Dapi l'onn 1997 maina la Centrala grischuna da dunnas il Post spezialisà per cussegliaziun da lavur e professiun. Grazia ad ina cunvegna da prestaziun cun il chantun vegn questa purschida simpla, favuraivla e qualifitgada manada vinavant e rinforzada. Da nov duain las purschidas sa drizzar pli savens er ad umens.
Tge dretgs hai jau sco lavuranta, sche jau sun en speranza? Co duai jau proceder, sche jau gudogn damain che mes collega da lavur malgrà las medemas qualificaziuns? Co poss jau segirar mes provediment per la vegliadetgna? En talas u sumegliantas dumondas dal dretg da lavur, dal dretg d'assicuranza sociala, dal dretg da visita u dal dretg da divorzi gida il Post spezialisà per cussegliaziun da lavur e professiun (CLP) vinavant. «Cun sia purschida serra la Centrala da dunnas ina largia impurtanta», ha declerà Jon Domenic Parolini, il schef dal Departament d'educaziun, cultura e protecziun da l'ambient (DECA). Ensemen cun il Post da stab per l'egualitad da las schanzas saja la purschida ina contribuziun substanziala a favur da l'egualitad en il chantun Grischun.
Il DECA sustegna l'activitad da cussegliaziun da la Centrala da dunnas dapi l'onn 2009 en il rom d'ina cunvegna da prestaziun. Questa cunvegna è vegnida prolungada l'ultima giada per ils onns 2018 fin 2021. Per la nova cunvegna da prestaziun per ils onns 2022 fin 2024 vegn l'import maximal da fin ussa 125 000 francs per onn auzà sin 130 000 francs per onn, cun la resalva ch'il Cussegl grond approveschia il preventiv. Il motiv per quest augment è l'extensiun da l'activitad cun l'intenziun da sa drizzar pli savens als umens sco gruppa en mira. Il motiv è tranter auter il giavisch dals umens d'ademplir dapli obligaziuns d'assistenza e da realisar models da rollas alternativs che pretendan ina repartiziun pli flexibla da la lavur pajada e betg pajada. En enclegientscha cun il Post da stab per l'egualitad da las schanzas ch'è cumpetent per il controlling, duain vegnir sviluppadas e realisadas mesiras adattadas per quest intent.
Dapli persunas che tschertgan cussegl pervia da las mesiras cunter il coronavirus
Las persunas che fan actualmain diever da la cussegliaziun èn per gronda part dunnas, en singuls cas ed adina pli savens dentant er umens. L'onn 2020 èn vegnids fatgs – malgrà las restricziuns temporaras pervia da las mesiras cunter il coronavirus – circa tuttina blers discurs da cussegliaziun sco l'onn 2019, numnadamain tut en tut 256. 11 da las 120 persunas che han tschertgà cussegl èn stads umens. En cumparegliaziun cun l'onn precedent è il dumber da cussegliaziuns per persunas da la gruppa da vegliadetgna tranter 31 e 40 onns s'augmentà marcantamain da 16,8 a 30,8 pertschient. Questa categoria da vegliadetgna cumpiglia bleras persunas cun ina famiglia davosvart. «La smanatscha acuta per l'existenza pervia da COVID-19 pudess avair giugà ina rolla», ha declerà Cathrin Räber-Schleiss, la presidenta e gestiunaria da la Centrala grischuna da dunnas. Ulteriuras infurmaziuns davart la Centrala grischuna da dunnas stattan a disposiziun sut www.beratungszentrum-gr.ch.
Fotografia:
La cussegliadra Annetta Simeon en discurs cun Irmgard Ritz, suprastanta da la Centrala grischuna da dunnas
Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch
Responsabladad: Departament d'educaziun, cultura e protecziun da l'ambient