Zum Seiteninhalt

GKB SPORTKIDS

GKB SPORTKIDS è il program per promover il moviment d’uffants da 5 e 6 onns dal chantun Grischun, organisà da graubündenSPORT. Circa 600 uffants exerciteschan mintgamai duas giadas per emna en ina gruppa da trenament da GKB SPORTKIDS.

En collavuraziun cun Swiss olympic talents e cun l'universitad da Basilea è il project vegnì lantschà l'onn 2004, ed en la regiun da Cuira è vegnì creà l'emprim center da trenament. Ulteriurs centers e lieus da trenament èn vegnids vitiers dapi alura adina puspè. Dapi l'onn 2015 vegnan ils GKB SPORTKIDS purschids er per uffants cun impediments spiertals.

La finamira dal project è quella da promover la motorica generala dals uffants. Tras la scolaziun polisportiva da basa duai vegnir impedì ch'ils uffants sa spezialiseschian gia baud en ina disciplina da sport. L'integraziun da federaziuns e d'uniuns da sport permetta als uffants d'emprender d'enconuscher differentas disciplinas en trenaments da fufragnadi organisads. Ils uffants survegnan plaschair da sa mover e tras ils trenaments da fufragnadi scuvran els lur disciplina preferida da pli tard.