Cuntegn da la pagina

E-voting

L'opiniun politica vegn furmada pli e pli fitg sur l'internet (medias digitalas e social media). Las votaziuns ed elecziuns sin via electronica (uschenumnà e-voting) èn ina resposta a la dumonda, co ch'il stadi po garantir la participaziun politica da sias burgaisas e da ses burgais en ina democrazia digitala. La participaziun a noss sistem democratic sto restar attractiva e simpla er en l'avegnir. Perquai ha il chantun Grischun fatg gia ils onns 2010 fin 2015 – en il rom d'in consorzi da nov chantuns – tests da success cun e-voting cun sias Svizras e ses Svizzers a l'exteriur. Quai a chaschun da 18 votaziuns sco er da las elecziuns dal Cussegl naziunal e dal Cussegl dals chantuns 2011. Il project dal consorzi è vegnì suspendì la fin da l'onn 2015, suenter ch'il Cussegl federal n'aveva – pervia da ponderaziuns da segirezza – betg permess d'applitgar la soluziun dal consorzi a chaschun da las elecziuns dal Cussegl naziunal 2015.

La Regenza ed il Cussegl grond considereschan l'introducziun dal e-voting, sut cundiziuns acceptablas, vinavant sco ina finamira impurtanta. Durant la sessiun da favrer 2018 ha il Cussegl grond acceptà ina revisiun parziala da la Lescha davart ils dretgs politics en il chantun Grischun (LDPC). Tras questa revisiun parziala èn vegnidas stgaffidas las basas giuridicas chantunalas necessarias per pudair introducir il e-voting sco terz chanal da votaziun ordinari sin tut ils plauns statals. Ils 25 da settember 2018 ha la Regenza surdà a la Posta svizra SA – en il rom d'ina procedura da submissiun publica – l'incumbensa per in nov sistem dad e-voting per il chantun Grischun. Sin quai eri planisà d'introducir il sistem cun verificaziun universala en duas fasas: a partir da l'onn 2020 cun in manaschi da pilot en sis vischnancas ed a partir da l'onn 2021 cun in'extensiun cuntinuada sin ulteriuras vischnancas. Perquai ch'il Cussegl federal ha concludì la stad 2019 d'orientar da nov il manaschi d'emprova, sa retardescha l'introducziun dad e-voting en il Grischun per entant segir fin l'onn 2021.