Il matg 2010 ha il departament da giustia, segirezza e sanadad dal Grischun lantschà ina consultaziun tar il sboz d'ina revisiun parziala da la lescha davart ils fatgs da sanadad dal chantun Grischun. La finamira da questa revisiun è stada quella d'abolir la limitaziun da la dispensaziun directa tras la media u tras il medi. Cun quai ha il departament sperà dad augmentar l'attractivitad da la professiun sco media u sco medi da chasa en il Grischun. Sin basa dal resultat cleramain negativ da la consultaziun è il departament arrivà a la conclusiun ch'il mument per abolir la limitaziun da la dispensaziun directa tras la media u tras il medi na saja betg favuraivel ed ha sistì per entant la revisiun da la lescha chantunala en vista a la revisiun currenta da la lescha federala.
Las medias ed ils medis da chasa vegnan resguardads da la populaziun sco part integrala fitg impurtanta dal provediment da basa e per regla sco emprim post da consultaziun en cas d'ina malsogna u d'in accident. En vista al svilup dals custs en ils fatgs da sanadad han las medias ed ils medis da chasa in effect catalisatoric resp. relevant areguard il svilup, perquai che mesiras che van pli lunsch e che chaschunan gronds custs pon savens vegnir evitadas cun in'assistenza cumpetenta. Pervia da quai stuess vegnir fatg tut il pussaivel per rinforzar e per mantegnair la medischina da chasa, en spezial er en vista a las structuras sparpagliadas dals abitadis dal Grischun. E tut quai sut l'aspect d'in provediment medicinal qualitativamain bun e persistent.
Las sutsegnadras ed ils sutsegnaders sa fan quitads serius davart il provediment cun medias e cun medis da chasa en tut il Grischun. Ina mancanza da medias e da medis da chasa sa mussa numnadamain gia. Uschia èn vegnidas serradas praticas a Cuira, a Landquart, a Claustra, a San Murezzan, en il Scanvetg ed a Zernez, perquai ch'i n'ha betg pudì vegnir chattada ina successura u in successur. Ad Arosa ha in medi generalist annunzià ch'el veglia serrar sia pratica per l'avrigl 2011. Ina successiun n'è betg en vista, e quai vul dir che Arosa resp. il Scanvetg ha mo pli ina pratica da medi. Evidentamain n'è il chantun Grischun betg attractiv per medias e per medis da da chasa futurs. Ils motivs per quai èn sco ch'i para las bleras uras da preschientscha en las valladas, ina gronda chargia temporara pervia dal servetsch d'urgenza che na vegn betg indemnisà, relaziuns geograficas dischavantagiusas cun lungas vias d'arriv, ina valur bassa dals puncts da taxa ed ina consegna da medicaments restrenschida per bundant 80 % da las medias e dals medis che pratitgeschan en moda libra.
En quest connex tschentan las sutsegnadras ed ils sutsegnaders las suandantas dumondas a la regenza:
1. Tge valur ed impurtanza han las medias ed ils medis da chasa en vista al svilup dals custs en ils fatgs da sanadad?
2. Co giuditgescha la regenza actualmain, a media vista sco er a lunga vista la segirezza dal provediment cun medias e cun medis da chasa en il chantun Grischun?
3. Datti mesiras structuralas che pudessan meglierar la segirezza da provediment? Pudessan p.ex. centers da sanadad regiunals u cuminanzas da medias e da medis almain stabilisar la situaziun?
4. Pudessan medias e medis da chasa vegnir incumbensads cun ulteriuras incaricas che faschessan frunt a la mancanza da medias e da medis da chasa e che pudessan render pli attractiva lur professiun?
5. Po – cun adattar il contract da medi TARMED – vegnir cuntanschida ina gulivaziun a favur da las medias e dals medis da chasa e sin donn e cust da las medias spezialistas e dals medis spezialists? E quai senza chatschar si ils pretschs, mabain sco rinforz dal provediment medicinal da basa?
6. Pudess la regenza s'imaginar ina pauschala supplementara, sche las medias ed ils medis da chasa fan ina visita a chasa?
7. Il project da managed-care che vegn tractà sin plaun federal premetta in provediment da basa che funcziunescha. Co duess quest project profitaivel vegnir realisà en ils egls da la regenza, sch'i na po eventualmain betg vegnir sa basà sin avunda medias e medis da chasa?
