Navigaziun principala

Cuntegn da la pagina

Post spezialisà per il e-government

Il Post spezialisà per il e‑government è responsabel per la realisaziun coordinada da la Strategia dad e‑government dal Grischun ch'è vegnida concludida da la Regenza. Il post spezialisà promova ed examinescha projects dad e‑government en vista a la confurmitad cun la Strategia dad e‑government, coordinescha e sustegna projects ed è il post da consultaziun per tut las dumondas en connex cun e‑government. Il post spezialisà procura per l'integraziun da las vischnancas e represchenta il chantun Grischun en il sectur dal e‑government en gremis naziunals ed interchantunals.

Tge è e‑government?

Ils servetschs digitals che vegnan mess a disposiziun da l'administraziun publica, sco per exempel l'empustaziun online da patentas da pestga u la purschida d'infurmaziun digitala sin la pagina d'internet dal chantun Grischun, vegnan resumads sut la designaziun "e‑government". Il e‑government cumpiglia andaments administrativs a l'intern da l'administraziun chantunala sco er andaments administrativs externs, davent da la Confederaziun sur tut ils chantuns fin tar las vischnancas.

L'ulteriur svilup da purschidas digitalas per las burgaisas ed ils burgais sco er per l'economia gida ch'il chantun Grischun resta er en l'avegnir in lieu attractiv. Per quest intent duain las activitads da l'administraziun chantunala vegnir concepidas cun agid da las tecnologias d'infurmaziun e da communicaziun (ICT) uschia, ch'ellas resguardan il meglier pussaivel ils basegns da las burgaisas e dals burgais sco er da l'economia. L'economia sco er la populaziun spetgan che lur giavischs vegnian tractads da l'administraziun en moda effizienta e nuncumplitgada.

Strategia

Il zercladur 2018 ha la Regenza deliberà la Strategia dad e‑government dal Grischun 2019-2023. Qua tras duai il e‑government vegnir sviluppà vinavant en l'administraziun chantunala, ed i duain vegnir stgaffidas prestaziuns digitalas che portan in grond niz a las burgaisas ed als burgais sco er a l'economia. En general vegn prendida en mira in'activitad administrativa cun pauc palpiri. Tut las prestaziuns digitalas da l'administraziun chantunala duain pudair vegnir chattadas e duvradas en l'avegnir cun in access segir en in lieu central sin in portal d'internet. La strategia ha las suandantas finamiras:

Finamira 1: Purschida

Prioritarmain vegnan messas a disposiziun prestaziuns che portan il niz il pli grond e che pon vegnir realisadas en moda economicamain raschunaivla.

Finamira 2: Portal dad e‑government

I vegn stgaffì in portal da service, sur il qual la populaziun e l'economia pon utilisar en moda centrala prestaziuns electronicas dal chantun senza duvrar palpiri.

Finamira 3: Access simpel e segir

Ina identificaziun segira e pratica da las utilisadras e dals utilisaders pussibilitescha in access simpel a las prestaziuns dad e‑government. Questas prestaziuns pon vegnir duvradas er en furma mobila e senza barrieras.

Finamira 4: Administraziun cun pauc palpiri

Entaifer l'administraziun vegnan fatschentas normalmain liquidadas en moda digitala senza duvrar bler palpiri. Process standardisads, ch'èn sche pussaivel automatisads e che n'han naginas rupturas tranter ils mediums, ma er infurmaziuns disponiblas en in lieu central gidan ad evitar duplicitads ed a liquidar fatschentas en moda pli effizienta.

Projects

Per pudair realisar en moda coordinada quels projects dad e‑government ch'èn strategicamain impurtants, vegn manà in plan per la realisaziun da var 30 projects. Qua sutvart figureschan intgins exempels da prestaziuns dad e-government gia realisadas e futuras per mauns da la populaziun e da l'economia:

Portal dad e‑government

In portal online survesaivel metta a disposiziun en moda centrala servetschs dad e-government. Cun in access segir pon ins prender invista da las infurmaziuns, metter en moviment process da las autoritads e barattar documents sin via digitala.

eMidada

Las burgaisas ed ils burgais pon annunziar ina midada da chasa sin via electronica, pia senza palpiri e senza stuair ir ad in spurtegl.

CariPortal

Sur quest portal pon differents servetschs da l'Uffizi per il traffic sin via, sco per exempel midadas d'adressa, empustaziuns da numers d'immatriculaziun remplazzants e prestaziuns en connex cun l'examinaziun dal vehichel, vegnir mess a disposiziun en furma digitala.

eQuintDaTagliaGR – infurmaziuns davart il conto

Per las pajataglias ed ils pajataglias vegn stgaffida la pussaivladad da s'infurmar da tut temp – er ordaifer las uras da biro da l'Administraziun da taglia – online davart il stadi e davart ils moviments dals contos da taglia respectivs.