Ils 11 da settember 2007 han la regenza chantunala, la regiun Surselva e la vischnanca da Tujetsch concludì ensemen da desister ad interim da realisar la Porta Alpina. Ils motivs per sistir il project èn las ristgas ch'il project chaschuna areguard la tecnica, areguard il manaschi, ma cunzunt er areguard las finanzas che n'èn betg supportablas per il chantun, per la regiun e per la vischnanca senza ina participaziun segira da la confederaziun e senza in cler consentiment da las Viafiers federalas (VFF).
Il cussegl federal da sia vart è vegnì ils 16 da matg 2007 a la conclusiun ch'il DATEC stoppia far fin l'onn 2012 ina dumonda davart l'investiziun principala al cussegl federal. Sch'il cussegl federal approvescha il project, pudess la Porta Alpina esser pronta per il diever circa 3 onns suenter ch'il tunnel da basa dal Gottard vegn mess en funcziun.
Tenor la resposta dal cussegl federal a l'interpellaziun dal cusseglier naziunal Sep Cathomas dals 29 da settember 2010 ston ins quintar che la decisiun dal cussegl federal concernent la realisaziun dal project l'onn 2012 vegnia ad esser negativa e che la Porta Alpina vegnia messa ad acta definitivamain.
En il fratemp – sco quai ch'igl è vegnì enconuschent publicamain dacurt – persequiteschan interpresas privatas gia auters projects interessants en vista a l'avertura dal tunnel da basa dal Gottard l'onn 2016. Tenor quels duai la galaria existenta vegnir duvrada vinavant sco attracziun turistica cun metter en funcziun l'ascensur che maina al plazzal da la NEAT. En ina profunditad dad 800 meters duain vegnir installads ina stanza d'exposiziun ed ulteriurs indrizs architectonics.
En quest connex tschentain nus las suandantas dumondas a la regenza:
1. Tira la regenza en consideraziun dad anc prender mesiras quest onn areguard la decisiun definitiva dal cussegl federal davart la Porta Alpina?
2. Sustegna la regenza ils novs plans da duvrar la galaria per auters intents respectivamain per attracziuns turisticas? Quant enavant po la regenza sustegnair talas ideas?
3. Pudess il chantun sa participar er finanzialmain a tals projects (p.ex. cun ina part dal credit chantunal da 20 milliuns francs ch'il pievel grischun ha approvà e ch'era atgnamain previs per realisar la Porta Alpina)?
Cuira, ils 15 da favrer 2012
Epp, Casty, Berther (Camischolas), Albertin, Blumenthal, Brandenburger, Buchli-Mannhart, Burkhardt, Casanova-Maron, Casutt, Cavegn, Darms-Landolt, Della Vedova, Dermont, Dosch, Fontana, Furrer-Cabalzar, Geisseler, Giacomelli, Joos, Kollegger (Malix), Meyer-Grass, Parpan, Sax, Stiffler (Tavau Plaz), Tenchio, Thöny, Tomaschett (Breil), Tomaschett-Berther (Trun), Zanetti, Bundi, Degonda, Patt
Resposta da la regenza
Ils 16 da matg 2007 ha il cussegl federal decidì da sistir il project Porta Alpina e da spustar la decisiun davart la finanziaziun da las investiziuns principalas fin l'onn 2012. En cas ch'il project vegn acceptà po la Porta Alpina uschia vegnir averta il pli baud 3 onns suenter ch'il tunnel da basa dal Gottard è terminà. La procedura d'approvaziun dal plan ch'è pendenta tar l'uffizi federal da traffic (UFT) è medemamain vegnida sistida quella giada.
Ils 11 da settember 2007 han il chantun Grischun, la regiun Surselva e la vischnanca da Tujetsch sco instituziuns responsablas per il project prendì la decisiun da sistir las ulteriuras lavurs da projectaziun pervia da las ristgas previsiblas areguard la tecnica, areguard il manaschi ed en spezial er areguard las finanzas. Dapi lura han differentas gruppas d'interess sviluppà pliras ideas, co che las galarias a Sedrun pudessan vegnir duvradas en moda raschunaivla, er senza la fermada Porta Alpina.
Tar la dumonda 1:
Perquai che las lavurs da projectaziun èn vegnidas sistidas n'è actualmain avant maun nagin project approvabel per la Porta Alpina che pudess servir sco basa per ina nova dumonda da finanziaziun al cussegl federal. Ils ultims onns è la regenza s'engaschada repetidamain per che la projectaziun e la realisaziun dal tunnel da basa dal Gottard na chaschunia nagins fatgs architectonics e tecnics che impedeschan pli tard ina realisaziun da la Porta Alpina sco fermada dal tren. Sin fundament d'ina garanzia en scrit dal cussegl federal po questa opziun vegnir mantegnida per generaziuns futuras. En quest connex duain las investiziuns preliminaras finanziadas da la confederaziun, dal chantun e da la vischnanca da Tujetsch er star a disposiziun per eventuals projects alternativs futurs. Per quest intent vegn actualmain elavurada ina cunvegna d'utilisaziun tranter il chantun e las VFF sco gestiunarias futuras dal tunnel da basa dal Gottard per ils stabiliments construids effectivamain per il project Porta Alpina. Questa cunvegna duai vegnir suttascritta proximamain.
Tar la dumonda 2:
La regenza sustegna sche pussaivel tut las stentas che permettan da duvrar las infrastructuras existentas en moda raschunaivla. In'utilisaziun turistica u in'ulteriura utilisaziun alternativa porscha la schanza da generar ina plivalur per la regiun. In sustegn finanzial direct da tals projects tras il chantun n'è actualmain betg previs e stuess en mintga cas singul vegnir giuditgà da nov sin fundament dal project concret inoltrà.
Tar la dumonda 3:
Il dretg da finanzas excluda da finanziar auters projects cun il credit chantunal da 10 milliuns francs approvà e reservà per la realisaziun da la Porta Alpina sco fermada dal tren a Sedrun. Davart la finanziaziun d'in nov project stoi mintgamai vegnir decidì da nov.
23 d'avrigl 2012