Cuira, ils 6 da december 2010
Hardegger, Aebli, Buchli-Mannhart, Campell, Casty, Clalüna, Conrad, Dudli, Felix, Grass, Jeker, Koch (Tumein), Kollegger (Cuira), Komminoth-Elmer, Lorez-Meuli, Mani-Heldstab, Michael (Donat), Montalta, Niggli-Mathis (Grüsch), Papa, Parolini, Pedrini, Stiffler (Tavau Plaz), Tscholl, Vetsch (Claustra Vitg), Loi, Müller (Haldenstein)
Resposta da la regenza
Per il fatg che adina damain medias e medis lavuran sco provedituras e provediturs da basa datti plirs motivs. Uschia absolveschan en Svizra main persunas in studi da medischina dapi l'introducziun dal numerus clausus l'onn 1998. Er restan medias e medis adina pli savens en ils ospitals sur il temp da perfecziunament prescrit. Il titel da media spezialista u da medi spezialist per la medischina generala vegn acquistà adina pli pauc. Las medias ed ils medis prefereschan d'acquistar auters titels da media spezialista u da medi spezialist. La finala surpiglian oravant tut dunnas savens mo in pensum parzial.
Resposta a las dumondas
1. L'impurtanza da las medias e dals medis da chasa per il svilup dals custs dependa per gronda part da la rolla che la politica federala prevesa per las medias e per ils medis da chasa. Tut tenor co ch'il project planisà davart la managed care vegn concepì, pon las medias ed ils medis da chasa giugar ina rolla impurtanta per il svilup dals custs.
2. Actualmain è garantì il provediment cun medias e cun medis da chasa. En las regiuns dal chantun Grischun cun gronda populaziun è il provediment medicinal da basa sco er il servetsch medicinal d'urgenza garantì er a lunga vista. Auter sa preschenta la situaziun a lunga vista en las regiuns periferas, spezialmain en las regiuns, en las qualas mo ina media u in medi surpiglia il provediment da l'entira vallada.
Per lur renunzia da surpigliar ina pratica da media u da medi da vallada inditgeschan persunas interessadas spezialmain il grond temp da preschientscha en la pratica, l'obligaziun da far servetsch da pichet, il gudogn "modest", la mancanza da las pussaivladads per far carriera e per sa perfecziunar, las lungas distanzas tar ils centers sco Turitg u Son Gagl, la mancanza d'ina purschida culturala, la mancanza da la prontezza da la partenaria resp. dal partenari da vita da viver en las muntognas ed il grond pretsch per surpigliar ina pratica existenta.
3. En spezial en la collavuraziun rinforzada tranter las medias ed ils medis che lavuran en il provediment da basa ed ils ospitals regiunals vesa la regenza ina pussaivladad d'augmentar la segirezza dal provediment. En bleras regiuns d'ospital periferas è quai gia oz il cas. En las regiuns d'ospital da la Val Müstair, dal Puschlav, da la Bregaglia e dal Surses vegn oz garantì il provediment da basa sco er il provediment en cas d'urgenza per gronda part da las medias e dals medis che lavuran en l'ospital.
4. Il transferiment d'ulteriuras incumbensas a las medias ed als medis da chasa na gida a far frunt a la mancanza da medias e da medis da chasa e da render pli attractiv questa professiun, perquai ch'ils motivs per betg supigliar ina pratica da media u da medi menziunads sut la cifra 2 na vegnissan betg eliminads uschia.
5. L'adattaziun dal tarmed en il senn proponì è dapi in temp pli ditg in tema en ils gremis ch'èn responsabels per quai. Las medias spezialistas ed ils medis spezialists refusan dentant da reducir lur part da la petta a favur dal provediment da basa. Displaschaivlamain n'han ils chantuns nagina pussaivladad d'influenzar quest process.
6. Per lur visitas a chasa survegnan las medias ed ils medis da las assicuranzas da malsauns – ultra da la taxa da consultaziun – ina pauschala per incunvegnientschas en cas da visita. Cun las indemnisaziuns che vegnan applitgadas actualmain ha la visita a chasa finanzialmain il medem status sco la consultaziun en la pratica. Per promover las visitas a chasa fissi tenor l'avis da la regenza pli raschunaivel d'augmentar en il tarmed la pauschala per incunvegnientschas en cas da visita che d'introducir ina pauschala supplementara.
7. Ils models da managed care han en general la finamira – grazia ad in meglierament da l'organisaziun sco er grazia a structuras ed a process optimads – d'influenzar en moda positiva il svilup dals custs en ils fatgs da sanadad e da meglierar la qualitad dal provediment medicinal. Las consequenzas eventualas dal project da managed care ch'è sin il program vegnan a sa limitar sin las regiuns bain populadas dal chantun, perquai che la purschida da servetschs dal provediment da la sanadad è mo en questas regiuns uschè gronda ch'ina coordinaziun avess in effect remartgabel sin ils custs.
26 da schaner 2011