Incumbensa da la fracziun libra concernent ina candidatura per gieus olimpics
Sessiun: 19.10.2010
Suenter che la Svizra n'ha gì nagin success cun sia ultima candidatura per gieus olimpics, vegn tractada sin plaun naziunal la dumonda, sch'i duai puspè vegnir inoltrada ina candidatura en la proxima fasa. Schanzas ha ina tala candidatura mo, sch'ella ha ina vasta basa naziunala.
L'ultim temp han differentas regiuns da noss pajais annunzià lur interess a l'associaziun olimpica. Ins po partir dal fatg ch'i vegnia evaluà ed alura er decidì en il decurs da l'onn proxim (avrigl, matg), sche e cura ch'i duai vegnir inoltrada ina candidatura svizra.
I dat blers aspects che ston vegnir sclerids en connex cun ina candidatura olimpica. Ina candidatura pussibilitescha da metter las infrastructuras da traffic, dad IT sco er da sport sin il stadi il pli nov e da procurar ad ina regiun avantatgs da concurrenza a vista pli lunga.
Perquai èsi impurtant che noss chantun vegnia integrà en in'eventuala procedura d'evaluaziun. Natiralmain na vegn betg anc prendida ina decisiun pro u contra qua tras. Per quest intent ston ils avantatgs ed ils dischavantatgs vegnir considerads pli tard en moda cumplessiva.
Per entant sa tracti mo da betg manchentar la colliaziun en cumparegliaziun cun las autras regiuns da noss pajais.
La regenza vegn envidada d'inoltrar in dossier a l'associaziun olimpica, per che er il Grischun vegnia integrà en la procedura naziunala d'evaluaziun d'ina eventuala candidatura olimpica. Quest dossier sto er vegnir preschentà al cussegl grond.
Cuira, ils 19 d'october 2010
Koch (Landquart), Brandenburger, Casutt, Davaz, Nigg
Resposta da la regenza
La Svizra ha pudì realisar ils onns 1928 e 1948 gieus olimpics d'enviern a San Murezzan. Dapi lura èn vegnids fatgs differents sforzs per candidaturas en Svizra. Quellas han dentant tuttas fatg naufragi pervia da las decisiuns dal comité internaziunal olimpic (CIO) u sin basa da votaziuns dal pievel precedentas. Las ultimas candidaturas èn vegnidas inoltradas a Swiss olympic l'onn 2001 tras las citads da Tavau e da Berna. A la candidatura "Tavau 2010" eran participads ils lieus respectivamain las regiuns Bülach, Cuira, Flem/Laax, Kloten, Lai, Nossadunnaun, San Murezzan, Tavau e Turitg. Sco citad ospitanta ha candidà Tavau. Ils 5 da settember 2001 han las delegadas ed ils delegads da Swiss olympic decidì – cuntrari a la proposta dal comité executiv – da dar la preferenza a la candidatura da Berna. En ina votaziun dal pievel ha la populaziun dal chantun Berna refusà il sustegn da questa candidatura.
Ils ultims 4 onns han diversas regiuns da noss pajais annunzià a Swiss olympic che ellas sajan da princip interessadas da candidar en l'avegnir per gieus olimpics d'enviern en Svizra. Swiss olympic ha incumbensà ina task force da far scleriments preliminars correspundents ed ha decidì da persequitar vinavant l'idea d'ina candidatura. Ella ha envidà en scrit differentas regiuns da communitgar a Swiss olympic fin mez november 2010, sch'ellas sajan interessadas vi d'ina candidatura.
En sia sesida dals 31 d'avust 2010 ha la regenza dal chantun Grischun prendì enconuschientscha en in senn positiv da questa dumonda ed ha incumbensà il departament d'economia publica e fatgs socials da sclerir cun las vischnancas grischunas da la candidatura "Tavau 2010", sch'ellas èn da princip prontas da collavurar vi d'ina nova candidatura per gieus olimpics d'enviern.
Las tschintg vischnancas grischunas dumandadas han mussà lur interess general vi d'ina candidatura resp. lur prontezza d'examinar ina candidatura. La regenza ha prendì enconuschientscha da questas respostas positivas, e cun ses conclus dals 2 da november 2010 ha ella communitgà a Swiss olympic ch'il chantun Grischun
saja interessà vi d'ina candidatura per gieus olimpics.
A medem temp ha il cussegl federal explitgà il 1. da settember 2010 en sia resposta a las dumondas dal cusseglier naziunal Tarzisius Caviezel davart gieus olimpics d'enviern en Svizra che la Svizra saja – tut tenor la situaziun – en cas d'organisar gieus olimpics d'enviern, ch'ina candidatura stoppia vegnir purtada a partir dal cumenzament communablamain da Swiss olympic, da l'economia, da la confederaziun, dals chantuns e da las vischnancas, che occurrenzas sportivas grondas influenzeschian positivamain il maletg d'in stadi, ch'i stoppia vegnir cumprovada – per las votantas e per ils votants – ina relaziun plausibla tranter ils custs ed il niz, ch'i stoppian vegnir nizzegiadas infrastructuras existentas e che investiziuns stoppian vegnir fatgas sut l'aspect da la persistenza.
Tenor las infurmaziuns dal president da Swiss olympic, Jürg Schild, n'èsi actualmain betg necessari d'elavurar in dossier u da contactar ulteriurs chantuns ed ulteriuras vischnancas ordaifer il Grischun per fixar intenziuns da collavuraziun. I n'exista pia betg anc in dossier che pudess vegnir preschentà al cussegl grond. Sch'igl avess da dar ina candidatura svizra cun ina participaziun considerabla dal Grischun, vegn il cussegl grond a stuair decider davart la participaziun a maun d'ina missiva.
La regenza è pronta d'acceptar l'incumbensa en il senn da questas explicaziuns.
10 da november 2010