Constituziun federala da la Confederaziun svizra, Art. 8 Abs. 3

«Um e dunna han ils medems dretgs. La lescha procura per lur egualitad giuridica ed effectiva, spezialmain en quai che pertutga la famiglia, la scolaziun e la lavur. Um e dunna han il dretg da la medema paja per ina lavur equivalenta».

Constituziun dal chantun Grischun, Art. 75 Abs. 1 e 2

«¹Il chantun e las vischnancas promovan il bainstar e la segirezza sociala da la populaziun, da la famiglia e da las singulas persunas.

²Els s'engaschan per l'egualitad da las schanzas per tuts, spezialmain per l'egualitad da dunna ed um.».

La Lescha d'egualitad

La Lescha d'egualitad scumonda a patrunas e patruns privats e publics da discriminar lur lavurantas e lavurants pervia da la schlattaina, e quai areguard l'engaschament, l'attribuziun da las incumbensas, las cundiziuns da lavur, la salarisaziun, la scolaziun e la furmaziun supplementara, la promoziun e la relaschada. Plinavant oblighescha ella las patrunas ed ils patruns da proteger lur collavuraturas e collavuraturs cunter mulestas sexualas. Mintga 4 onns èn las interpresas cun pli che 100 collavuraturas e collavuraturs obligadas da far in'analisa da l'egualitad da las pajas.
La Lescha d'egualitad prevesa ultra da quai agids finanzials per projects decisivs e per posts da cussegliaziun che gidan a promover l'egualitad en la vita professiunala.

Tge che nus faschain

Nus ans engaschain per che la Lescha d'egualitad vegnia observada ed applitgada correctamain e nus purschain cussegliaziuns.

Dapli davart il tema

www.gleichstellungsgesetz.ch Qua vegnan documentadas cuntinuadamain las decisiuns che vegnan prendidas en Svizra tudestga tenor la Lescha d'egualitad, descrittas las proceduras en ils chantuns e declerads ils elements da la lescha.