Ils ultims 40 onns ha gì lieu ina midada fundamentala. Bler dapli persunas giuvnas frequentan furmaziuns supplementaras suenter il temp da scola obligatoric che pli baud. Cunzunt il dumber da dunnas è s'augmentà. Entant che passa 40 % da las dunnas da passa 65 onns na disponan betg d'ina furmaziun postobligatorica, è la quota da maturitad da las dunnas oz pli auta che quella dals umens.
Mattas e mats han en il fratemp quasi las medemas premissas e schanzas en scola. Tar il grad da furmaziun n'existan strusch pli differenzas tranter las schlattainas.

I dat dentant differenzas tar:

• il tip da scola elegì suenter il 9. onn da scola. 35 % da las mattas frequentan ina scola media e 35 % ina scola professiunala. Mo 23 % dals mats frequentan dentant ina scola media, percunter 53 % ina scola professiunala.
• la schelta dal rom d'accent als gimnasis grischuns. La quota da dunnas importa ca. 80 % tar "psicologia/pedagogia/filosofia" sco er tar "linguas veglias e novas", tar ils roms "economia e dretg" sco er "matematica e scienzas natiralas" domineschan ils umens giuvens.
• la schelta dal rom da studi. Passa 60 % da la studentas grischunas studegian scienzas umanas e socialas, main che 10 % informatica.
  

La chaussa natirala ch'ina dunna giuvna cun talent da matematica u in um giuven interessà pedagogicamain suonda er propi ses talents, n'è fin oz betg dada. Las cifras expriman quai cleramain.