Sin la pagina d'internet da l'uffizi da guaud e privels da la natira statti scrit: Nus lavurain en differents lieus da lavur. Il chantun Grischun è dividì en tschintg regiuns forestalas. Ultra da la centrala a Cuira sa chatta en mintga regiun forestala in center regiunal sco post da consultaziun. La regenza vul translocar il center regiunal da Schiers a Landquart. Questa midada n'è betg vegnida communitgada publicamain.
Las deputadas ed ils deputads sutsegnads incumbenseschan la regenza da renunziar a la translocaziun dal center regiunal I e motiveschan lur incumbensa sco suonda:
1. Tras la translocaziun na vegniss il center regiunal betg mo spustà dal tuttafatg or dal perimeter territorial previs, mabain er mess – areguard il territori d'acziun – dal tuttafatg en la periferia.
2. Il potenzial il pli grond da privels da la natira, ma er la part principala da las lavurs forestalas exequidas e da l'utilisaziun da laina sa chattan evidentamain en il sectur dal Partenz central/Partenz sura.
3. En cas da situaziuns criticas e – sco quai ch'ins ha vesì dacurt – en cas da privels da la natira che smanatschan directamain, duain las persunas spezialisadas forestalas sche pussaivel esser en la vischinanza e betg lunsch davent dals eveniments, sin la plazza da la staziun a Landquart.
4. La distanza tranter las vischnancas cun blers guauds e lur guauds decentrals chaschuna ina ferma creschientscha da la mobilitad. Sch'ina translocaziun faschess senn, alura segiramain ina en direcziun dal Partenz central.
5. Cun ils trais centers regiunals a Tumein, a Cuira ed a Landquart sa chattassan en la Val dal Rain grischuna gist trais centers sin in spazi stretg. Ina tala concentraziun pudess forsa facilitar l'administraziun, stgaffiss dentant novas distanzas tar ils guauds, tar las vischnancas e cunzunt tar las proprietarias ed ils proprietaris da guaud en il Partenz ed a Tavau.
6. La finamira da la collavuraziun intercommunala en la selvicultura vegn facilitada considerablamain tras in stretg contact tranter las persunas spezialisadas dals centers regiunals e da las vischnancas. Ina translocaziun engrevgiass nunnecessariamain quests interess actuals.
7. La strategia d'immobiglias, ch'è vegnida deliberada da ses temp dal cussegl grond, aveva la finamira da plazzar en immobiglias chantunalas las unitads administrativas decentralas ch'eran sparpagliadas per il chantun enturn. Las localitads a Landquart ed a Tavau vegnan dentant prendidas en locaziun, n'èn pia insumma betg agens edifizis.
8. A nus na pari betg opportun da discurrer da spazis cun pauc potenzial, ma da dischlocar a medem temp il center regiunal inclusiv las plazzas da lavur e la creaziun da valur en la regiun da boom a Landquart, e quai senza infurmar las vischnancas pertutgadas en chaussa.
Cuira, ils 12 da zercladur 2013
Jaag, Vetsch (Claustra Vitg), Kasper, Baselgia-Brunner, Caluori, Engler, Hardegger, Holzinger-Loretz, Mani-Heldstab, Meyer-Grass, Michel, Müller (Tavau Plaz), Niggli-Mathis (Grüsch), Pult, Trepp, Valär, Vetsch (Pragg-Jenaz), Zweifel-Disch, Däscher, Nicolay
Resposta da la regenza
En la sessiun da december 2009 ha il cussegl grond prendì cun consentiment enconuschientscha da la strategia d'immobiglias ed il december 2011 ha el confermà questa decisiun en il rom da la tractativa da la missiva tar la construcziun d'in center administrativ a Cuira (project "sinergia"). En las explicaziuns per la votaziun dal pievel che ha lura gì lieu il mars 2012 ha il cussegl grond preschentà al pievel grischun en moda transparenta ils avantatgs da la strategia chantunala d'immobiglias a maun dal princip "Sche pussaivel centers regiunals effizients empè d'ina organisaziun administrativa sparpagliada e disfavuraivla". Tenor questa strategia generala duain vegnir realisads en tut il Grischun tut en tut nov centers regiunals en lieus che furman gia ussa centers administrativs. Ils emprims centers administrativs regiunals a Glion, a Roveredo ed a Tusaun èn gia en funcziun ed èn sa cumprovads en la pratica. Actualmain vegnan planisads ulteriurs centers a Scuol, a Landquart ed a Cuira. Enconuschentamain ha il pievel grischun approvà – bain mo per pauc – il project "sinergia" sco project parzial il pli impurtant da la strategia chantunala d'immobiglias.
