«Tipic matta!», «Mats èn halt uschia!». Tgi na pensa betg qua e là en questas categorias? Ma danunder vegnan quellas? Èn mats da naschientscha ennà cools e vegnan mattas bravas sin il mund? U vegni fatg da mats mats e da mattas mattas? E tge signifitga quai per la scola e per la tscherna da professiun?

Maletgs da rollas culturals fixs han ina gronda influenza sin noss svilup da scola e sin la tscherna da professiun. Blers uffants e giuvenils sa restrenschan inconscientamain sezs, sa concentreschan sin roms che vegnan attribuids a lur schlattaina e tschernan pli tard ina professiun ch'è tipica per las schlattainas.

Ma mattas pon oz daventar inschigneras e mats mussaders.

Mattas sco mats duain pudair sviluppar lur persunalitad uschè independentamain d'aspectativas socialas sco pussaivel.

Tge che nus faschain

• Nus sustegnain persunas d'instrucziun, spezialistas e spezialists da furmaziun professiunala, geniturs e persunas giuvnas en scolaziun en dumondas davart la scola/tscherna da professiun sco er davart la schlattaina e preschentain schanzas.
• Nus ans participain a projects da furmaziun sco il Di naziunal da l'avegnir u l'exposiziun professiunala FIUTSCHER e sviluppain agens projects.
• Nus tegnain referats ed organisain lavuratoris davart il tema.
• Nus collavurain en la gruppa da lavur "Furmaziun" da la Conferenza svizra da las delegadas a l'egualitad tranter dunnas ed umens.

Nossas finamiras èn

• Avertadad d'omaduas schlattainas per tut ils gieus, per tut ils roms e per tut las disciplinas da sport.
• Pli gronda diversitad per tscherner direcziuns da studi e per pratitgar professiuns.
• Augment da la reputaziun da professiuns tipicas da dunnas.
• Augment da las cumpetenzas da las persunas d'instrucziun en dumondas da l'egualitad da las schanzas