La lavur da tgira è il provediment e la tgira da conumans. Quasi 20 % da tut la lavur che vegn prestada en Svizra è lavur da tgira. Pli fitg che mintga auter champ da l'economia e da la lavur è la lavur da tgira marcada da relaziuns assimetricas tranter las schlattainas. La gronda part da questa lavur vegn prestada da dunnas, en moda betg pajada u cunter in pajament relativamain pitschen. La pli gronda part da la lavur da tgira betg pajada resulta en chasadas privatas. Passa 90 % da la tgira d'uffants vegn prestada gratuitamain, medemamain in terz da la tgira da creschids malsauns e da persunas che basegnan tgira.
Tant pli è necessaria ina vista pli exacta da las dinamicas tranter la schlattaina, l'economia ed il svilup:
- Tgi presta actualmain la lavur da tgira indispensabla e betg substituibla ed a tge cundiziuns?
- Co influenzeschan ils spustaments locals e socials da la lavur da tgira pajada e betg pajada la dinamica tranter las schlattainas?
- Co sa cumporta il sectur da tgira envers auters secturs economics?
Cumpatibilitad cun activitad da gudogn
Ils dischavantatgs da lavur da tgira betg pajada pon esser decisivs:
- main schanzas sin il martgà da lavur
- pauca renconuschientscha da las qualificaziuns
- garanzia sociala insuffizienta
- main opziuns da scolaziun
- cementaziun da las rollas
- ristga da povradad
Anc adina èn principalmain las dunnas quellas che ston reducir lur activitad professiunala, perquai ch'ellas gudognan main, perquai ch'i mancan purschidas cumplementaras a la famiglia, perquai ch'ellas han temps da lavur flexibels e perquai che la tgira u il provediment vegn attribuì socialmain a la mamma ed a la figlia.
Ma er ils umens vulan passentar dapli temp cun lur uffants e sa participar dapli al sustegn da confamigliars malsauns. Er els urtan sin impediments che rendan difficil da cumbinar questas incumbensas cun l'activitad da gudogn.
Migrantas da tgira
La dumonda da tgira e d'assistenza a chasa da persunas pli veglias s'augmenta. Savens vegnan engaschadas dunnas estras per questa lavur, uschenumnadas "migrantas da tgira". Cun CareInfo è vegnida stgaffida ina plattafurma d'infurmaziun davart il tema tgira ed assistenza a chasa tras assistentas da tgira da 24 uras. La plattafurma ha la finamira da satisfar il basegn d'infurmaziun creschent. Ella rimna infurmaziuns existentas e prepara quellas per differentas gruppas en mira resguardond er las differenzas chantunalas.
Tge faschain nus
Nus ans engaschain per ina repartiziun eguala da la lavur da tgira sin ils umens e las dunnas e per bunas cundiziuns generalas per quellas persunas che prestan questa lavur en furma pajada u betg pajada. Nus sustegnain la renconuschientscha e la revalitaziun da la lavur da tgira.
Dapli davart il tema
EBG: Care - die Sorge um Menschen
Nationales Forschungsprogramm NFP 60: "Care"-Trends in Privathaushalten: Umverteilen oder auslagern?
Yes we care. Studie mit fundiertem Einblick in die gesellschaftlichen Brennpunkte privater Pflegearbeit aus gleichstellungspolitischer Perspektive.
CareInfo, Informations- und Austauschplattform für Care-Migrantinnen, Arbeitgebende und Fachpersonen
Women in Development Europe WIDE: Care Ökonomie