Las clinicas psichiatricas chantunalas sco er las chasas chantunalas da dimora e da lavur per persunas cun impediments psichics èn organisadas en l'institut autonom da dretg public "servetschs psichiatrics dal Grischun" (SPGR) e garanteschan – en il sectur staziunar ed ambulant – il provediment psichiatric da persunas creschidas en il chantun.
Er en moda autonoma en furma d'ina fundaziun da dretg privat ademplescha la psichiatria d'uffants e da giuvenils (PUG) la medema incumbensa da provediment per ils uffants e per ils giuvenils. Tuttas duas organisaziuns disponan d'ina incarica da prestaziun dal chantun che regla lur incumbensas per proveder l'entir chantun cun prestaziuns e che las indemnisescha cun meds finanzials publics.
Ina collavuraziun ha lieu actualmain en emprima lingia tar l'admissiun d'urgenza d'uffants e da giuvenils. Sinergias sa mussan dentant er areguard ils lieus decentrals ch'èn necessaris per proveder l'entir chantun, cunquai che tuttas duas organisaziuns mainan actualmain lur chasas en agens lieus. Ultra da quai dastgass er il sectur da l'administraziun (direcziun, persunal, administraziun, tariffas, contabilitad e.u.v.) quintar cun potenzial da sinergias.
Il svilup en ils differents chantuns (AG, LU, SO, TG e SH) mussa che la reuniun da la psichiatria da persunas creschidas e da la psichiatria da giuvenils sut la medema instituziun responsabla è absolutamain raschunaivla e pussaivla.
La regenza vegn incumbensada da sclerir il potenzial da sinergias d'ina fusiun dals SPGR e da la PUG, resguardond il bainstar da las pazientas e dals pazients, e d'iniziar las mesiras ch'èn necessarias per realisar las sinergias che pon vegnir cuntanschidas.
Cuira, ils 24 d'october 2012
Casanova-Maron, Hardegger, Cavegn, Barandun, Bezzola (Zernez), Bleiker, Caluori, Casutt-Derungs, Clalüna, Dosch, Engler, Furrer-Cabalzar, Geisseler, Giacomelli, Grass, Gunzinger, Hartmann (Champfèr), Hartmann (Cuira), Holzinger-Loretz, Jenny, Kasper, Kollegger (Cuira), Kollegger (Malix), Krättli-Lori, Kunz (Cuira), Lorez-Meuli, Niederer, Niggli (Samedan), Pfäffli, Steck-Rauch, Stiffler (Cuira), Tscholl, Waidacher, Wieland, Candrian, Lauber, Müller (Susch), Patt (Tartar), Patt (Jenaz), Rischatsch-Casaulta, Schucan, Sgier
Resposta da la regenza
Ils ultims onns èn ins repetidamain sa dumandà, sch'ina collavuraziun pli stretga u ina fusiun dals dus servetschs fiss cunvegnenta.
L'onn 2008 ha ina gruppa da lavur cun represchentantas e represchentants dals SPGR, da l'anteriur servetsch psichiatric per uffants e giuvenils dal Grischun (SPUG) e da l'administraziun chantunala elavurà per mauns da la regenza in rapport davart l'optimaziun da la collavuraziun tranter ils SPGR ed il SPUG.
En il rapport èn duas variantas da cooperaziun (collavuraziun en ils secturs da l'administraziun e dal sustegn e sco alternativa supplementarmain en ils secturs centrals) vegnidas cumparegliadas cun il status quo. Las represchentantas ed ils represchentants da las duas instituziuns han tratg differentas conclusiuns. Entant che las persunas responsablas dals SPGR han bain constatà tar tuttas duas variantas da cooperaziun effects da sinergia envers il status quo, èn las represchentantas ed ils represchentants dal SPUG stads da l'avis che quels sajan marginals. Cunquai ch'il consens ha mancà gia qua, han ins desistì da far in'examinaziun pli detagliada da las duas variantas da cooperaziun.
Cun il conclus dals 3 da favrer 2009 (prot. nr. 82) ha la regenza prendì enconuschientscha dal rapport. La regenza è dentant sa resalvada il dretg da puspè tschentar la dumonda da la collavuraziun e d'examinar eventualas mesiras.
L'onn 2011 han la PUG, ils SPGR e l'ospital chantunal dal Grischun gì il suandant dumber d'extradas e da dis da tgira d'uffants e da giuvenils cun ina diagnosa principala psichiatrica, assortì tenor gruppas da vegliadetgna:
Resguardond il svilup dals ultims onns ed en vista a las perspectivas finanzialas dal chantun è la regenza da l'avis ch'i saja cunvegnent d'examinar detagliadamain ils avantatgs ed ils dischavantatgs d'ina fusiun dals SPGR e da la PUG. Quai integrond er las experientschas ch'èn vegnidas fatgas en ils chantuns, nua che la psichiatria d'uffants, la psichiatria da giuvenils e la psichiatria da persunas creschidas èn sut in tetg.
La regenza propona al cussegl grond d'acceptar l'incumbensa. Pervia da las experientschas fatgas en connex cun las lavurs da la gruppa da lavur menziunada qua survart vul la regenza incumbensar in post independent cun l'examinaziun. Sch'ils avantatgs d'ina fusiun dals SPGR e da la PUG avessan da predominar ils dischavantatgs, vegn la regenza a suttametter al cussegl grond sbozs per las regulaziuns legalas necessarias.
16 da schaner 2013