Las valurs minimalas decisivas en il Grischun èn vegnidas adattadas l'ultima giada l'onn 2004 en il rom d'ina revisiun totala da la legislaziun da submissiun. Cun questa chaschun èn ellas vegnidas auzadas cleramain. En la procedura directa èn las valurs minimalas vegnidas redubladas envers la regulaziun veglia tar tut ils tips d'incarica (industria principala e secundara da construcziun, servetschs e furniziuns). En la procedura d'invit èn ellas medemamain vegnidas auzadas fin a 50 pertschient. Perquai pon p.ex. biros da cussegliaziun vegnir incumbensads oz directamain dal maun public fin ad ina valur d'acquisiziun da 100'000 francs, ed en cas d'ina valur tranter 100'000 e 250'000 francs en il rom d'ina procedura d'invit (tut las valurs d'incarica adina senza la taglia sin la plivalur).

Cumbain ch'il chantun Grischun – che ha sco in dals paucs chantuns ina statistica da surdada significativa – ha auzà massivamain las valurs minimalas a chaschun da l'ultima revisiun da la legislaziun, n'ha el sapientivamain betg tratg a niz cumplainamain las valurs maximalas admissiblas tenor la CIAP per singuls tips da procedura resp. per singuls tips d'incarica. Quai sin basa dal fatg ch'ina regiun perifera sco il Grischun na po – areguard las structuras e l'economia – betg vegnir cumparegliada cun in'aglomeraziun gronda sco p.ex. Turitg. Ultra da quai cumprovan las statisticas da surdada fitg detagliadas dals ultims 12 onns ch'ins ha pudì resguardar purschiders dal Grischun tar la gronda part da las acquisiziuns fatgas en il sectur betg cumpiglià da contracts internaziunals. Sco che la pratica da surdada conferma, gioga la "protecziun da distanza" – pervia da la situaziun geografica dal chantun – ina rolla che n'è betg da sutvalitar a favur dal mastergn indigen, independentamain d'ina avertura dal martgà.

Er dapi l'augment da las valurs minimalas l'onn 2004 importa la quota da purschiders resguardads cun sedia en il chantun Grischun anc adina ca. 80 pertschient da tut las surdadas registradas, quai ch'è in buna valur. En il sectur da construcziun, che ha il volumen lunschor il pli grond, importa questa valur schizunt passa 90 pertschient en la media da blers onns. Interessant è en quest connex il fatg che la quota d'interpresas grischunas che han survegnì incaricas è per part stada gist en quest sectur pli auta ils ultims onns tar incaricas publitgadas en moda averta ch'en la procedura d'invit, nua che l'incumbensader po tscherner sez il circul dals offerents.

In ulteriur augment da las valurs minimalas na meglierass perquai betg la situaziun dal martgà, mabain signifitgass in pass enavos en direcziun d'ina isolaziun dals martgads regiunals e communals. Plinavant cuntegna in ulteriur augment da las valurs minimalas actualas il privel d'ina preferenza nungiavischada da tscherts offerents (uschenumnads "furniturs da la curt") en la procedura directa ed en la procedura d'invit, quai ch'impediss ils interess d'ina concurrenza efficazia senza discriminaziuns.

Tenor l'avis da la regenza resguardan las valurs minimalas actualas en moda adequata e cunvegnenta las relaziuns grischunas. Ellas gidan fundamentalmain a promover ina concurrenza gista e transparenta ed ad evitar acziuns abusivas en l'interess da l'economia indigena e dal maun public. Plinavant procuran ellas ch'ils meds finanzials publics vegnian impundids en moda effizienta. En consideraziun da las bunas experientschas cun las valurs minimalas actualas sco er en vista a la tendenza ch'ins constatescha tar las acquisiziuns publicas na vesa la regenza nagins motivs d'auzar – facticamain en la cuntradirecziun – las valurs minimalas en la legislaziun chantunala da submissiun. Per finir stoi ultra da quai er vegnir renvià al fatg che las proceduras d'acquisiziun pon vegnir liquidadas en moda pli e pli favuraivla ed effizienta grazia a l'utilisaziun da meds auxiliars electronics. La renfatscha d'ina birocrazia inutila è deplazzada e zuppenta il fatg ch'il maun public po – er en il rom da proceduras da concurrenza – per regla acquistar en moda pli effizienta ed economica. La regenza propona da refusar l'incumbensa.

25 d'october 2012