"cool and clean" è il program da prevenziun en il sport svizzer che s'engascha per in sport correct e net. Il program sa drizza ad uniuns ed a federaziuns da sport sco er ad organisaturas ed organisaturs d'occurrenzas da sport ed a gestiunarias e gestiunaris da stabiliments da sport.
La finamira da l'ambassadura da "cool and clean" è quella da motivar – cun infurmaziuns, cun preschentaziuns e cun lavuratoris – uniuns da sport da sustegnair in sport net e correct e da s'annunziar tar "cool and clean". Per realisar il program cun ils giuvenils servan las sis empermischuns (uschenumnads "commitments"):
- Jau vi cuntanscher mias finamiras!
- Jau ma deport correctamain!
- Jau fatsch mias prestaziuns senza doping!
- Jau renunziel a tubac!
- Jau renunziel ad alcohol! (U16) / Sche jau baiv alcohol, fatsch jau quai senza far donn a mai ed ad auters! (16+)
- Jau ... ! Nus ... ! (atgna empermischun)
Uniuns e federaziuns che s'annunzian tar "cool and clean" vegnan sustegnidas cun material didactic sco sets da gieus, videos e broschuras d'infurmaziun ch'èn adattadas per giuvenils sco er tras la cussegliaziun da l'ambassadura chantunala.
Las organisaturas ed ils organisaturs d'occurrenzas da sport e las gestiunarias ed ils gestiunaris da stabiliments da sport gidan cun lur engaschament tar "cool and clean" a realisar occurrenzas e stabiliments senza fim ed ad observar las disposiziuns davart la protecziun da la giuventetgna da l'alcohol e mussan ch'ellas ed els vulan in sport correct e net. Tar la realisaziun da las mesiras vegnan er ellas ed els sustegnids cun material d'infurmaziun e cun cussegliaziuns.
Infurmaziuns ed annunzia sut www.coolandclean.ch.
Dar ad emprest material da "cool and clean"
Il material d'occurrenza da "cool and clean" po vegnir prendì ad emprest a Cuira tar graubündenSport. Il suandant material stat a disposiziun: tenda, credenza da la bar, bandieras e banderolas da reclama. Il material sto vegnir prendì en consegna e puspè returnà a Cuira. Empustaziuns pon vegnir fatgas sut il suandant link: https://coolandclean.ch/de/shop.