Med d'instrucziun, scolina
En scolina vegnan stgaffidas las basas per il sport da scola. Las lecziuns variadas e constructivas che resguardan la vegliadetgna duain promover il svilup motoric dals uffants. Il med d'instrucziun "Sport en scolina" cuntegna infurmaziuns davart las basas fisicas dals uffants da 5 e 6 onns, davart la qualitad da l'instrucziun da sport sco er var 70 lecziuns per l'instrucziun da sport sin il stgalim da la scolina. Questa collecziun d'exercizis e da gieus existents (Med d'instrucziun Educaziun fisica, mobilesport.ch, Sport per uffants da G+S tool da lecziuns) duai servir sco mussavia u sco inspiraziun per l'instrucziun da sport sin il stgalim da la scolina e cumpiglia – cun excepziun da "Sa mover en l'aua" – tut ils champs da cumpetenza dal rom Moviment e sport tenor il Plan d'instrucziun 21.
Persunas d'instrucziun da la scolina pon chargiar giu il med d'instrucziun sco PDF.
Material d'instrucziun, 1. – 9. classa
La basa per l'instrucziun dal rom Moviment e sport furman il Plan d'instrucziun 21 sco er ils examens da sport da scola da la 5. e da la 8. classa. Per ciclus cuntegna il material d'instrucziun ina glista da controlla concernent las cumpetenzas sco er fegls da cuntegn cun ina collecziun d'exercizis e da gieus adattads (med d'instrucziun Educaziun fisica, mobilesport.ch, examens da sport da scola ed unitads d'instrucziun) per obtegnair las cumpetenzas tenor il Plan d'instrucziun 21. Ulteriuras infurmaziuns chattais Vus sin il fegl d'infurmaziun.
Informationsblatt
Zyklus 1 Checkliste
Zyklus 1 Checkliste und Inhalt
Zyklus 2 Checkliste
Zyklus 2 Checkliste und Inhalt
Zyklus 3 Checkliste
Zyklus 3 Checkliste und Inhalt
> Curs d'introducziun virtual
Unitads d'instrucziun, 1. - 3. classa
Impurtant èsi da far experientschas multifaras cun moviments. Ma tge scolaziun da basa dovri propi e co po quella vegnir intermediada a las scolaras ed als scolars primars en ina moda che als correspunda?
L'ordinatur "Unterrichtseinheiten" cuntegna lecziuns che sa basan ina sin l'autra e tests respectivs sco meds d'agid per l'instrucziun da sport sin il stgalim primar. Las lecziuns pon vegnir realisadas 1 sin 1 en la halla da gimnastica. Ma ellas cuntegnan er renviaments per variaziuns individualas. Ils temas currer, rudlar, sa volver, ballantschar, pusar, raiver, gieus da team, emprender ad enconuscher objects da gieu, sa mover e preschentar en moda ritmica servan sco agid d'orientaziun per la multifariadad indispensabla da l'instrcuziun da sport sin il stgalim primar.
Persunas che instrueschan sport pon chargar giu l'ordinatur "Unterrichtseinheiten" sco PDF.
Activdispens.ch – Sa mover malgrà ina dispensaziun
Suenter ina malsogna èsi savens puspè pussaivel da sa mover senza problems en il rom dal sport da scola. Er cun ina leva blessura pon uffants e giuvenils prender part a l'instrucziun da sport da scola, sche quella vegn adattada per els. Perquai ch'il plaschair da sa mover diminuescha savens suenter ina malsogna u suenter ina blessura, èn quests eveniments ina stgisa bainvegnida per ils giuvenils per sa laschar dispensar dal tuttafatg dal sport da scola e per star davent da quel.
Per metter tuttina en moviment las persunas blessadas e levamain malsaunas e pia er per sustegnair il process da regeneraziun è vegnì lantschà l'onn 2012 il project "activdispens.ch" da l'associaziun svizra per il sport en scola (ASSS) e da la gruppa da lavur svizra per il trenament da reabilitaziun (GSTR).
Il project "Sa mover malgrà ina dispensaziun" porscha – cun agid d'in formular medical da dispensaziun e d'in catalog categorisà d'exercizis – in instrument a las persunas d'instrucziun da sport per integrar correctamain ed en in rom adattà uffants e giuvenils dispensads parzialmain activamain en l'instrucziun da sport da scola. Quai dat als medis ed a las persunas d'instrucziun da sport la segirezza che uffants e giuvenils dispensads parzialmain vegnan integrads en lur senn activamain en l'instrucziun da sport.
Infurmaziuns davart il project "aktivdispens.ch" chattais Vus qua.