Per il 1-1-2011 è entrada en vigur la revisiun parziala da la lescha per promover la tgira da malsauns e l'assistenza da persunas attempadas e da persunas che basegnan tgira (lescha per promover la tgira da malsauns). En quella vegn er reglada la repartiziun dals custs betg cuvrids pro categoria da prestaziun tar ils servetschs da la spitex. Quai vul dir ch'il chantun surpiglia 55% e las vischnancas 45% da quests custs betg cuvrids.
Sin la glista dals indicaturs 2010, che vegn edida da l'uffizi da sanadad dal Grischun, pon ins leger las contribuziuns dal chantun e da las vischnancas als servetschs da la spitex dal Grischun. Là vesan ins che tar quasi tut las organisaziuns da spitex che vegnan menziunadas sin la glista resulta ina disproporziun en connex cun la repartiziun dals custs betg cuvrids, resp. che las vischnancas ston per part pajar a la spitex massivamain dapli ch'il chantun.
Las vischnancas na pon praticamain betg influenzar il svilup dals custs tar las organisaziuns da spitex. Quai dependa per part dal fatg ch'il chantun fa cundiziuns a las organisaziuns da spitex (introducziun da QMS, salarisaziun da las studentas e dals students a la SSS), ma na sa participescha betg als custs da talas; uschia ston las instituziuns responsablas, resp. las vischnancas surpigliar ils custs.
Difficultads a las organisaziuns da spitex fa er il fatg ch'il chantun sa referescha als rendaquints d'avant dus onns per fixar la tariffa da contribuziun e ch'el zoppegia pia adina suenter il svilup dals custs.
Nus supplitgain la regenza da respunder las suandantas dumondas:
1. È la regenza pronta da resguardar facturs exogens (chareschia, cundiziuns che chaschunan custs supplementars) e pia d'adattar la tariffa da contribuziun?
2. Èsi pussaivel da fixar la tariffa da contribuziun sin fundament dals rendaquints actuals da las organisaziuns da spitex?
3. Tgenins èn ils criteris per calcular las tariffas da contribuziun ed en spezial tgenins èn ils criteris per resguardar facturs exogens?
4. Èsi da far quint cun ulteriurs custs che vegnan fixads dal chantun sin via d'ina ordinaziun?
Cuira, ils 19 d'october 2011
Kleis-Kümin, Grass, Casanova-Maron, Barandun, Baselgia-Brunner, Bondolfi, Brandenburger, Caduff, Caluori, Candinas, Casty, Casutt, Casutt-Derungs, Cavegn, Clalüna, Clavadetscher, Darms-Landolt, Dermont, Dosch, Engler, Fasani, Foffa, Gasser, Geisseler, Gunzinger, Hartmann (Champfèr), Hitz-Rusch, Holzinger-Loretz, Jenny, Joos, Koch (Tumein), Kollegger (Cuira), Kollegger (Malix), Kunz (Fläsch), Kunz (Cuira), Mani-Heldstab, Märchy-Caduff, Meyer-Grass, Michael (Donat), Michel (Tavau Monstein), Niederer, Niggli-Mathis (Grüsch), Noi-Togni, Papa, Parolini, Pedrini, Peyer, Pfenninger, Sax, Steck-Rauch, Tomaschett (Breil), Tomaschett-Berther (Trun), Troncana-Sauer, Waidacher, Wieland, Zweifel-Disch, Calonder, Cortesi, Grünenfelder Hunger, Haltiner, Patt
Resposta da la regenza
Ils 13 da zercladur 2007 ha il cussegl grond approvà ina revisiun parziala da la lescha per promover la tgira da persunas malsaunas e pia decidì d'extender la nova orientaziun strategica sin ils servetschs da la spitex e sin las chasas da tgira. Questa nova orientaziun strategica prevesa da pajar las contribuziuns en il sectur da la sanadad dal Grischun tenor las prestaziuns. La contribuziun dal chantun als servetschs subvenziunabels da la tgira ed assistenza a chasa è vegnida fixada a 55 % dals custs betg cuvrids pro categoria da prestaziun, premess ch'ils servetschs vegnian furnids en moda economica. Ultra da quai èsi vegnì statuì che las contribuziuns da las vischnancas a las prestaziuns subvenziunablas sco er a las prestaziuns ch'èn vegnidas giavischadas dad ellas supplementarmain stoppian vegnir fixadas cun ils servetschs da la tgira ed assistenza a chasa en las cunvegnas individualas da prestaziun.
