Navigation

Inhaltsbereich

Raits e campagnas

Numerusas raits èn activas – tant en il chantun Grischun sco er sin plaun naziunal e sin plaun mundial – en il sectur da dunnas & egualitad, sco er generalmain en dumondas da las schlattainas. Qua sutvart chattais Vus ina tscherna da raits e da campagnas che sa basan sin il tema.

Professiunistas ambient

Professiunistas ambient

Las Professiunistas ambient ffu-pee defendan ils interess da quellas dunnas che s'occupan professiunalmain cun dumondas concernent l'ambient. Dunnas da l'entira Svizra ch'eran activas en il sectur da l'ambient han fundà l'uniun il matg 1989. Ellas lavuran en biros d'ecologia e da planisaziun, en l'agen manaschi, en organisaziuns da l'ambient, en l'administraziun, en instituts da perscrutaziun ed en scolas autas ubain frequentan ina scolaziun dal sectur da l'ambient. Dunnas en professiuns da l'ambient sa movan anc adina en domenas ch'èn savens tipicas per umens. Las Professiunistas ambient collian las singulas professiunistas da l'ambient, èn ina lobi per ils interess da lur professiun e da la politica d'egualitad e furman ina plattafurma per il barat d'experientschas.

Academicras

Secziun Grischun

L'Associaziun svizra da las academicras – secziun Grischun è ina rait independenta, vitala e multifara d'absolventas da scolas autas cun differentas direcziuns da studi, differentas professiuns, differentas culturas e da differentas generaziuns.
L'Associaziun ASA GR s'engascha a favur da l'egualitad e da la furmaziun, sustegna dunnas en lur scolaziun, tgira in contact amicabel tranter ellas e las permetta da barattar lur ideas ed experientschas. Cun quasi 80 commembras è questa associaziun ina da las pli grondas da quest gener en il Grischun. Medemamain è ella ina da las associaziuns da dunnas da las pli veglias en il chantun.

Soroptimist International Switzerland

Clubs a Cuira, en Engiadina

 
Soroptimist International (SI) è in'organisaziun per dunnas ch'è activa sin l'entir mund. Cun passa 3000 clubs e cun 80 000 commembras en 125 pajais è SI l'organisaziun da clubs da service per professiunistas qualifitgadas la pli gronda sin l'entir mund. Ils singuls clubs èn activs sin plaun local, naziunal ed internaziunal cun differents projects che servan a meglierar las cundiziuns da viver da las dunnas e da las mattas, che las gidan a realisar las finamiras ch'ellas vulan cuntanscher e che las gidan ad avair ina vusch cun ils medems dretgs sin tut ils nivels da la societad.

Zonta Svizra

Zonta 

La finamira da Zonta è quella da rinforzar cuminaivlamain las dunnas sin l'entir mund. Quai vegn fatg èn ina moda e maniera multifara tras gronds projects da service internaziunals e locals. Medemamain s'engascha Zonta per ils dretgs da las dunnas e cumbatta cunter tut las furmas da discriminaziun e da violenza envers dunnas. Plinavant s'engascha ella per obtegnair l'egualitad da las schanzas sin il champ giuridic, politic, economic e professiunal e per meglierar la furmaziun e la scolaziun da las dunnas sin l'entir mund.

Handwerk Netzwerk

Handwerk 

Il Handwerk Netzwerk è ina colliaziun da dunnas en professiuns da mastergn e pledenta correspundentamain cunzunt las dunnas che pratitgeschan u che s'interessan per in mastergn da n'emporta betg tge sectur; la rait porscha in spazi a dunnas en professiuns dominadas dad umens, en il qual ellas pon barattar lur ideas, emprender ina da l'autra e s'autorisar vicendaivlamain.

Helvetiarockt

Helvetiarockt 

Helvetiarockt è ina plattafurma svizra da colliaziun ed in post da coordinaziun per musicistas da divers secturs e s'engascha per augmentar la quota da dunnas en la branscha da musica. Ella emprova da cuntanscher quai cun metter a disposiziun numerusas purschidas per musicistas giuvnas sco er cun promover e cun colliar artistas professiunalas.

