Adina pli savens datti er en il Grischun la situaziun ch'ils polizists che fan investigaziuns daventan tuttenina ils inculpads en ina procedura currenta. Quai ha bleras raschuns. En tscherts cas èn ellas giustifitgadas, bleras giadas però insumma betg, en spezial, sche talas inculpaziuns derivan d'in cumportament querulatoric u d'ina tactica tschernida sapientivamain per sa defender cun attatgar (inculpar) appartegnents da la polizia. Imaginablas èn per exempel situaziuns difficilas en connex cun mesiras repressivas che las persunas pertutgadas na pon u na vulan quasi mai acceptar. En talas situaziuns vegnan collegas tuttenina obligads d'investigar cunter auters polizists. Quai è ina gronda sfida per ils appartegnents da la polizia involvids, en spezial però er per ils posts superiurs. Ultra da quai èn quels obligads da sclerir mintgatant inculpaziuns dal tuttafatg absurdas e da laschar investigar cunter lur agens collavuraturs. Da l'autra vart avessan ils superiurs er d'ademplir – en lur rolla sco patruns – tschertas obligaziuns d'assistenza, sco auters patruns er. Differents chantuns enconuschan pervia da quai ina procedura d'autorisaziun speziala per introducir proceduras penalas cunter polizistas e cunter polizists, sch'i sa tracta da pretensiuns che tschertas reglas da servetsch sajan vegnidas surpassadas. Cumpetentas per quai èn per regla instanzas giudizialas.
Sin fundament da quai incumbenseschan las sutsegnadras ed ils sutsegnaders la regenza da suttametter als cussegl grond uschè svelt sco pussaivel in rapport ed ina proposta per ina revisiun parziala correspundenta da la lescha che prevesa er per noss chantun ina procedura d'autorisaziun per introducir proceduras penalas cunter polizistas e cunter polizists ch'èn inculpads pervia da lur activitad professiunala sco polizista e sco polizist. Per motivs pratics pudess la cumpetenza d'autorisaziun vegnir surdada al derschader d'arrest.
Cuira, ils 17 da zercladur 2011
Augustin, Steck-Rauch, Hardegger, Barandun, Berther (Camischolas), Buchli-Mannhart (Stussavgia Plaz), Caduff, Campell, Candinas, Conrad, Davaz, Dosch, Engler, Fallet, Florin-Caluori, Geisseler, Hartmann (Cuira), Jeker, Kleis-Kümin, Komminoth-Elmer, Kunz (Fläsch), Mani-Heldstab, Märchy-Caduff, Montalta, Niederer, Niggli-Mathis (Grüsch), Rathgeb, Sax, Stiffler (Tavau Plaz), Tenchio, Tomaschett (Breil), Tscholl, Vetsch (Claustra Vitg), Degonda, Kindschi, Lauber
Resposta da la regenza
Tenor l'art. 7 al. 2 lit. b dal cudesch da procedura penala svizzer (CPP; CS 312.0) pon ils chantuns prevair che la persecuziun penala da las commembras e dals commembers da lur autoritads executivas e giudizialas tar crims e delicts, ch'èn vegnids commess en uffizi, dependa da l'autorisaziun d'ina autoritad betg giudiziala. La finamira da questa procedura d'autorisaziun è quella da garantir ina protecziun suffizienta cunter ina persecuziun penala betg giustifitgada u inopportuna. Questa procedura è in'excepziun a favur d'in tschert circul da persunas (commembras e commembers d'autoritads executivas u giudizialas) ed ha l'intent da garantir in stadi che funcziunescha. Sch'i duai insumma vegnir averta ina procedura cunter emploiadas ed emploiads dal stadi decida in'autoritad speziala. En il rom da questa procedura d'examinaziun preliminara dovri en quel cas adina il consentiment da l'autoritad d'autorisaziun, sch'il malfatg ha in connex cun in'activitad uffiziala (cf. Schmid, commentari da la pratica dal CPP, art. 7, s. 5 e 9 ss.). En Svizra han ils chantuns Son Gagl e Turitg ina tala procedura d'autorisaziun. Auters chantuns han puspè abolì questa procedura, uschia p.ex. il chantun Sursilvania. En ils auters cas examinescha la procura publica, sch'ella sto – sin basa da l'art. 7 al. 1 CPP – introducir u betg introducir ina inquisiziun penala, en cas ch'igl èn avant maun malfatgs u indizis da malfatgs. Cun quai po esser colliada ina tscherta problematica da cunfinaziun.
Tenor la giurisdicziun dal tribunal federal èsi acceptabel ch'il stadi tracta differentamain burgaisas e burgais ed emploiadas ed emploiads. La procedura d'autorisaziun haja en emprima lingia la funcziun da proteger las emploiadas ed ils emploiads cunter inquisiziuns penalas betg motivadas, en spezial cunter talas fatgas aposta per garantir uschia che l'administraziun funcziuneschia senza disturbis e senza impediments (DTF 112 Ib 352).
En ina nova decisiun ha il tribunal federal decidì, suenter che la dretgira superiura dal chantun Turitg aveva snegà sia cumpetenza (encunter la disposiziun legala respectiva en § 148 LOG-ZH), ch'i stoppia er esser permess als chantuns tenor il princip "in maiore minus" d'installar autoritads giudizialas ch'èn furnidas cun l'independenza correspundenta empè d'autoritads d'autorisaziun betg giudizialas (1B_77/2011 dals 15 da fanadur 2011).
L'autorisaziun na dastga però betg porscher ina protecziun correspundenta e suffizienta mo a polizistas ed a polizists. Anzi, la procedura sto vegnir concepida uschia che tut las emploiadas e tut ils emploiads dal chantun, en spezial quellas e quels che ston applitgar mesiras repressivas en il rom da lur activitad uffiziala, possian vegnir protegids. La regenza è pronta d'examinar l'introducziun d'ina procedura d'autorisaziun en noss chantun e da proponer al parlament da stgaffir la basa legala respectiva. En quest senn propona ella d'acceptar l'incumbensa.
7 da settember 2011