Pir dapi l'onn 1971 è la Svizra ina vaira democrazia, nua che las dunnas pon votar ed eleger sco ils umens. Sco tschintgultim chantun ha il Grischun introducì ils 5 da mars 1972 il dretg da votar e d'eleger per dunnas sin plaun chantunal. Igl ha durà fin l'onn 1983, fin ch'er las ultimas 13 vischnancas han concedì a las dunnas lur dretgs politics, per part èn ellas vegnidas sfurzadas latiers cun ina disposiziun.

L'egualitad politica da las dunnas era contestada anc fin dacurt en il Grischun. Quai ha in effect fin oz. La participaziun da dunnas en la politica grischuna, lur represchentanza en gremis, en posiziuns da cader ed en organisaziuns da gronda influenza è anc adina modesta.

La participaziun e la represchentanza adequata da tut la populaziun en gremis politics è dentant la premissa per la democrazia e per decisiuns politicas legitimadas. Ord vista da l'egualitad da las schanzas dovri perquai dapli dunnas en la politica grischuna.

L'egualitad giuridica tranter dunna ed um è vegnida francada l'onn 1981 en la Constituziun federala, dapi l'onn 1996 è en vigur la lescha respectiva. L'egualitad materiala u effectiva è dentant anc betg cuntanschida. Cunzunt pervia da las rollas confurmas a la tradiziun istorica e pervia da la repartiziun da la lavur tradiziunala tranter dunnas ed umens datti adina puspè discriminaziuns.