Navigation

Inhaltsbereich

Dumonda Rodigari concernent ils diploms per l'emprima scolaziun professiunala sin il stgalim secundar II

Sessiun: 07.12.2022

L'onn 2019 han il Departament federal d'economia, furmaziun e retschertga e la Conferenza svizra dals directurs chantunals da l'educaziun publica formulà la finamira da la politica da furmaziun «95 % cun diplom». Cun in'auta quota da diploms duai vegnir fatg frunt a la mancanza da persunas spezialisadas ed impedì, che giuvenils e persunas giuvnas creschidas daventian a lunga vista dependents da l'agid social.

Il rapport da perscrutaziun 2/22 «Plattafurma naziunala per la prevenziun e per il cumbat cunter la povradad – sustegn per giuvenils e persunas giuvnas creschidas cun problematicas multiplas als puncts da contact tranter il stgalim secundar I e II» preschenta actualmain ina quota da diploms da 91,4 % ed enumerescha ina retscha da recumandaziuns, gist en connex cun giuvenils cun pliras grevezzas.

Il fitg grond dumber da plazzas d'emprendissadi libras en il chantun Grischun lascha supponer, ch'il sustegn, ch'è necessari per cuntanscher la finamira da la politica da furmaziun, vegn tratg a niz anc memia pauc u n'è betg differenzià avunda. Ins è sa cunvegnì a quai, che las scolas annunzian al Center d'infurmaziun professiunala ils giuvenils da la 2. classa dal stgalim superiur cun sfidas previsiblas en la tschertga d'ina plazza d'emprendissadi, per ch'els survegnian il sustegn necessari tras il MCFP (Management da cas Furmaziun professiunala GR). Uschia poi vegnir garantì, che la midada reussescha. E sch'i dat difficultads durant l'emprendissadi, èn las retegnientschas d'in giuvenil pitschnas da s'adressar ad ina persuna da contact dal MCFP ch'il giuvenil enconuscha gia.

Concernent la finamira «95 % cun diplom» fan las sutsegnadras ed ils sutsegnaders las suandantas dumondas a la Regenza:

  1. Quant auta è la quota da diploms actuala per las emprimas scolaziuns professiunalas sin il stgalim secundar II da giuvenils e persunas giuvnas creschidas da 15 fin 25 onns ed en tge relaziun stat questa quota cun la cohorta da vegliadetgna correspundenta?
  2. Porscha il MCFP (Management da cas Furmaziun professiunala GR) il sustegn necessari als giuvenils cun in basegn da sustegn pli grond a partir da la 2. classa dal stgalim superiur u suenter l'interrupziun d'ina scolaziun? Quant savens vegn il MCFP contactà suenter in'annunzia da las scolas en la 2. e 3. classa dal stgalim superiur sco er suenter l'interrupziun d'in emprendissadi? Ed en tge relaziun stat quai cun ils diploms che mancan e cun las interrupziuns da las scolaziuns?
  3. Dapi onns èn las purschidas transitoricas ed ils semesters da motivaziun occupads sin in aut nivel stabil. Quant auta è la quota d'ina soluziun da cuntinuaziun sin il stgalim secundar II?
  4. Co vul il chantun Grischun tractar las recumandaziuns dal rapport da perscrutaziun 2/22 per augmentar la quota da diploms per l'emprima scolaziun professiunala?

Cuira, ils 7 da december 2022

Rodigari, Rettich, Degiacomi, Adank, Altmann, Atanes, Bachmann, Bardill, Baselgia, Berweger, Biert, Bischof, Bisculm Jörg, Bleuler-Jenny, Brandenburger, Bundi, Bürgi-Büchel, Cahenzli (Trin Mulin), Cahenzli-Philipp (Vaz Sut), Censi, Danuser (Cuira), Danuser (Cazas), Della Cà, Dietrich, Favre Accola, Föhn, Furger, Gartmann-Albin, Gredig, Hartmann, Hofmann, Hohl, Holzinger-Loretz, Jochum, Kasper, Kienz, Kocher, Krättli, Kuoni, Lehner, Luzio, Mazzetta, Menghini-Inauen, Michael (Castasegna), Mittner, Morf, Müller, Natter, Nicolay, Oesch, Pajic, Pfäffli, Preisig, Rageth, Righetti, Roffler, Rusch Nigg, Rutishauser, Stiffler, Tanner, Thür-Suter, Walser, Walther, Widmer, Wieland, Wilhelm, Zindel

Resposta da la regenza

En il context naziunal pon la quota da diploms sin il stgalim secundar II en il Grischun sco er las purschidas da sustegn vegnir valitadas sco positivas.

