En il rom da las disposiziuns da la lescha per promover il svilup economic en il chantun Grischun po il chantun promover cun differentas mesiras la domiciliaziun ed il mantegniment d'interpresas e – collià cun quai – da plazzas da lavur en il chantun Grischun.
Ina mesira pussaivla per domiciliar u per mantegnair ina interpresa en il Grischun èn las mesiras fiscalas, saja quai en furma da levgiaments fiscals u da relaschs da taglia. Igl è la natira da la chaussa che quellas mesiras n'èn betg transparentas per las burgaisas e per ils burgais. Er il cussegl grond n'ha strusch la pussaivladad da survegnir las infurmaziuns, quant grondas che las perditas da taglia èn, en tals cas.
Las sutsegnadras ed ils sutsegnaders dumondan perquai la regenza:
1. A quantas interpresas, classifitgadas tenor secturs/branschas e regiuns, èn vegnids concedids ils ultims 5 onns
a. levgiaments fiscals
b. liberaziuns da taglia?
2. Quant grondas èn stadas las perditas da taglia, classifitgadas tenor chantun e vischnancas, ch'èn resultadas da
a. levgiaments fiscals
b. liberaziuns da taglia?
3. Tge import è stà il pli grond, il pli pitschen, tgenin l'import median e tge è stada la media dals imports ch'èn vegnids relaschads da
a. levgiaments fiscals
b. liberaziuns da taglia?
4. Quantas interpresas e quantas plazzas da lavur han en il Grischun pudì vegnir
a. domiciliadas da nov u
b. mantegnidas?
5. Tge stentas e tge mesiras èn planisadas en quest rom per ils proxims 5 onns?
Cuira, ils 10 da zercladur 2013
Peyer, Müller (Tavau Plaz), Pfenninger, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Noi-Togni, Pult, Thöny, Trepp, Deplazes, Hensel, Monigatti
Resposta da la regenza
La dumonda Peyer sa referescha a la lescha per promover il svilup economic en il chantun Grischun e pretenda infurmaziuns davart las mesiras fiscalas en quest sectur.
L'emprim stoi vegnir constatà che unicamain il levgiament fiscal stat a disposiziun sco mesira dal dretg fiscal per promover l'economia. Tenor l'art. 5 da la lescha da taglia (LT; DG 720.000) po la regenza conceder per la domiciliaziun d'interpresas novas ubain per midaments essenzials da l'activitad dal manaschi levgiaments fiscals per maximalmain 10 onns, sche quai è en l'interess da l'economia publica grischuna. L'interess da l'economia publica grischuna vegn determinà en quest connex dal dumber da plazzas da lavur e da l'autezza da las investiziuns. La regenza ha ina libertad da decider considerabla, ch'ella sto applitgar confurm a l'obligaziun ed en moda giuridicamain eguala. Tar l'egualitad giuridica tutga en spezial er il tractament egual dals participants da l'economia, quai vul dir ch'i na po betg vegnir concedi in levgiament fiscal, nua che interpresas, ch'èn obligadas da pajar cumplainamain lur taglias, pudessan vegnir concurrenzadas
La liberaziun da taglia ed il relasch da taglia na servan betg a la promoziun da l'economia. Ina liberaziun da taglia po vegnir concedida tenor l'art. 78 LT ad ina persuna giuridica che persequiteschan intents publics u exclusivamain d'utilitad publica e che n'appartegna uschia betg al sectur da la promoziun da l'economia. In relasch da taglia po vegnir concedì tenor l'art. 156 LT, sche la persuna ch'è obligada da pajar taglia è vegnida en miseria u sch'il pajament da las taglias signifitgass per ella ina gronda direzza. Er quai n'è nagin instrument da la promoziun da l'economia. Las respostas qua sutvart sa restrenschan perquai al levgiament fiscal.
La concessiun d'in levgiament fiscal è in act administrativ, ch'è suttamess al secret fiscal tenor l'art. 122 LT. Il secret fiscal sto vegnir respectà er en il rom da questa dumonda. La dumonda na po perquai betg vegnir respundida cun il grad da precisaziun giavischà, perquai ch'i pudessan senz'auter vegnir tratgas conclusiuns concretas davart singulas interpresas or d'ina resposta che sa referescha ad in sectur, ad ina branscha ed ad ina regiun.
1. Ils onns 2007 fin 2011 han profità mintga onn tranter 15 e 19 interpresas d'in levgiament fiscal. L'onn chalendar 2012 ha la regenza concedì 2 levgiaments fiscals.
2. Dals levgiaments fiscals èn resultadas ils onns 2007 fin 2011 tut en tut entradas pli pitschnas da 17,8 milliuns francs per la taglia chantunala, 17,5 milliuns francs per la taglia supplementara ed 1,8 milliuns francs per la taglia da cultus.
3. Ils levgiaments fiscals chaschunan en media per onn entradas pli pitschnas da 7,4 milliuns francs per tut las taglias chantunalas. Il levgiament fiscal per onn il pli grond importava 5,8 milliuns francs, il pli pitschen 49 francs ed il median importava 40 481 francs.
4. Grazia al levgiament fiscal han pudì vegnir domiciliadas en il Grischun 15 interpresas cun circa 180 plazzas da lavur. Ultra da quai han pudì vegnir creadas circa 420 plazzas da lavur novas en 10 interpresas e circa 450 plazzas da lavur han pudì vegnir mantegnidas.
5. Questa dumonda prenda en mira las mesiras dal dretg fiscal. En il sectur fiscal na vegn però fatga nagina promoziun activa da l'economia. Perquai n'èn er qua planisadas naginas ulteriuras stentas u mesiras.
4 da settember 2013