En connex cun la construcziun nova planisada da la stalla da muvel grond al Plantahof a Landquart ed areguard la situaziun actuala tar la producziun d'electricitad s'impona directamain in implant da fotovoltaica sin la stalla nova.
Il lieu fitg adattà da la stalla nova cun ses tetg ch'è drizzà vers sid porscha premissas idealas per in implant da fotovoltaica efficazi.
Las sutsegnadras ed ils sutsegnaders supplitgeschan la regenza:
1. da planisar la construcziun da la stalla nova cun in implant da fotovoltaica integrà;
2. da calcular l'efficacitad e la rentabilitad;
3. da construir e da manar in implant da fotovoltaica, sch'il resultat è positiv.
Cuira, ils 19 d'avrigl 2011
Kasper, Joos, Michael (Donat), Albertin, Augustin, Blumenthal, Brandenburger, Burkhardt, Candinas, Casanova-Maron, Casutt, Cavegn, Clalüna, Darms-Landolt, Dermont, Dosch, Engler, Foffa, Furrer-Cabalzar, Gartmann-Albin, Gasser, Giacomelli, Grass, Gunzinger, Heiz, Hitz-Rusch, Holzinger-Loretz, Jaag, Jenny (Arosa), Kappeler, Koch (Tumein), Kollegger (Cuira), Kollegger (Malix), Komminoth-Elmer, Kunz (Fläsch), Locher Benguerel, Lorez-Meuli, Michel (Tavau Monstein), Müller (Tavau Plaz), Nick, Niggli (Samedan), Niggli-Mathis (Grüsch), Noi-Togni, Parpan, Peyer, Pfäffli, Steck-Rauch, Stiffler (Cuira), Thöny, Tomaschett (Breil), Tomaschett-Berther (Trun), Trepp, Vetsch (Pragg-Jenaz), Waidacher, Wieland, Zanetti, Zweifel-Disch, Fausch, Haltiner, Jenny-Marugg (Claustra Vitg), Monigatti, Müller (Susch), Müller (Haldenstein), Pedrini (Soazza), Vincenz
Resposta da la regenza
En la sessiun d'october 2010 ha il cussegl grond tractà la missiva "CFCA Plantahof, construcziun d'ina stalla nova da muvel grond" (missivas carnet nr. 4/2010-2011, p. 329) ed approvà il project da construcziun cun 104:0 vuschs sco er deliberà in credit d'impegn da 7 milliuns francs per quai.
En la debatta d'entrar en la materia, ma er gia en la cumissiun predeliberanta è vegnida discutada la dumonda d'in implant da fotovoltaica sin il tetg da la stalla nova da muvel grond. Gia da quel temp èsi vegnì declerà ch'il project vegnia planisà correspundentamain e che tut la surfatscha dal tetg vegnia a star a disposiziun ad investiders privats per installar in implant d'energia solara. La regenza resp. il chantun n'ha anc adina betg l'intenziun da far sezza resp. sez questa investiziun, perquai che la producziun d'energia n'è betg ina incumbensa statala che duai vegnir finanziada e realisada sur il preventiv da construcziun.
Singuls investiders han gia demussà lur interess da construir in implant da fotovoltaica sin il tetg da la stalla da muvel grond dal Plantahof ed igl èn vegnids fatgs en quest connex differents discurs da gener tecnic. L'implant è gia annunzià tar la swissgrid per survegnir l'indemnisaziun per cuvrir ils custs da la furniziun d'electricitad (ICF).
En quai che concerna la finala la realisabladad dal grad d'efficacitad e da la rentabilitad stoi vegnir renvià al fatg che quai resta chaussa da l'investider e dal gestiunari.
Uschia sa mussa l'incumbensa concernent la realisaziun d'in implant da fotovoltaica che vegn pretendida al lieu en discussiun gia sco ademplida. Uschenavant ch'il chantun vegn percunter envidà da construir e da manar sez l'implant da fotovoltaica correspundent, refusa la regenza l'incumbensa.
8 da fanadur 2011