Dapi che la firma Pfeifer ha ingiantà il settember 2011 l'areal da la resgia gronda a Domat, n'èn succedids nagins pass visibels per la publicitad en direcziun d'ina reavertura da la resgia. En las medias ha la firma Pfeifer adina puspè laschà confermar ch'igl existia in grond interess vi dal lieu da Domat e ch'i sajan da princip avant maun cundiziuns generalas adattadas per manar ina resgia gronda, en spezial per il provediment cun laina radunda. La regenza ha beneventà pliras giadas da princip il fatg che la firma Pfeifer ha surpiglià l'areal. Tuttina èsi oz – betg mo per ils proprietaris da guaud e per la branscha forestala – intschert, sch'i vegn insumma puspè ina giada resgià laina radunda a Domat.
L'impressiun da l'intschertezza vegn rinforzada dapi curt tras il fatg che l'uffizi da concurs dal Plaun e las firmas Klausner e Pfeifer sa chattan – tenor rapports en las gasettas – en ina dispita giuridica davant la dretgira chantunala. Sco ch'i para na vul la firma Klausner, che ha acquistà ils implants da la resgia da Mayr Melnhof en la procedura da concurs e che sto demontar quests implants, betg ademplir sia obligaziun.
En quest connex sa tschentan las suandantas dumondas:
1. Co giuditgescha la regenza las perspectivas d'ina reavertura da la resgia a Domat?
2. Co giuditgescha la regenza l'impressiun da la publicitad che la firma Pfeifer n'ha fatg fin oz nagins sforzs visibels per ina reavertura da la resgia a Domat, dapi ch'ella ha ingiantà l'areal il settember 2011?
3. Tge ha il chantun interprendì ed è el pront d'interprender en l'avegnir a favur da la firma Pfeifer, en spezial areguard l'acquisiziun da laina radunda ed areguard la promoziun da l'economia?
4. Tge consequenzas resultan per l'economia forestala e per il guaud grischun, sche la reavertura da la resgia a Domat sa retardescha pli ditg?
Cuira, ils 18 d'avrigl 2012
Jaag, Barandun, Joos, Baselgia-Brunner, Blumenthal, Brandenburger, Caluori, Casanova-Maron, Casutt, Casutt-Derungs, Cavegn, Conrad, Fallet, Frigg-Walt, Gartmann-Albin, Jenny, Kasper, Koch (Tumein), Komminoth-Elmer, Lorez-Meuli, Märchy-Caduff, Meyer-Grass, Michael (Castasegna), Michel (Tavau Monstein), Montalta, Müller, Nigg, Niggli-Mathis (Grüsch), Noi-Togni, Papa, Parolini, Parpan, Pedrini, Peyer, Pfenninger, Pult, Sax, Stiffler (Tavau Plaz), Thöny, Trepp, Valär, Vetsch (Claustra Vitg), Wieland, Audétat, Buchli (Favugn), Degonda, Deplazes, Fravi, Michel (Igis), Monigatti
Resposta da la regenza
Dapi che la resgia gronda a Domat è vegnida ingiantada il settember 2011 tras la firma Pfeifer, n'èn effectivamain visibels en la publicitad nagins pass concrets areguard la reavertura da questa ovra. La firma Pfeifer ha punctuà pliras giadas ch'ella considereschia la reavertura sco gronda sfida. Quai pretendia scleriments minuzius, avant ch'ins possia infurmar la publicitad davart las intenziuns concretas. Plinavant ha la firma Pfeifer rendì attent che las cundiziuns generalas economicas per investiziuns en ina resgia sajan actualmain colliadas cun grondas malsegirezzas sin il martgà da laina internaziunal. Evidentamain n'ha plinavant l'allontanament previs dals implants existents betg anc pudì vegnir realisà.
Tar la dumonda 1: Las perspectivas d'ina reavertura pon vegnir giuditgadas mo da l'interpresa sezza. Ella decida, cun tge concept ch'ella vul puspè avrir l'ovra – e quai è da sia vart decisiv per la furniziun da la laina radunda necessaria. Tenor las experientschas è il pretsch da la materia prima per la resgia dependent dals svilups sin il martgà da laina internaziunal. Decisiv vegn dentant er ad esser il fatg ch'ils proprietaris da guaud stettian danovamain en per la resgia. Sco che la firma Pfeifer ha explitgà envers las medias, na bastan ils circa 200'000 m³ laina radunda dals guauds grischuns betg per garantir la furniziun da laina a la resgia. Anzi, ils gestiunaris da la resgia ston procurar supplementarmain anc almain per 100'000 m³ laina radunda, da preferenza da la Svizra orientala.
Tar la dumonda 2: L'impressiun che la firma Pfeifer n'haja fatg nagins pass concrets per ina reavertura da la resgia, è faussa. A chaschun da differents contacts cun la firma Pfeifer han represchentants dal chantun e da l'economia forestala pudì constatar ch'i vegn lavurà intensivamain davos las culissas. Sco ch'igl è vegnì dà enconuschent, han gia gì lieu discurs tranter la cumissiun grischuna per il martgà da laina e represchentants dals proprietaris da guaud da la Svizra orientala davart ils temas "potenzial da laina radunda" e "furniziun da laina radunda". Igl è er vegnì enconuschent che la firma Pfeifer examineschia actualmain intensivamain ses martgads da vendita.
Tar la dumonda 3: Areguard l'acquisiziun e la mobilisaziun da laina radunda ha il chantun gia interprendì inqual chaussa per meglierar e per optimar talas a favur d'ina resgia gronda. Las experientschas sin basa dal project "Martgà da laina radunda en il Grischun" en cumbinaziun cun las utilisaziuns effectivas da laina han mussà che la direcziun tschernida per meglierar las cundiziuns generalas è correcta. Uschia duai il chantun sustegnair er vinavant la cumissiun grischuna per il martgà da laina, ch'è sa cumprovada gia durant la fasa "Egger". Ulteriuras mesiras concretas sin plaun chantunal pon vegnir tratgas en consideraziun pir, cur ch'il concept da la firma Pfeifer è enconuschent.
Tar la dumonda 4: La situaziun dastgass avair per consequenza ch'ils pretschs da la laina stagneschan sin il livel bass actual. La resgia a Domat aveva in effect da sustegn per ils pretschs, che gieva directamain a favur dals proprietaris da guaud. Ils proprietaris da guaud (circa 85% da la surfatscha da guaud appartegna a las vischnancas grischunas) ston eruir ed explotar gia oz novs chanals da vendita. Els èn gia cuntents, sche lur laina vegn cumprada a pretschs supportabels. Sut talas circumstanzas ston ins temair che las utilisaziuns sa reduceschian cleramain. Nua che la laina sto vegnir tagliada per tgirar il guaud da protecziun, sto il maun public pajar contribuziuns finanzialas supplementaras, per ch'ils custs restants dals proprietaris da guaud na surpassian betg las limitas supportablas. Ulteriurs retardaments pudessan la finala chaschunar che la tenuta dals proprietaris da guaud envers la firma Pfeifer vegn mendra. Quai dastgass da sia vart avair consequenzas per la prontezza da furnir laina e per la conclusiun da contracts da lunga durada.
29 da zercladur 2012