En il rom da la revisiun parziala da la lescha per promover la tgira da persunas malsaunas per realisar la reordinaziun da la finanziaziun da la tgira tras la confederaziun sin plaun chantunal, concludida dal cussegl grond ils 27 d'avust 2010, è la tariffa da contribuziun chantunala che sa drizza tenor las prestaziuns vegnida mantegnida a 55 % dals custs betg cuvrids. La tariffa da contribuziun communala che sa drizza tenor las prestaziuns è vegnida fixada en moda lianta en la lescha da nov a 45 % dals custs betg cuvrids.
Ils indicaturs dals servetschs da la tgira ed assistenza a chasa da l'onn 2010 mussan che las vischnancas han pajà per 9 da 21 servetschs contribuziuns pli bassas ch'il chantun, per 4 servetschs circa las medemas e per 8 servetschs pli autas.
La regenza respunda las dumondas concretas sco suonda:
1. Gea. Sa basond sin l'art. 31c al. 3 da la lescha per promover la tgira da persunas malsaunas vegnan las midadas dals custs envers l'onn da basa che resultan da la chareschia e da facturs exogens resguardadas tar la fixaziun dals custs renconuschids per l'onn suandant. Dapi l'introducziun dal nov sistem da finanziaziun èn vegnids resguardads per l'onn 2008 3 %, per l'onn 2009 4 %, per l'onn 2010 3 % e per l'onn 2011 2,5 %. En cumbinaziun cun la nova calculaziun annuala da las contribuziuns tenor prestaziuns, che vegn fatga sin basa da las datas dals custs e da las prestaziuns mintgamai las pli actualas, èn ils custs renconuschids s'augmentads resp. sa reducids da l'onn 2008 a l'onn 2011 sco suonda: en la categoria da prestaziun 1 (prestaziuns da tgira) da 77.50 francs a 92.50 francs (+19,4 %), en la categoria da prestaziun 2 (prestaziuns da tegnairchasa e d'assistenza) da 65.20 francs a 67.– francs (+2,8 %) ed en la categoria da prestaziun 3 (servetsch da pasts) da 18.30 francs a 18.10 francs (-1,1 %).
La tariffa da contribuziun (chantun: 55 % / vischnancas: 45 %) na vegn betg influenzada respectivamain adattada, sch'ins resguarda facturs exogens.
2. Na. Sin basa da las datas dals custs e da las prestaziuns las pli actualas (custs cumplains tenor las calculaziuns dals custs) vegnan dentant fixadas las contribuziuns che sa drizzan tenor las prestaziuns.
3. La repartiziun da las contribuziuns dal maun public tranter il chantun e las vischnancas è fixada en l'art. 31c al. 2 da la lescha per promover la tgira da persunas malsaunas. Qua tras na datti nagin spazi liber per calcular las tariffas da contribuziun. Ils criteris per fixar l'autezza da las contribuziuns che sa drizzan tenor las prestaziuns èn determinads en l'art. 31c al. 3 da la lescha per promover la tgira da persunas malsaunas ed en ils art. 22 e 22a da l'ordinaziun tar la lescha per promover la tgira da persunas malsaunas. Tenor quels vegnan consideradas las datas dals custs e da las prestaziuns da quels servetschs cun ina incarica da prestaziun communala, che han ina permissiun da manaschi senza cundiziuns e che han furnì l'onn da basa almain 75 % da las uras imputadas cumprovadas dals servetschs cun ina permissiun da manaschi senza cundiziuns (servetschs economics). L'onn da basa correspunda a l'onn che preceda l'onn, il qual è vegnì prendì il conclus. A maun da la media aritmetica valitada da la media dals custs dals servetschs economics che han ina incarica da prestaziun communala fixescha il departament silsuenter ils custs renconuschids e la participaziun maximala als custs tras las clientas e tras ils clients. Ils criteris per resguardar facturs exogens èn per exempel: la chareschia, midadas da la lescha da lavur u l'introducziun d'instruments da l'economia da manaschi prescritta dal chantun (p.ex. calculaziun dals custs, sistems per il manaschament da la qualitad).
4. Na. En l'ordinaziun tar la lescha per promover la tgira da persunas malsaunas èn determinads ils instruments da l'economia da manaschi necessaris che garanteschan che la tgira ed assistenza saja adequata areguard la qualitad e ch'ils meds finanzials vegnian impundids a medem temp en moda economica.
11 da schaner 2012