Per reducir blessuras en il sport da scola recumonda il post da consultaziun svizzer per la prevenziun d'accidents (ppa) d'integrar sistematicamain e sapientivamain la prevenziun d'accidents en las scolas. La plattafurma d'internet dal ppa www.bfu.ch/de/dossiers/sport-in-der-schule porscha in sustegn pratic a las scolas. Sin la pagina d'internet stattan a disposiziun infurmaziuns multifaras, glistas da controlla e material d'instrucziun per differentas disciplinas da sport ed activitads da scola.
Segirezza en l'aua
Instrucziun da nudar
En il plan d’instrucziun 21 ed en las explicaziuns da la tavla da lecziuns èn definids ils suandants puncts concernent l’instrucziun da nudar:
- Ils purtaders da scola èn obligads da porscher - uschenavant sco pussaivel - in'occasiun per l'instrucziun da nudar (p.ex. soluziuns regiunalas, diever da bogns d'hotels durant la stagiun bassa).
- L'instrucziun da nudar dastga mo vegnir dada d'ina persuna d'instrucziun ch'è en possess d'in brevet valaivel.
- Persunas d'instrucziun da nudar han cumpetenzas en nudar da salvament.
- Sco cumpetenza da basa en il 2. ciclus fixescha il plan d'instrucziun che tut las scolaras ed ils scolars san sa mover a moda segira en l'aua e san nudar (controlla da segirezza en l'aua).
- Per motivs da segirezza èsi da far stim da furmar gruppas d'ina grondezza bain survesaivla (betg dapli che 12 uffants per gruppa). Perquai vegni recumandà d'engaschar en l'instrucziun da nudar ina persuna accumpagnanta en cas da passa 12 scolaras e scolars.
- Ils purtaders da scola èn responsabels per la surveglianza ed han la responsabladad.
Controlla da la segirezza en l'aua
Far ina cupitgarola da l'ur dal bogn en l'aua profunda, sa tegnair al lieu sur l'aua per 1 minuta, nudar 50m ed alura sortir da l'aua – quai è la controlla da la segirezza en l'aua (CSA). Cun la CSA vegni examinà, sch'ina persuna ch'è crudada en l'aua, po sa salvar sezza e cuntanscher sezza l'ur u la riva.
Las scolaras ed ils scolars che han absolvì cun success la CSA, survegnan in attest da la persuna d'instrucziun. Quel conferma che la scolara u il scolar ha reussì la CSA e ch'ella u el è cumpetenta u cumpetent avunda per dastgar ir en l'aua profunda survegliada.
En il chantun Grischun duain tut ils uffants avair l'occasiun d'emprender da nudar. La CSA è cuntegnida en il Plan d'instrucziun 21 en il ciclus 1 resp. en il ciclus 2. La scola populara ha la finamira che las scolaras ed ils scolars possedian il pli tard la fin da la 4. classa las cumpetenzas da la CSA.
Las persunas d'instrucziun pon empustar ils attests da CSA per lur scolaras e scolars gratuitamain cun il formular.
Documents