Tenor l'art. 10 da la lescha introductiva tar la lescha federala davart il traffic sin via vegn incassada ina taglia da traffic annuala sin vehichels a motor immatriculads. Latiers tutgan er vehichels a chadaina sco maschinas da pista e schlieusas a motor, malgrà che quellas na dovran naginas vias. L'art. 16 da l'ordinaziun tar la lescha introductiva tar la lescha federala davart il traffic sin via permetta – sin dumonda – ina reducziun da la taglia da traffic per vehichels ch'èn en acziun mo en zonas limitadas d'ina vischnanca.
Tenor l'ordinaziun per incassar taxas e custs da las possessuras e dals possessurs da vehichels a motor e da velos en il chantun Grischun vegnan plinavant messas a quint per vehichels a chadaina ina taxa annuala da 120.– francs ed ina taxa d'emissiun annuala da 50.– francs. Questas taxas vegnan incassadas mintga onn per la permissiun speziala dals vehichels a chadaina pervia da lur intents d'applicaziun spezials. Las vischnancas pertutgadas decidan davart il traject d'utilisaziun giavischà e pussibiliteschan l'ulteriur proceder per surdar la permissiun per vehichels a chadaina. L'uffizi per il traffic sin via conceda mintga onn las permissiuns necessarias ed emetta il quint per quai.
En quest connex faschain nus las suandantas dumondas a la regenza:
1. È la regenza er da l'avis che las premissas per ina reducziun da la taglia da traffic per vehichels da pista ch'èn en acziun en ina zona limitada (territori da skis, territori da passlung) sajan dadas?
2. Han gestiunarias e gestiunaris (interpresas da teleferica, scolas per sport da naiv, manaschis da gastronomia en territoris da skis, persunas privatas) gia fatg dumondas per reducir la taglia da traffic?
3. Pertge vegnan las permissiuns spezialas per vehichels da pista concedidas mintga onn da nov e chaschunan uschia lavur administrativa betg necessaria sco er custs annuals per las gestiunarias ed ils gestiunaris?
4. Na fissi betg inditgà – en vista al fatg ch'il dumber da vehichels da pista na sa mida strusch en il chantun Grischun e che las vischnancas controllan las dumondas da permissiun – da renunziar a la procedura da permissiun annuala e da conceder las permissiuns senza limitaziun temporara ubain per ina durada pli lunga (p.ex. per 5 onns)?
Cuira, ils 18 d'october 2011
Tomaschett (Breil), Engler, Jeker, Albertin, Augustin, Barandun, Berther (Mustér), Bezzola (Zernez), Bondolfi, Brandenburger, Buchli-Mannhart (Stussavgia Plaz), Caduff, Caluori, Campell, Candinas, Casanova-Maron, Casutt, Casutt-Derungs, Cavegn, Clalüna, Clavadetscher, Conrad, Darms-Landolt, Dermont, Dosch, Fallet, Fasani, Foffa, Fontana, Gasser, Giacomelli, Grass, Hartmann (Champfèr), Heinz, Hitz-Rusch, Holzinger-Loretz, Jenny, Joos, Kasper, Kleis-Kümin, Kollegger (Cuira), Kunz (Fläsch), Mani-Heldstab, Märchy-Caduff, Michael (Donat), Michel (Tavau Monstein), Montalta, Niggli (Samedan), Papa, Parolini, Peyer, Pfäffli, Righetti, Sax, Steck-Rauch, Stiffler (Tavau Plaz), Tenchio, Tomaschett-Berther (Trun), Troncana-Sauer, Valär, Waidacher, Wieland, Zweifel-Disch, Buchli (Favugn), Calonder, Cortesi, Derungs, Fausch, Haltiner, Patt
Resposta da la regenza
En l'art. 78 da l'ordinaziun davart las reglas dal traffic sin via (ORT; CS 741.11) fixescha il dretg federal, cura ch'ins dovra ina permissiun speziala per charrar sin vias publicas. Quai pertutga quels vehichels che na correspundan – pervia da lur chargia – betg a las prescripziuns davart las mesiras e davart il pais, sco er ils vehichels spezials. Tge vehichels ch'èn vehichels spezials, fixescha medemamain il dretg federal. I sa tracta da vehichels che na pon – pervia da lur intent d'utilisaziun spezial u per auters motivs stringents – betg correspunder a las prescripziuns davart las mesiras, davart il pais u davart las cundiziuns per charrar en rudè (art. 25 al. 1 da l'ordinaziun davart las pretensiuns tecnicas a vehichels stradals, OPTV; CS 741.41). Er vehichels a chadaina valan sco vehichels spezials (art. 26 OPTV). Tenor la scienza e la giurisdicziun vertenta valan pistas da skis er sco areals da traffic publics.
1. Il dretg chantunal cuntegna en la lescha introductiva tar la lescha federala davart il traffic sin via (LItLTV; DG 870.100) en cumbinaziun cun l'ordinaziun respectiva (ORtLItLTV; DG 870.110) la basa per la reducziun da la taglia da traffic. Tenor quella vegn la taglia da traffic reducida fin a 50 pertschient per vehichels en il servetsch public, ch'èn endrizzads spezialmain per quest intent e che vegnan duvrads per quest intent (art. 13 al. 1 lit. b LItLTV). Vehichels da pista ch'èn en acziun en ina zona limitada d'ina vischnanca pudessan giuridicamain pia profitar d'ina reducziun da la taglia da traffic mo, sch'i sa tracta d'ina acziun en servetsch public, per exempel per ademplir incumbensas communalas (30 pertschient tenor l'art. 16 al. 1 lit. b ORtLItLTV).
2. Tenor l'examinaziun da l'uffizi per il traffic sin via n'èn talas dumondas betg vegnidas inoltradas fin ussa.
3. La durada da las permissiuns spezialas d'in onn permettan a las vischnancas ed a l'uffizi per il traffic sin via da reagir a temp sin midadas da las relaziuns effectivas u da las prescripziuns tecnicas. D'eventualmain stuair retrair la permissiun chaschunass bler dapli lavur e custs che da la renovar mintga onn.
4. Appreziond las explicaziuns en la dumonda sa declera la regenza pronta d'adattar la procedura da permissiun annuala per vehichels da pista. Tenor las valurs d'experientscha da l'uffizi per il traffic sin via dovra in possessur d'in vehichel da pista en media quel durant sis onns. Resguardond ils arguments en la cifra 3 vegn la regenza a prolungar la durada da la valaivladad d'ina permissiun speziala per vehichels da pista sin trais onns.
1. da december 2011