Fond da sport

Uniuns da sport, federaziuns da sport, organisaziuns da sport sco er sportistas e sportists dal chantun Grischun pon profitar da contribuziuns dal fond da sport. Petents da dretg public na survegnan naginas contribuziuns.

I vegnan pajadas contribuziuns ad occurrenzas da sport, a l'acquisiziun d'urdains e da material da sport, a la construcziun d'implants da sport, per sustegnair projects per promover il sport sco er per sustegnair sportistas e sportists.

Occurrenzas

Per occurrenzas da sport pon vegnir pajadas contribuziuns or dal fond da sport. Occurrenzas che appartegnan al manaschi general da campiunadi èn exclusas da quai. La dumonda da contribuziun sto vegnir inoltrada almain 4 emnas avant che l'occurrenza ha lieu.

Material da sport ed urdains da sport

Per acquistar material da sport ed urdains da sport po vegnir pajada or dal fond da sport ina contribuziun da 40 % dals custs imputabels. Il material da sport sto esser en possess da l'uniun. Exclus da quai è l'equipament persunal d'ina sportista u d'in sportist. Las dumondas da contribuziun ston vegnir inoltradas avant l'acquisiziun resp. avant l'empustaziun.

Stabiliments da sport ed edifizis da sport

Per construir, per renovar u per engrondir stabiliments ed edifizis da sport pon vegnir finanziads 20 % dals custs totals or dal fond da sport. Exclus da questa prestaziun èn stabiliments da sport ch'èn vegnids construids da corporaziuns publicas u che vegnan duvrads commerzialmain. La dumonda da contribuziun sto vegnir inoltrada avant il cumenzament da las lavurs.

Projects per promover il sport

Per projects che servan a promover il sport u en spezial il sport da giuventetgna pon vegnir pajadas contribuziuns or dal fond da sport. Projects che promovan il sport e che servan ad ademplir las obligaziuns publicas u che han in caracter commerzial èn exclus da questa contribuziun. La dumonda da contribuziun sto vegnir inoltrada avant il cumenzament dal project.

Promoziun da sportistas e da sportists

I) Contribuziuns a retschavidras e retschaviders grischuns da contribuziuns da promoziun da l'agid da sport

Per sustegnair la generaziun giuvna e las sportistas ed ils sportists d'elita degns da vegnir promovids che possedan ina carta da "swiss olympic" d'aur, d'argient u da bronz e che survegnan ina contribuziun da promoziun da l'agid da sport da la fundaziun svizra "agid da sport", pon vegnir pajadas contribuziuns.

II) Contribuziuns a titularas e titulars grischuns d'ina carta da "swiss olympic talents", stgalim naziunal

Per sustegnair la generaziun giuvna da sportistas e da sportists grischuns ch'èn degns da vegnir promovids e che possedan ina carta actuala da "swiss olympic talents", stgalim naziunal, pon vegnir pajadas contribuziuns.

Premis da sport a federaziuns

Il chantun Grischun po surdar premis da sport a federaziuns grischunas da sport. Per federaziun da sport e per onn da federaziun po mintgamai vegnir surdà in premi da 500 francs.

Ils mussavias respectivs ed ils formulars da dumonda dals differents secturs da promoziun chattais Vus sut "mussavias" / "dumondas".

Occurrenzas da sport turisticas grondas vegnan sustegnidas supplementarmain cun contribuziuns da la promoziun da l'economia. Ulteriuras infurmaziuns survegnis Vus tar l'uffizi per economia e turissem.

Tge è il fond da sport?

Mintga chantun dispona d'in fond da sport-toto / da sport, cun il qual vegnan sustegnids projects che promovan il sport. Quests fonds da sport vegnan alimentads cun il gudogn net da Swisslos. Quests daners vegnan repartids tenor il princip dal chaschunader. Dapli ch'i vegn "giugà" en in chantun, e dapli daners che quest chantun survegn per ses fond da sport.

Perquai profita il sport en il Grischun, sche Vus As participais en il Grischun a scumessas da Swisslos.

Dapi la fundaziun da la societad da sport-toto l'onn 1938 ha il sport svizzer da dretg public pudì profitar dad 1,8 milliardas francs. Pia ha questa societad ina impurtanza centrala sco numer 1 dals promoturs dal sport!

Documentaziun