Confurm a quests conclus politics realisescha il departament da construcziun, traffic e selvicultura ussa la strategia d'immobiglias deliberada e reunescha – tant sco pussaivel – las unitads administrativas en ils novs centers regiunals. Perquai duai er l'uffizi da guaud e privels da la natira, regiun 1, vegnir reunì cun ils auters uffizis en il nov center administrativ a Landquart. Ultra dals centers administrativs regiunals a Tavau ed a Landquart èn plinavant er il lavuratori communal a Luzein e la basa da l'uffizi da construcziun bassa resp. da l'uffizi federal da vias a Küblis vegnids examinads sco lieus alternativs. Questas opziuns han fatg naufragi, perquai ch'ellas n'ademplivan betg las pretensiuns fixadas e perquai ch'ellas na permettevan betg da trair a niz las sinergias. Ils avantatgs d'ina utilisaziun effizienta dal spazi tras in'utilisaziun cuminaivla da l'infrastructura da las plazzas da lavur, sco l'access a la tecnologia d'infurmaziun, las raits da communicaziun, las stanzas da sesidas u la cafetaria, ma er la flexibilitad necessaria areguard las stanzas tras la planisaziun da reservas n'èn betg avant maun en cas da soluziuns individualas. En cas d'unitads d'organisaziun pitschnas dovri consequentamain bler dapli meds finanzials per il spazi, per l'access e per l'energia ed uschia er per la construcziun e per il manaschi.
I constat ch'il nov lieu na sa chatta betg en il center geografic da la regiun 1. Il territori d'acziun n'è dentant betg pli lunsch davent dal center regiunal che tar las autras regiuns. Betg previsibel n'è il potenzial da privels da la natira. Quest potenzial è da princip avant maun en tut la regiun resp. en tut il chantun, uschia ch'ina tscherna dal lieu tenor quest criteri n'ha betg ina gronda relevanza. Ord questa optica sto er vegnir relativà l'engaschament da persunas spezialisadas en situaziuns criticas. En acziun sa rendan las collavuraturas ed ils collavuraturs betg mo dal biro anora, mabain fitg savens er da chasa anora. Tras acziuns cumbinadas restan ils custs da persunal supplementars sin in nivel fitg bass e pon vegnir cumpensads, perquai che la reuniun en in center administrativ regiunal ha bler dapli avantatgs che mo la situaziun centrala dal lieu. En il nov center administrativ regiunal a Landquart, nua ch'i vegnan domiciliads er la polizia chantunala, l'uffizi dal servetsch social, il servetsch psicologic da scola sco er l'inspecturat da scola e da scolina da l'uffizi per la scola populara ed il sport cun totalmain passa 40 plazzas da lavur, èn – tras ina infrastructura moderna – ademplidas las premissas fundamentalas per lavurar en moda effizienta. L'edifizi a Landquart, ch'è planisà tenor il standard da Minergie®, è situà fitg bain directamain sper la staziun ed è pia cuntanschibel fitg bain.
In'assistenza professiunala irreproschabla da la regiun Signuradi / Partenz / Tavau tras l'uffizi da guaud e privels da la natira, regiun 1, vegn pia ad esser garantida grondamain dal nov lieu anora. La regenza propona al cussegl grond da refusar l'incumbensa.
30 d'avust 2013