Navigation

Inhaltsbereich

Incumbensa Baselgia-Brunner concernent la tgira d'uffants cumplementara a la scola sco purschida durant l'entir onn

Sessiun: 20.10.2021

En la finamira politica surordinada «Uniun dat forza» fixescha il program da la Regenza 2021–2024 tranter auter che la cumpati­bilitad da la famiglia cun la professiun duai vegnir meglierada. Tenor la Regenza tutgan latiers pussaivladads modernas da la tgira d'uffants. Ella scriva: «Facturs impurtants per ch'il Grischun saja attractiv per famiglias n'èn betg mo las pussaivladads da gudogn ed il spazi d'abitar disponibel, mabain er la tgira d'uffants cumplementara a la famiglia ed a la scola.»

Areguard la tgira d'uffants cumplementara a la famiglia èn vegnids fatgs clers progress ils ultims onns. Ina tgira d'uffants cum­plementara a la scola durant l'entir onn vegn dentant purschida mo en paucs lieus en il chantun Grischun.

En l'artitgel 27, sut la marginala «Structuras dal di», fixescha la Lescha da scola bain dapi prest 10 onns che las instituziuns responsablas per la scola stoppian porscher structuras dal di supplementaras en cas da basegn. L'Ordinaziun davart structuras dal di restrenscha dentant questa obligaziun a las emnas da scola.

Durant ils emprims 5 onns da vita dals uffants vegn purschida ina tgira d'uffants cumplementara a la famiglia durant l'entir onn. A partir dal 5. onn da vita (entrada en scolina) manca la pussaivladad da la tgira d'uffants cumplementara a la scola dentant durant las vacanzas da scola, q.v.d. durant in quart da l'onn chalendar (13–14 emnas). Geniturs che han in'activitad da gudogn stattan perquai davant in grond problem. Per part èn els sfurzads da puspè remetter lur activitad professiunala resp. na pon els betg recumenzar cun l'activitad professiunala, cur ch'ils uffants entran en scolina.

Per s'avischinar a la finamira da la meglra cumpatibilitad da la famiglia cun la professiun e per augmentar l'attractivitad econo­mica dal chantun Grischun per las forzas spezialisadas incumbenseschan las sutsegnadras ed ils sutsegnaders la Regenza da francar en la lescha, che la tgira d'uffants cumplementara a la scola vegnia purschida durant l'entir onn, q.v.d. che las pussai­vla­dads da la tgira d'uffants vegnian purschidas er durant las vacanzas da scola.

Cuira, ils 20 d'october 2021

Baselgia-Brunner, Hardegger, Holzinger-Loretz, Atanes, Cahenzli-Philipp, Cantieni, Caviezel (Cuira), Clalüna, Degiacomi, Gartmann-Albin, Gugelmann, Hartmann-Conrad, Hofmann, Horrer, Kohler, Maissen, Märchy-Caduff, Müller (Favugn), Noi-Togni, Perl, Preisig, Rettich, Ruckstuhl, Rutishauser, Schwärzel, Stiffler, Thomann-Frank, Ulber, von Ballmoos, Widmer (Favugn), Wilhelm, Bürgi-Büchel, Pajic, Stieger, Tomaschett (Cuira)

