Nua chat jau la dretga experta?
Sin l'entir mund èn las dunnas sutrepreschentadas sco expertas en la perscrutaziun, en la scienza, en la tecnologia, en las medias ed en bleras autras branschas – er en Svizra. Anc adina èn ils umens quels che decleran publicamain il mund. Mo mintga quarta persuna che cumpara en rapports da medias, sin podiums u en la televisiun, è ina dunna. Per cumbatter cunter quest fatg èn vegnidas fundadas numerusas bancas da datas d'expertas cun la finamira principala da render pli visiblas per la publicitad las dunnas sco expertas e da las conceder ina vusch en il discurs public. Cun questas bancas da datas vegni simplifitgà da tschertgar expertas correspundentas per occurrenzas u per preschentaziuns publicas, da recrutar expertas en posiziuns directivas ed en gremis da decisiun u sco cussegliadras. Qua sutvart stat a disposiziun ina tscherna da bancas da datas.
En l'entira Svizra
sheKNOWS – la plattafurma svizra d'expertas
sheKNOWS
La plattafurma d'expertas sheKNOWS vegn purtada da la Federaziun da tetg da las organisaziuns da dunnas da la Svizra alliance F. La finamira da la plattafurma è quella da resguardar pli fitg las dunnas en la publicitad, per exempel en las medias u sco expertas en discussiuns ed ad occurrenzas.
Grischunas – dunnas en il Grischun
Grischunas
Questa pagina d'internet dat – en furma d'in lexicon online – ina survista davart tschertas dunnas grischunas. Represchentadas èn cunzunt persunalitads femininas istoricas, dentant er contemporanas.
Medienfrauen
Medienfrauen
Questa banca da datas è vegnida fundada da l'uniun Medienfrauen Svizra. La finamira da la banca da datas è quella da represchentar e da promover pli fitg las dunnas en la branscha da medias sco er d'etablir raits persistentas sin quest champ professiunal.
Professiunistas ambient
Professiunistas ambient
La banca da datas d'expertas da las Professiunistas ambient è concepida en emprima lingia per las dunnas ch'èn activas en il sectur da l'ambient. Commembras èn dunnas che lavuran en il sectur da l'ambient, che s'engaschan politicamain per l'ambient, che frequentan u che han absolvì ina scolaziun en il sectur da l'ambient.
Femdat – la banca da datas d'expertas
Femdat
Femdat sa drizza ad academicras ed a dunnas che fan u che han fatg carriera da cader u da professiun. La banca da datas è vegnida fundada l'onn 2001 sco banca da datas feministica da las universitads e da las scolas autas. femdat.ch porscha sustegn en la carriera professiunala, collia expertas e dunnas ch'entran en il mund da lavur e las dat access ad interpresas. Medemamain porscha la banca da datas spazi per la preschientscha d'expertas.
Sin plaun internaziunal
Questas contribuziuns stattan a disposiziun mo per tudestg e sin las paginas d'internet correspundentas er per englais.