Zum Seiteninhalt

Sport da scola voluntar

Ina investiziun en il futur

Per uffants e giuvenils duain pussaivladads da far sport e da sa mover en il mintgadi daventar insatge che sa chapescha da sez. Perquai vegn il sport da scola voluntar promovì da graubündenSPORT cun cleras finamiras. Las scolas survegnan uschia la pussaivladad d'arranschar ina purschida attractiva per lur scolaras e scolars, e quai cun il sustegn dal chantun.

Pertge sport da scola voluntar?

  • Moviment fa bain ed è impurtant per in bun svilup corporal, spiertal e social dals uffants e giuvenils.
  • Las scolaras ed ils scolars emprendan d'enconuscher novas disciplinas da sport divertentas chi fan plaschair. Ellas ed els survegnan la motivaziun da far sport er ordaifer la scola. Quai è la basa per sa mover e per far sport durant l'entira vita, per uschia promover l'atgna sanadad.
  • Il sport da scola voluntar sa vesa sco punt tranter il sport da scola obligatoric ed il sport d'uniun e duai motivar ils uffants e giuvenils da far pli tard sport en in'uniun.
  • Per dapli sport e moviment en il mintgadi da scola pon las uras libras tranter e suenter las lecziuns vegnir emplenidas durant il temp da bloc cun purschidas da sport. Medemamain pon las structuras dal di cumplementaras a la scola ed a la famiglia vegnir extendidas tras purschidas da sport supplementaras.

Tge è sport da scola voluntar?

Il sport da scola voluntar cumpiglia curs da sport da scola voluntar sco er champs da sport da scola en il rom da Giuventetgna+Sport (G+S), il program naziunal da promoziun dal sport.

Ils curs da sport da scola voluntar èn purschidas che han lieu mintga emna sut la direcziun cumpetenta da G+S e che porschan a las scolaras ed als scolars in trenament regular en il sectur dal sport da massa. En il cas ideal han quests curs lieu directamain suenter l'instrucziun obligatorica, sur mezdi u in suentermezdi liber sin l'areal da scola u en ils stabiliment da sport da la vischnanca.

Ils champs da sport da scola duran almain quatter dis, vegnan organisads da manadras e manaders da G+S e porschan in rom adattà per integrar il moviment ed il sport. Pervia da lur posiziun extraordinaria durant l'onn da scola daventan questas occurrenzas eveniments nunemblidaivels per ils uffants, per ils giuvenils e per las persunas d'instrucziun. En ils champs ston avair lieu mintga di almain duas unitads da sport da mintgamai duas uras.Tut ils detagls davart questas purschidas da sport da scola G+S sut www.jugendundsport.ch / Schulsport.

Abunar la newsletter

Vulessas Vus esser infurmada/infurmà davart il sport da scola voluntar? Alura abunai la newsletter "Sport da scola voluntar chantun Grischun". En quella chattais Vus tut las novitads davart il sport da scola voluntar sco er exempels or da la pratica actuala da purschidas existentas.

Qua pudais Vus abunar la newsletter "Sport da scola voluntar".