Tge dovran dunnas per avair success en la professiun ed en la politica? Co pon ellas sa posiziunar bain e crear buns contacts? La retscha da curs per dunnas en la politica ed en l'administraziun sustegna e qualifitgescha dunnas che vulan s'engaschar en suprastanzas, en l'administraziun publica, en gremis politics u en auters gremis. La purschida deriva da la collavuraziun dal Center per management d'administraziun da la Scola auta spezialisada dal Grischun e dal Post da stab per l'egualitad da las schanzas.

La collavuraziun fritgaivla tranter il Post per l'egualitad da las schanzas ed il Center per management d'administraziun da la Scola auta spezialisada dal Grischun vegn cuntinuada er l'onn 2022. Dapi l'onn 2019 animescha e qualifitgescha la retscha da curs «Dunna en politica ed administraziun» da vegnir vinavant sin plaun professiunal e politic. La purschida sa drizza a dunnas ch'èn activas en l'administraziun publica, en organisaziuns nunguvernamentalas (NGO), en la politica u en instituziuns e che s'engaschan en uffizi d'onur en suprastanzas, en gremis ed en cumissiuns u che vulan far quai en l'avegnir sco er a dunnas en general che vulan investir en lur svilup persunal e professiunal.

Promover la participaziun politica e sociala
Las participantas vegnan sustegnidas en lur preschentaziun ed en lur identitad e vegnan qualifitgadas da far frunt en moda suverana a resistenzas. Ellas survegnan agids, per ch'ellas possian identifitgar e duvrar meglier lur cumpetenzas e lur potenzials. Ultra da l'autoreflexiun e da la teoria vegn er dada in'attenziun ad exercizis concrets e pratics. En il senn il pli vast animeschan ils curs er a la participaziun politica e sociala. Supplementarmain po la rait da contacts persunals vegnir engrondida – insatge ch'è indispensabel per avair success en il context professiunal u politic. «Dunnas han basegn da prender suenter tar l'autorisaziun da sasezzas e tar la creaziun da contacts», declera Barbara Wülser, manadra dal Post da stab per l'egualitad da las schanzas. «La retscha da curs è ina contribuziun impurtanta, per che dunnas possian participar pli savens a la vita publica e politica.» Ils curs pon vegnir reservads separadamain. Ils custs dals curs importan tranter 140 e 230 francs. Per studentas e per dunnas che tschertgan ina plazza vala in pretsch reducì. Il Post da stab promova ils curs cun ina contribuziun substanziala. Da quai profiteschan tut las participantas.

Las proximas datas da curs èn: ils 19 da matg: «Trenament da PR e da medias»; ils 26 d'avust: «Gieus da pussanza en il context professiunal». Ulteriuras infurmaziuns sin la pagina d'internet dal Post da stab per l'egualitad da las schanzas.

Fotografia agiuntada:

Infurmaziuns:

• Barbara Wülser, manadra dal Post da stab per l'egualitad da las schanzas, tel. +41 81 257 35 71 (cuntanschibla da las 13.00 fin las 14.00 e da las 15.00 fin las 17.00), e-mail Barbara.Wuelser@stagl.gr.ch
• Ruth Nieffer, manadra dal curs, Center per management d'administraziun, Scola auta spezialisada dal Grischun, tel. +41 81 286 39 18, e-mail Ruth.Nieffer@fhgr.ch

Responsabladad: Post da stab per l'egualitad da las schanzas