L'autostrada A13 è suenter la A2 la transversala nord-sid la segund impurtanta da la Svizra. Ina colliaziun averta durant tut l'onn exista per quest traject dapi l'avertura dal tunnel dal San Bernardin l'onn 1967.
L'onn 1983, pia avant bel e bain 30 onns, è vegnì avert il tunnel Isla Bella tranter Panaduz e Giuvaulta che ha ina lunghezza da 2449 meters.
Dapi il 1. da schaner 2008 ha la confederaziun surpiglià dals chantuns la responsabladad per las autostradas (uffizi federal da vias; UVIAS). Tuttina han las abitantas ed ils abitants dal chantun Grischun in interess considerabel che la A13 saja segira per il traffic er en il tunnel Isla Bella.
Abstrahà dal fatg ch'il tunnel na posseda ni sortidas d'urgenza, ni autpledaders, exista dapli 30 onns – tut tenor la situaziun da l'aura resp. da las temperaturas – il problem ch'è relevant per la segirezza, che las fanestras davant dals vehichels daventan svelt turblas, cur ch'ins entra en il tunnel.
1. Quants vehichels èn passads tras il tunnel Isla Bella durant ils ultims 5 onns en media?
2. Po il tunnel insumma anc vegnir laschà avert per il traffic, sch'ins considerescha che motociclists, che han egliers, pon vegnir surprendids dal problem, sche – en cas da la situaziun da l'aura resp. da las temperaturas menziunada – er lur egliers daventan turschs suenter ch'els han avert lur visiers turbels?
3. Cura pon ins far quint cun ina meglieraziun effectiva concernent la turblaziun da las fanestras davant dals vehichels?
Cuira, ils 4 da december 2013
Tenchio, Albertin, Augustin, Barandun, Baselgia-Brunner, Berther (Mustér), Blumenthal, Bondolfi, Bucher-Brini, Caduff, Caluori, Casty, Casutt Renatus, Casutt-Derungs Silvia, Cavegn, Clalüna, Claus, Della Vedova, Dermont, Dosch, Engler, Fallet, Fasani, Florin-Caluori, Foffa, Frigg-Walt, Gartmann-Albin, Gunzinger, Heiz, Hitz-Rusch, Jeker, Jenny (Arosa), Joos, Kleis-Kümin, Kollegger (Malix), Locher Benguerel, Lorez-Meuli, Märchy-Caduff, Michael (Castasegna), Michel (Tavau Monstein), Nick, Niederer, Niggli (Samedan), Noi-Togni, Papa, Parolini, Pedrini, Peyer, Pfenninger, Pult, Righetti, Rosa, Sax, Stiffler (Tavau Plaz), Thöny, Tomaschett (Breil), Tomaschett-Berther (Trun), Trepp, Degonda, Hauser, Michel (Igis), Monigatti
Resposta da la regenza
La ruta dal San Bernardin na serva betg mo al traffic da transit, mabain er a l'avertura regiunala. En spezial il traject Maiavilla – Tusaun cun sias grondas frequenzas da traffic è – or da questa optica – fitg impurtant per il Grischun. Il 1. da schaner 2008 èn las vias naziunalas daventadas proprietad da la confederaziun. Dapi lura sa chatta la responsabladad cumplainamain tar quella resp. tar l'uffizi federal da vias. Quel è responsabel per la renovaziun, per la sanaziun sco er per il manaschi ed uschia er per la segirezza.
Il problem cun las fanestras davant dals vehichels che daventan turblas n'è betg mo in tema tar il tunnel Isla Bella. En tut la Svizra datti divers tunnels che han il medem problem. Retschertgas da la confederaziun han mussà ch'il privel che las fanestras davant daventan turblas è bler pli grond en tunnels cun cuntertraffic e che han ina lunghezza che surpassa 1 400 meters. Il tunnel Isla Bella ha cuntertraffic ed ina lunghezza da passa 2 kilometers.
Tar las singulas dumondas:
1. Ils ultims 5 onns han en media duvrà var 16'500 vehichels mintga di la via naziunala en la Tumleastga.
2. Perquai ch'il tunnel sa chatta oz en la proprietad da l'uffizi federal da vias, na po la regenza betg respunder la dumonda, sche quel possia insumma anc vegnir laschà avert per il traffic, definitivamain or dal puntg da vista tecnic. I sto però vegnir punctuà che las mesiras tecnicas ch'èn stadas pussaivlas da quel temp èn vegnidas prendidas gia avant l'onn 2008, cur ch'il chantun era anc responsabel per il tunnel. Ter il tunnel Isla bella è vegnida installada ina signalisaziun d'avertiment cun ina glisch alternanta e cun ina infurmaziun concreta davart las fanestras davant che daventan turblas. Quella vegn activada, tut tenor las valurs mesiradas. Sviar tut il traffic preventivamain tras ils vitgs en cas da situaziuns criticas da l'umiditad e da las temperaturas n'è betg in'alternativa, perquai che las ristgas da segirezza fissan là pli grondas e la populaziun vegniss engrevgiada. Tenor l'evaluaziun dals accidents da la polizia chantunala èn capitads ils ultims 10 onns tut en tut 28 accidents en il tunnel Isla Bella. Sin basa da las analisas han 8 da quels pudì vegnir attribuids al tip d'accident "fanestras davant turblas". En 3 cas èn stads involvids motociclists.
3. A la regenza n'èsi betg enconuschent, cura che – e sche insumma – mesiras tecnicas pudessan vegnir prendidas per meglierar la situaziun. Ella vegn danovamain a render attent l'uffizi federal da vias cumpetent a quest problem spezial dal tunnel Isla Bella, particularmain en vista a sanaziuns futuras.
6 da favrer 2014