Cuntegn da la pagina

Dumonda Kappeler concernent la petiziun «Plazza da la posta a Cuira senza autos»

sessiun: 29.08.2013
Ils 27 d'avust 2013 èsi vegnì cumenzà a rimnar suttascripziuns per la petiziun «Plazza da la posta a Cuira senza autos» che duai vegnir surdada a la suprastanza da la citad da Cuira cur ch'igl è uschè lunsch. Motivà vegn il project tranter auter cun in augment da la valur dal center da la citad da Cuira, cun influenzas positivas sin il svilup economic sco er cun in augment da la segirezza dal traffic.

En quest connex vegn la regenza supplitgada da respunder las suandantas dumondas:

- È er la regenza da l'avis ch'il volumen da traffic saja relativamain grond en il sectur Plazza da la posta – Grabenstrasse a Cuira?

- È er la regenza da l'avis che la realisaziun da la petiziun pudess augmentar la valur dal center da la chapitala chantunala?

- È la regenza pronta d'examinar ensemen cun la citad da Cuira la petiziun resp. differentas propostas da soluziun (da la varianta minimala fin a la varianta maximala)?

Cuira, ils 29 d'avust 2013

Kappeler, Bondolfi, Bucher-Brini, Casty, Frigg-Walt, Hartmann (Cuira), Kollegger (Cuira), Locher Benguerel, Pult, Stiffler, Trepp, Tscholl, Deplazes, Hensel

Resposta da la regenza

La plazza da la posta a Cuira è in center da traffic impurtant ed è da vegl ennà in punct d'identificaziun da la citad da Cuira. Tenor ina retschertga da l'onn 2005 han var 14 000 vehichels a motor e var 2500 velos traversà mintga di la plazza da la posta. L'onn 2010 è vegnida fatga ina retschertga durant las uras da traffic intensiv. La chargia da traffic è stada en tuttas duas direcziuns tranter 240 e 510 vehichels per ura durant il traffic intensiv da la damaun, tranter 480 e 570 vehichels per ura da mezdi e tranter 450 e 630 vehichels per ura la saira.

Entant che la Grabenstrasse è la via la pli frequenta per il traffic individual motorisà, è quai l'axa Bahnhofstrasse – Poststrasse per il traffic da peduns e da velo. Tenor la retschertga da l'onn 2005 han var 18 000 persunas traversà mintga di la Grabenstrasse sur in dals trais passadis da peduns en il sectur da la plazza da la posta. La strivla melna sur la plazza da la posta, che vegn reglada cun amplas da traffic, è qua la colliaziun la pli impurtanta per il traffic da peduns tranter il center da la citad e la citad veglia. Ils dus auters passadis tar la chasa d'art e tar la posta vegnan duvrads bler main.

La regenza respunda las dumondas sco suonda:

1. Er la regenza è da l'avis ch'il volumen da traffic è, en il sectur plazza da la posta – Grabenstrasse, bain pli pitschen ch'en la Kasernenstrasse ed en la Masanserstrasse, dentant relativamain grond per il Grischun.

2. Sch'i vegn stgaffida ina zona senza autos en ina citad, augmenta quai da princip la valur dal center da la citad. Ins sto dentant resguardar che la serrada d'ina via existenta fitg frequentada chaschuna in spustament dal traffic. En ina citad sco Cuira, che ha mo paucas alternativas sper la via da transit Masanserstrasse – Grabenstrasse, stuess il traffic sa spustar sin differents quartiers d'abitar resp. sin differentas vias lateralas e principalmain sin la Ringstrasse. En emprima lingia dastgass l'access resp. il sviament dal center da la citad lura succeder sur la punt Tivoli resp. sur il sutpassadi Turnerwiese. Las vias lateralas e cunzunt la Ringstrasse n'èn dentant betg en cas da dumagnar quest traffic supplementar. Durant las uras da traffic intensiv è lur capacitad exaurida gia oz, e per part èn questas vias adattadas mo pli limitadamain per il traffic da transit pervia da mesiras ch'èn gia vegnidas prendidas per quietar il traffic. La dumonda è quella, sch'i vegn giavischà da spustar il traffic sin quests sviaments e sch'in tal spustament na purtass betg schizunt dischavantatgs per la part da la citad al nord da la staziun. Tenor la legislaziun davart la protecziun da l'ambient resp. tenor l'ordinaziun davart la protecziun cunter canera pudess ina midada sapientiva da la situaziun da traffic existenta plinavant avair per consequenza che questa mesira vegniss tractada sco ina midada d'in stabiliment e ch'i stuessan – areguard la canera – vegnir observadas en l'avegnir en la Ringstrasse las valurs da planisaziun pli bassas. En la pratica n'è quai betg realisabel e cunzunt betg finanziabel. En mintga cas stuessan las consequenzas d'ina tala mesira vegnir examinadas fitg detagliadamain, resguardond differents aspects (grevezza per l'ambient, viadis deturs, spustaments dal traffic, stagnaziuns dal traffic, consequenzas per la citad veglia, consequenzas per projects da traffic currents sco la restructuraziun dal Rosenhügel per cuntanscher meglier il center da la citad e.u.v.).

3. La Grabenstrasse è ina via principala chantunala ed ina via da transit svizra. I n'è betg admess da liberar ina tala via dal traffic, vul dir d'interrumper ina tala via, senza procurar per ina cumpensaziun cumparegliabla. Per quest motiv stuess la Ringstrasse vegnir duvrada en l'avegnir sco via da transit empè da la Grabenstrasse. Tenor l'art. 6 da l'ordinaziun federala davart las vias da transit stuess quai vegnir approvà da l'uffizi federal da vias (UVIAS). La citad da Cuira stuess perquai garantir ch'il traffic da transit giess sur la Ringstrasse e laschar elavurar in rapport concernent las consequenzas tenor la cifra 2. Sche l'accessibladad suffizienta da la citad da Cuira tenor la lescha chantunala davart las vias fiss garantida senza midadas, fissi imaginabel per il chantun da ceder a la citad da Cuira la Grabenstrasse en il sectur da la plazza da la posta.

30 d'october 2013