Sche dunnas ed umens survegnan differentas pajas entaifer la medema interpresa, malgrà ch'els han la medema qualificaziun, experientscha e prestaziun per la medema lavur u per ina lavur equivalenta, è avant maun ina discriminaziun da paja en il senn da la constituziun federala e da la lescha d'egualitad.
En l'economia generala han dunnas gudagnà l'onn 2014 en media 18,1 % damain che umens. En tut la Svizra pon vegnir declerads circa 60 % da quels cas, 40 % èn inexplitgabels e pia discriminants. Las dunnas han pia gudagnà l'onn 2014 en l'economia privata 7,5 % ed en il sectur public 6,9 % damain, perquai ch'ellas èn dunnas.
Vi da questas cifras analisadas detagliadamain e commentadas l'onn 2014 n'è strusch sa midà insatge fin al di d'oz. Las differenzas da paja inexplitgadas èn las pli grondas en la regiun Svizra orientala, da la quala fa part er il Grischun. Qua gudognan dunnas – a medema dotaziun – 10,1 % damain che umens, (cumpareglià cun la regiun dal Lai da Genevra 5,7 %).
En cifras: En Svizra han las dunnas la fin dal mais 593 francs damain sin il conto, perquai ch'ellas èn dunnas, e quai tar ina differenza media da paja da 1412 francs en cumparegliaziun cun ils umens. La discriminaziun da l'economia publica che resulta da quai, vegn calculada da l'uffizi federal da statistica per l'onn 2012 sin 7,7 milliardas francs per onn.
Bleras firmas s'engaschan per l'egualitad da las pajas, dattan pajas gistas a lur emploiadas ed emploiads – dunnas ed umens –, sa participeschan al dialog davart l'egualitad da las pajas e sa laschan certifitgar. Tuttina: Las differenzas tranter las pajas dals umens e da las dunnas èn en Svizra anc adina considerablas. Quai sa mussa mintga mais il di da pajament – ed er en la prevenziun da vegliadetgna. Fin a la pensiun po resultar ina differenza da paja da fin in mez milliun francs.
Tge faschain nus
Il post spezialisà per l'egualitad da las schanzas s'engascha per l'egualitad en la vita professiunala. El infurmescha (link als servetschs egualitad da las pajas) lavurantas e lavurants davart la lescha d'egualitad, dat infurmaziuns, porscha furmaziuns supplementaras e sviluppa projects da pilot.
Dapli davart il tema
Analyse der Löhne von Frauen und Männern anhand der Lohnstrukturerhebung 2014
Plattform Lohngleichheit des EGB
Equal Pay Day
Aktuelle Statistiken zu Lohngleichheit
Analysen und Studien zu den Lohnunterschieden zwischen Frauen und Männern
Auf dem Weg zur Lohngleichheit - Tatsachen und Trends (Broschüre)