Comedy Frauen

Comedy Frauen 

Comedy Frauen è ina iniziativa privata da la cabarettista Patti Basler per render pli visiblas cabarettistas, moderaturas e columnistas. Per quest intent ha ella concepì ina glista, che vegn actualisada permanentamain, da dunnas da la scena da cabaret svizra.

Sporti{f}

sporti{f}

sportif è la rait svizra per sportistas e per dunnas ch'èn engaschadas professiunalmain u privatamain en il sport. La rait collia dunnas en l'entira Svizra ed en tut las disciplinas da sport, independentamain da la disciplina u da la regiun, en la quala ellas èn activas.

Campagnas

Umens en professiuns socialas

Umens en professiuns socialas 

Bleras professiuns socialas n'èn strusch in tema tar ils umens, cumbain ch'ellas fissan senz'auter er professiuns dad umens. La campagna emprova da mussar ad auters umens l'entira dimensiun e tut las pussaivladads da las professiuns socialas e da motivar els d'emprender ina professiun da questa branscha. Per quest intent vegnan preschentads in pèr umens ch'èn activs en professiuns socialas e ch'ins po er contactar directamain per vegnir a savair dapli.

equalVoice by Ringier

equalVoice 

Ringier, il concern da medias ch'è activ sin plaun internaziunal, s'engascha cun EqualVoice per ina vesaivladad gista e creschenta da las dunnas e da lur rapportaziuns, per las conceder la medema vusch sco als umens. Quai è impurtant perquai che en Svizra tractan en general 75% dals rapports en las medias mo dad umens.

We commit – we advance

We advance 

Advance è la federaziun economica directiva per l'egualitad da las schlattainas en Svizra, ina rait da pli che 120 interpresas svizras che s'engaschan per augmentar la quota da dunnas en il management. Las interpresas èn persvadidas ch'ina plazza da lavur cun ils medems dretgs è tut en tut in gudogn per umens, per dunnas, per interpresas e per la societad. In sguard sin il status quo en Svizra è in clom urgent da svegliar. En las direcziuns ed en ils cussegls d'administraziun èn dunnas anc adina la minoritad.

#Geschlechtergerechter

Geschlechtergerechter

Ina dretga egualitad cumpiglia tuttas e tuts. Perquai che inegualitads da las schlattainas concernan umens e dunnas en moda fitg persunala. Per vegnir vinavant dovri la participaziun da tuttas e tuts, mo en il dialog avanzain nus. #geschlechtergerechter porscha il spazi persuenter. Sa basond sin fatgs e ed en moda immersiva duai vegnir debattà davart dumondas da las schlattainas e – cuminaivlamain – lavurà vid l'egualitad da las schanzas. #geschlechtergerechter collia ils umans, unescha las forzas ed emprova d'obtegnair novs consens. Perquai che la transfurmaziun sociala po vegnir realisada mo cuminaivlamain, sur generaziuns e cun vast sustegn da la societad.

WECHO – l'eco da las dunnas da las muntognas

WECHO

Il project Wecho vuless dar ina vusch a quellas dunnas che han prendì las muntognas sco spazi da viver, sco plazza da lavur, sco lieu per l'atgna transfurmaziun e vuless rinforzar lur eco fin ch'el sa lascha udir cler e bain en las citads dal center da l'Europa.

Helvetia ruft!

Helvetia ruft 

Helvetia ruft! è il moviment da las dunnas en la politica. Ils resultats da record a chaschun da las elecziuns federalas 2019 èn ina istorgia da success, cun la quala nus vulain cuntinuar ensemen.
En ils parlaments chantunals e municipals èn las dunnas anc adina fermamain sutrepreschentadas. Perquai va Helvetia ruft! sin turnea ils proxims onns en ils chantuns ed en las citads – cun la finamira che dunnas ed umens scrivian – en parts egualas – las leschas er en ils parlaments chantunals e municipals.