Il sectur da l'educaziun sportiva s'occupa da tut las dumondas specificas dal sport da scola.

Dis da sport chantunals

graubündenSport coordinescha ils dis chantunals da sport da scola e gida las organisaturas ed ils organisaturs a las administrar. En il decurs da l'onn cumpetan en tut var 2000 giuvenils als divers dis da sport en las disciplinas ballarait, unihockey, ballabasket, cursa d'orientaziun e ballape e cumbattan per la qualificaziun per il di da sport federal.

Mintga onn sa rendan pia var 100 represchentantas e represchentants da las scolaras e dals scolars grischuns al lieu da la concurrenza naziunala respectiva e cumpetan cun giuvenils d'auters chantuns.

Cussegliadras e cussegliaders da gimnastica

En il chantun Grischun è en vigur l'uschenumnà sistem da cussegliaziun da gimnastica. En tut sustegnan 38 spezialistas e spezialists las scolas da lur circul da cussegliaziun da gimnastica. Las cussegliadras ed ils cussegliaders da gimnastica cusseglian la magistraglia en dumondas da l'instrucziun da gimnastica e da sport sco er dal sport da scola voluntar. Ellas ed els han la scolaziun d'in coach da scola G+S ed èn pia er las persunas da contact per ils fatgs da giuventetgna + sport. 

Examen da sport da scola

La cussegliadra u il cussegliader da gimnastica è cumpetent per l'organisaziun e per la realisaziun da l'examen da sport da scola a la fin dal 8. onn da scola. Circa 2000 scolaras e scolars exerciteschan las differentas disciplinas durant l'onn ed absolvan quest test da sport a la fin da l'onn.

L'examen da sport da scola è in med impurtant per controllar la qualitad da l'instrucziun da sport.

Dapi l'onn da scola 2012/13 vegn organisà en la 8. classa il nov examen obligatoric da sport da scola, dapi l'onn 2013/14 sin basa facultativa er l'examen en la 5. classa. Ils resultats dals dus examens vegnan endatads en il sectur da la banca da datas da sport ch'è protegì cun in pled-clav. Da quel sectur vegnan er emess ils diploms. Sin la pagina iniziala da la banca da datas da sport stattan a disposiziun en furma electronica ils documents d'examen per tut las persunas d'instrucziun interessadas.

Project "cupitgarola"

En il rom dal program chantunal d'acziun Es ti fit? che s'engascha per in pais saun tras dapli moviment e tras in nutriment saun, maina grischun sport il project "cupitgarola". Tras furmaziuns supplementaras praticas, tras in sustegn finanzial e tras inscunters da barat assistids vegnan las persunas d'instrucziun da scolina introducidas ed assistidas durant il temp dal project. Infurmaziuns detagliadas chattais Vus sin la pagina d'internet da Es ti fit?. 

Furmaziun supplementara da las persunas d'instrucziun

In instrument impurtant per garantir la qualitad da l'educaziun sportiva è la furmaziun supplementara da las persunas d'instrucziun. graubündenSport organisescha e coordinescha differents curs da perfecziunament per persunas d'instrucziun en il sectur dal sport.

Dapi l'onn 2016 vala l'obligaziun da frequentar ina furmaziun supplementara d'in mez di per persunas d'instrucziun che instrueschan sport. Per ademplir questa obligaziun da frequentar ina furmaziun supplementara pon las persunas d'instrucziun frequentar tranter auter in curs regiunal.

Las cussegliadras ed ils cussegliaders da gimnastica organiseschan mintga onn in tal curs regiunal davart temas actuals dal sport en lur circul da cussegliaziun da gimnastica. Ils temas dals curs regiunals vegnan preparads mintgamai da las cussegliadras e dals cussegliaders da gimnastica sco er da spezialistas e da spezialists en in curs da 2 dis. La publicaziun dals curs regiunals vegn fatga adina directamain tras las scolas. Ultra da quai è ella er sin la pagina d'internet.

Sport da scola G+S

Curs da G+S e champs da G+S per uffants da 5 fin 20 onns pon vegnir annunziads tar sport da scola G+S. Per annunziar ina purschida sto la manadra u il manader avair la renconuschientscha G+S correspundenta. Las infurmaziuns chattais Vus sut jugendundsport.ch. La persuna da contact per las purschidas da G+S en scola è la u il coach da scola G+S ubain la cussegliadra u il cussegliader da gimnastica da la regiun en damonda. La noziun scola cumpiglia tut las scolas publicas e privatas dals stgalims primar e secundars I e II sco er tut las instituziuns spezialas da furmaziun e d'educaziun renconuschidas dal stadi.

Sport da scola voluntar

Il sport da scola G+S vegn promovì da graubündenSport cun cleras finamiras. Sche las scolas adempleschan las cundiziuns dal sport da scola voluntar, pon ellas annunziar lur purschida supplementarmain tar il sport da scola voluntar e vegnan sustegnidas finanzialmain dal chantun.