Resposta da la regenza

La Lescha davart las scolas popularas dal chantun Grischun (Lescha da scola; DG 421.000) regla la furmaziun e l'educaziun en la scola populara e vala per las scolas publicas ed – uschenavant ch'ella na prevesa naginas excepziuns – confurm al senn er per las instituziuns da la scolaziun speziala sco er per l'instrucziun privata e per las scolas privatas, en las qualas l'obligaziun d'ir a scola po vegnir ademplida. Il temp da scola importa 39 emnas da scola per onn (art. 24 al. 1) e durant questas emnas ha l'instrucziun lieu da glindesdi fin venderdi (art. 25 al. 1). Las fins d'emna, ils firads e las vacanzas da scola sa chattan ordaifer il temp da scola tenor lescha. Tenor la Lescha da scola ston ils purtaders da scola procurar per la tgira da las scolaras e dals scolars (SeS) durant il temp da scola. En quest connex fixescha l'art. 27 al. 1 da la Lescha da scola ch'ils purtaders da scola porschian – en cas da basegn – struc­tu­ras dal di supplementaras (er numnadas structuras cumplementaras a la scola). En quest reguard menziuneschan las explicaziuns respectivas da la missiva tar la Lescha da scola explicitamain che l'obligaziun da metter a disposiziun ina purschida sa re­strenscha als dis da lavur (glindesdi fin venderdi) durant las emnas da scola, e quai il pli baud a partir da las 07.30 fin il pli tard las 18.00 (missiva da la Regenza al Cussegl grond, carnet nr. 6/2011–2012, revisiun totala da la Lescha davart las scolas popu­laras dal chantun Grischun [Lescha da scola], p. 698). La concepziun concreta da questa obligaziun da metter a disposiziun ina purschida è reglada en l'Ordinaziun davart ulteriuras structuras dal di (Ordinaziun davart structuras dal di; DG 421.030). L'art. 2 al. 1 lit. b da questa ordinaziun definescha las ulteriuras structuras dal di sco purschidas d'assistenza dals purtaders da scola a favur da SeS da la scola populara publica, che han lieu durant las emnas da scola e che surpassan l'assistenza durant las uras da bloc prescrittas da la lescha. Las vacanzas da scola na tutgan betg latiers.

Da l'autra vart vegnan applitgadas la Lescha davart la promoziun da la tgira d'uffants cumplementara a la famiglia en il chantun Grischun (LTGU; DG 548.300) sco er l'Or­dinaziun appartegnenta davart la promoziun da la tgira d'uffants cumplementara a la famiglia en il chantun Grischun (OTGU; DG 548.310) per las purschidas da la tgira d'uffants da la vegliadetgna prescolara e d'uffants da la vegliadetgna scolara, cun excepziun da las purschidas tenor la legislaziun da scola (art. 2 al. 1 LTGU ed art. 1 al. 2 lit. a e b OTGU).

La pretensiun exprimida en l'incumbensa, numnadamain da metter a disposiziun pur­schidas da tgira durant las vacanzas da scola, chaschunass previsiblamain gronds custs e blera lavur per ils purtaders da scola, perquai ch'els na disponan per regla ni dal persunal necessari ni dal know-how correspundent per tgirar – durant entirs dis u durant entiras emnas – uffants obligads d'ir a scola. Tar la gronda part dals purtaders da scola è il manaschi da scola interrut quasi dal tuttafatg durant las vacanzas da scola. Per ina tala extensiun da la purschida stuessan plinavant vegnir mess a di­spo­siziun ils meds finanzials e persunals supplementars necessaris a l'Uffizi per la scola populara ed il sport.

Tenor l'avis da la Regenza stoi vegnir tegnì quint da l'interess giustifitgà da render cumpatibla la professiun cun la famiglia. L'incumbensa pretenda da francar en la lescha che la tgira d'uffants cumplementara a la scola vegnia purschida durant l'entir onn. Er la Regenza è da l'avis che l'incumbensa na sa lascha betg ademplir mo tras ina revisiun da l'Ordinaziun davart structuras dal di, mabain ch'ella basegna ina clera basa legala. En il rom da la proxima revisiun parziala da la Lescha da scola datti la pussaivladad d'integrar en la lescha respectiva ina basa giuridica correspundenta, en spezial da stabilir per ils purtaders da scola in'obligaziun da metter a disposiziun – en cas d'in basegn correspundent – er durant las vacanzas da scola purschidas da tgira per uffants da persunas responsablas per l'educaziun che han in'activitad da gudogn. En il rom da la consultaziun tar la revisiun parziala da la Lescha da scola vegnan ils purtaders da scola pia a survegnir l'occasiun da prender posiziun en chaussa.

Sa basond sin questas explicaziuns propona la Regenza al Cussegl grond d'acceptar questa incumbensa.

12 da schaner 2022