», pon vegnir pajadas contribuziuns. Las directivas correspundentas e las dumondas respectivas chattais Vus qua.