Tar la dumonda 1: Tenor l'Uffizi federal da statistica (stadi november 2022) importa la quota da diploms (quota netta mesauna 2019–2021) 92,8 pertschient sin il stgalim secundar II en il Grischun. En cumparegliaziun cun ils auters chantuns è il Grischun sin la posiziun sis da las quotas da diploms ed uschia per 2,6 pertschient sur la media svizra.

Tar la dumonda 2: Gea. Il Management da cas Furmaziun professiunala (MCFP) gida ils giuvenils cun in basegn da sustegn pli grond a tscherner ina professiun ed a chattar ina soluziun da cuntinuaziun a partir dal segund semester da la 2. classa superiura. Ils giuvenils che n'han – suenter avair bandunà la scola superiura, suenter avair frequentà ina soluziun transitorica, suenter avair interrut in emprendissadi u suenter betg avair dumagnà ina procedura da qualificaziun – nagina soluziun da cun­tinuaziun, vegnan contactads dal MCFP. Els pon dumandar facultativamain e tenor agen basegn il sustegn dal MCFP. En l'evaluaziun statistica na vegni betg differenzià tranter las differentas gruppas da vegliadetgna (2. e 3. classa superiura, ulteriuras). Ils onns 2013 fin 2021 ha il MCFP sustegnì en media 172 giuvenils/persunas giuvnas creschidas per onn. Dapi l'onn 2018 è il dumber sa reducì da 200 per onn a 157 per l'onn 2021. L'onn 2021 han 76 persunas accumpagnadas chattà ina soluziun da cuntinuaziun (scolaziun sin il stgalim secundar II: 40 persunas; soluziun intermediara [p.ex. soluziun transitorica, semester da motivaziun]: 23 persunas e surdada a la AI: 13 persunas). Ina part dals ulteriurs cas n'han ins betg pudì serrar giu en il decurs da l'onn. Els èn vegnids elavurads vinavant l'onn suandant. Intgins giuvenils / intginas persunas giuvnas creschidas han desistì da l'ulteriur accumpagnament tras il MCFP. Areguard la relaziun tranter ils cas dal MCFP ed ils diploms che mancan sco er las interrupziuns da las scolaziuns na pon ins betg far constataziuns raschunaivlas. Las soluziuns da cuntinuaziun dal MCFP na pon numnadamain betg vegnir cumpareglia­das cun in diplom federal renconuschì.

Tar la dumonda 3: Il dumber dals giuvenils en soluziuns transitoricas è sa reducì cleramain ils ultims onns. Ils 15 da november 2017 (di da referenza) frequentavan 270 giuvenils ina soluziun transitorica. L'onn 2022 è quest dumber sa reducì per 43 pertschient a 153 giuvenils. Ina situaziun sumeglianta sa mussa tar il semester da motivaziun: Er qua è il dumber dals giuvenils che han cumenzà in semester da moti­vaziun sa reducì da 61 a 35 (43 %) entaifer la medema perioda. La quota da las so­luziuns da cuntinuaziun d'ina purschida transitorica al stgalim secundar II importava ils ultims 5 onns en media 80 pertschient. En media vegn qua vitiers ina cumpart da 12 pertschient cun autras soluziuns da cuntinuaziun, sco p.ex. scola media, praticum. Tar il semester da motivaziun importa la quota da cuntinuaziun al stgalim secundar II en media 79 pertschient. Latiers vegn ina cumpart da 21 pertschient cun in'autra soluziun da cuntinuaziun. Questa calculaziun na resguarda betg ils giuvenils che han interrut anticipadamain il semester da motivaziun.

Tar la dumonda 4: Differentas recumandaziuns vegnan actualmain gia realisadas: Implementaziun da novas structuras CII (collavuraziun interinstituziunala, rinforza­ment da la cooperaziun verticala tras l'integraziun instituziunalisada da las direcziuns da partiziun sco er tras la recepziun da l'Uffizi da migraziun e da dretg civil per il 1. da schaner 2023), soluziuns transitoricas d'integraziun, registraziun sistematica en cas da la mancanza da soluziuns transitoricas u en cas d'interrupziuns da scolaziun e.u.v. Dapi il 1. d'avust 2022 collavura il MCFP plinavant pli stretgamain cun la AI, quai tar la registraziun tempriva sistematica e tar l'accumpagnament da giuvenils e da persunas giuvnas creschidas (da 13 fin 25 onns) cun ina ristga d'invaliditad (resp. cun restricziuns da la sanadad u cun problematicas multiplas) e cun in basegn da sustegn pli grond per la midada I. Quai duai simplifitgar il pass en l'emprima scola­ziun professiunala. Las purschidas vegnan communitgadas a chaschun d'occurren­zas per persunas d'instrucziun e per persunas responsablas per l'educaziun.

25 da schaner 2023