Navigation

Inhaltsbereich

L'egualitad na sa realisescha betg mo uschia

Avant 25 onns, ils 24 da matg 1996, ha il Cussegl grond approvà l'installaziun d'in biro chantunal d'egualitad. L'onn da giubileum sa ferma il Post da stab per l'egualitad da las schanzas dad oz per in mument e dumonda: Nua stat l'egualitad en il Grischun l'onn 2021?

Il biro chantunal d'egualitad è vegnì installà sin proposta da la Regenza ed en vista a la Lescha federala davart l'egualitad da dunna ed um, ch'è entrada en vigur il 1. da fanadur 1996. Il project per stgaffir il post da stab ed in post da mediaziun è bain vegnì acceptà unanimamain dal Cussegl grond ils 24 da matg 1996, ma ils votums cumprovan: il tema chaschunava discussiuns avant 25 onns precis sco oz. Da quel temp vegniva l'egualitad da las schanzas quasi messa a pèr cun la promoziun da las dunnas.

Ina societad senza rollas fixas
Bleras chaussas ch'eran vegnidas prendidas en mira avant 25 onns èn oz realitad. Ord vista giuridica èn blers obstachels vegnids eliminads, uschia che dunnas ed umens han cundiziuns generalas sumegliantas en blers secturs. L'egualitad da las schanzas n'è però betg mo ina dumonda giuridica, mabain er ina dumonda socioculturala. "Uschè ditg che rollas fixas determineschan noss sbozs da vita, na pudain nus betg sviluppar bain avunda nossas preferenzas e noss talents ed als metter a disposiziun a la societad", constatescha Barbara Wülser che maina il Post da stab per l'egualitad da las schanzas dapi il favrer 2021. Il cusseglier guvernativ Jon Domenic Parolini è cuntent d'avair las cumpetenzas d'egualitad sut ses tetg. Il schef dal Departament d'educaziun, cultura e protecziun da l'ambient punctuescha: "L'egualitad na sa realisescha betg mo uschia, mabain sto vegnir tgirada permanentamain e sviluppada vinavant."

Ina versiun curta da l'istorgia dal biro d'egualitad dal Grischun sa chatta qua.