Per la protecziun dal clima e per la segirezza dal provediment èn necessarias stringentamain dapli investiziuns en l'effizienza energetica ed en las energias regenerablas. Deplorablamain impedeschan savens gronds obstachels birocratics nunnecessaris d'ademplir questa pretensiun. Mesiras per ina sanaziun energetica d'edifizis vegls vegnan uschia disturbadas, gea schizunt impedidas, tras leschas da construcziun cumplitgadas, tras ina pratica stentusa e chara da dumandar permissiuns sco er tras prescripziuns da la tgira da monuments e da la planisaziun dal territori. Ils impediments birocratics en il sectur da la sanaziun d'edifizis ston perquai vegnir reducids e la structura da las autoritads sco er la procedura da planisaziun ston vegnir optimadas.
La fracziun da la PLD s'engascha per ch'ils impediments per ina sanaziun energetica d'edifizis vegls vegnan eliminads u reducids en las leschas chantunalas da planisaziun ed en las leschas communalas da construcziun. Ultra da quai ston vegnir eliminadas tar proceduras da permissiun las duplicitads tranter vischnancas e chantun.
En quest senn vegn la regenza perquai incumbensada da far al cussegl grond propostas concretas, cun las qualas las 4 suandantas finamiras pon vegnir cuntanschidas:
1. las sanaziuns energeticas d'edifizis ston vegnir deliberadas da l'obligaziun da dumandar ina permissiun, tant enavant che l'aspect exteriur da l'edifizi na vegn betg midà essenzialmain;
2. la procedura per la permissiun da sanaziuns energeticas d'edifizis che basegnan ina permissiun sto vegnir simplifitgada ed accelerada uschenavant sco pussaivel;
3. las prescripziuns da distanza pon vegnir sutpassadas e las mesiras d'utilisaziun e d'autezza surpassadas, sche quai è necessari per la sanaziun energetica d'edifizis (confurm a l'art. 82 al. 3 LPTGR concernent las isolaziuns exteriuras);
4. stabiliments per far diever da l'energia solara èn permess en tut las zonas da construcziun, sch'i vegnan resguardads en moda adattada ils objects da proteger e las zonas da protecziun.
Cuira, ils 26 d'avust 2010
Nick, Pfäffli, Barandun, Bezzola (Samedan), Bezzola (Zernez), Burkhardt, Casanova-Maron, Claus, Clavadetscher, Engler, Fontana, Furrer-Cabalzar, Giacomelli, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jenny, Kasper, Krättli-Lori, Kunz (Fläsch), Marti, Meyer-Grass, Michael (Castasegna), Michel (Tavau Monstein), Niggli (Samedan), Perl, Rathgeb, Rosa, Steck-Rauch, Troncana-Sauer, Valär, Vetsch (Pragg-Jenaz), Waidacher, Wieland, Zweifel-Disch
Resposta da la regenza
La regenza parta l'opiniun che investiziuns architectonicas per meglierar l'effizienza energetica e per duvrar energias regenerablas duessan esser realisablas uschè bain sco pussaivel senza impediments nunnecessaris dal dretg da construcziun e/u da procedura, resguardond ils interess da la protecziun dal clima e da la segirezza dal provediment. Per giuditgar talas investiziuns ston tuttina vegnids resguardads ultra da l'interess public vi d'ina utilisaziun da l'energia uschè ecologica sco pussaivel – tut tenor la situaziun – er anc auters interess, sco per exempel interess da l'estetica architectonica e da la protecziun dal maletg dal lieu sco er interess da las vischinas e dals vischins.
Per las quatter finamiras che vegnan formuladas en l'incumbensa resulta il suandant:
1. Tenor l'incumbensa duain vegnir deliberadas sco emprim sanaziuns energeticas d'edifizis da l'obligaziun da dumandar ina permissiun da construcziun, uschenavant che l'aspect exteriur da l'edifizi na vegn betg midà considerablamain. Da quest giavisch poi vegnir tegnì quint, dentant betg cun ina revisiun d'ina lescha, mabain – per che la legislaziun saja adequata a l'instanza – directamain cun ina revisiun parziala da l'ordinaziun davart la planisaziun dal territori per il chantun Grischun (OPTGR), la quala cuntegna gia en l'artitgel 40 in catalog da projects da construcziun ch'èn deliberads da l'obligaziun da dumandar ina permissiun. En quest connex sto eventualmain vegnir exprimida ina resalva per mesiras vi d'objects protegids.
2. Tenor la cifra 2 da l'incumbensa duain quellas sanaziuns energeticas d'edifizis che dovran er vinavant ina permissiun da construcziun vegnir suttemassas almain ad ina procedura ch'è uschè simpla e svelta sco pussaivel. Er quest giavisch è degn da vegnir sustegnì, e quai per motivs da la tecnica da legislaziun er cun ina revisiun parziala da la OPTGR, numnadamain tras ina cumplettaziun correspundenta da la procedura d'annunzia (= procedura simplifitgada) en l'art. 50 al. 1 OPTGR.
3. Il terz punct pretenda che las sanaziuns energeticas d'edifizis na stoppian betg observar las prescripziuns davart la distanza, davart l'utilisaziun e davart l'autezza. Sa referind a las isolaziuns exteriuras sco mesira da sanaziun energetica d'edifizis la pli impurtanta e lunschor la pli frequenta èsi vegnì tegnì quint da quest giavisch gia en la nova lescha davart la planisaziun dal territori per il chantun Grischun dals 6 da december 2004 (art. 82 al. 3 LPTGR). Sche ed eventualmain quant enavant ch'ina tala dispensaziun sa cunvegn er per autras mesiras che pon chaschunar meglieraziuns energeticas (sco p.ex. collecturs solars, cellas solaras, indrizs da ventilaziun) sto anc vegnir sclerì pli detagliadamain, e quai cunzunt sut l'aspect da la protecziun da las vischinas e dals vischins. A chaschun da la proxima revisiun parziala da la LPTGR vegn la regenza a suttametter al cussegl grond propostas correspundentas.
4. Sco ultim punct vegn pretendida ina prescripziun chantunala, tenor la quala indrizs per duvrar l'energia solara ston vegnir permess en tut las zonas da construcziun, uschenavant ch'i vegnan resguardads en moda adattada ils territoris e las zonas da protecziun. Gia cun respunder la dumonda Menge ha la regenza explitgà ch'i n'è betg raschunaivel da relaschar ina tala prescripziun, perquai ch'igl exista gia ina disposiziun correspundenta sin plaun federal. Tenor quella ston implants solars vegnir permess, sch'els vegnan integrads cun quità en las fatschadas e sin ils tetgs e sch'els na pericliteschan nagins monuments culturals e natirals (cf. art. 18a LPT). En quest sectur n'exista pia betg in basegn d'agir legislativ. Sche insumma dovri in agid d'execuziun per patrunas e per patruns da construcziun sco er per autoritads da construcziun davart las pussaivladads d'integrar bain implants solars. La regenza vegn a procurar ch'i saja avant maun in tal agid d'execuziun per persunas interessadas.
Per resumar dumonda la regenza il cussegl grond d'acceptar l'incumbensa en il senn da las explicaziuns qua survart.
01. da november 2010