Dumonda da la fracziun libra concernent la perdita da valur d'interpresas d'energia per il chantun e per las vischnancas
Sessiun: 24.04.2014
Per l'emprima giada dapi blers onns ha il chantun stuì cumprovar cifras cotschnas. Quest resultat è vegnì motivà cun las amortisaziuns necessarias da las aczias da la Repower ch'il chantun posseda. In motiv per s'inquietar n'existia betg.
Questa interpretaziun correspunda ad in embelliment da la situaziun. En vardad han il chantun e las vischnancas stuì registrar che lur participaziuns han perdì milliardas ils ultims onns. Ultra da quai smanatscha la forza idraulica da perder anc dapli terren. Concernent ils tschains d'aua e concernent las tractativas futuras davart il return al proprietari po quai chaschunar ina irrupziun massiva per bleras vischnancas e per il chantun.
Pervia da questa situaziun da partenza èsi urgentamain necessari che la regenza ed il cussegl grond repassian e curregian lur strategia da la politica d'energia vertenta. En quest connex vegn la regenza envidada da respunder las suandantas dumondas:
1. Quant gronda è la perdita da valur dals ultims 4 onns da las aczias da la Repower ch'il chantun posseda gia dapi l'onn 2009?
2. Quant gronda è la perdita da valur da las ulteriuras aczias ch'il chantun ha cumprà nunchapiblamain supplementarmain avant in onn?
3. Quant gronda è la perdita da valur da las aczias d'autras societads d'ovras electricas ch'il chantun posseda gia dapi l'onn 2009?
4. Quant gronda è la perdita da valur da las aczias da societads d'ovras electricas che las vischnancas en noss chantun possedan?
5. È il chantun er da l'avis che la situaziun saja sa midada drasticamain en vista a la perdita dramatica da valur, sch'i sa tracta tant da fixar ils tschains d'aua futurs sco er da las eventualas tractativas davart il return al proprietari?
6. Tge quinta il chantun da far? È el pront d'examinar en general e d'adattar sia strategia d'energia vertenta? È el pront d'installar ina task force, a la quala sa participeschan differents exponents da nossa politica d'energia, e da dar a tala l'incumbensa d'elavurar propostas per ina strategia d'energia chantunala prospectiva?
Cuira, ils 24 d'avrigl 2014
Koch (Igis), Brandenburger, Davaz, Casutt Renatus, Nigg
Resposta da la regenza
1. Per ils 31 da december 2009 eran bilantschadas las aczias da la Repower cun ina participaziun dal chantun da 46 pertschient en la facultad administrativa per la valur d'acquisiziun per part amortisada da 67,3 milliuns francs. La valur da martgà da questa quota da participaziun importava da quel temp 627,4 milliuns francs. Cun passar al MAC2 e cun trasferir las aczias en la facultad finanziala è vegnida augmentada la valur da la participaziun dad ussa 58,3 pertschient per il 1. da schaner 2013 per 193,7 milliuns francs. Ma per ils 31 da december 2013 ha ella stuì vegnir suttamessa ad ina rectificaziun da la valur per 102,6 milliuns francs pervia dal regress dal curs. Per ils 31 da december 2013 è vegnida bilantschada la participaziun dal chantun a la valur da martgà da 244,9 milliuns francs. La valur cudeschada dal pachet d'aczias da la Repower cumparegliabel dal chantun (46 pertschient) è en il quint annual per 125,8 milliuns pli aut che la fin da l'onn 2009.
2. Envers il termin d'acquisiziun è la valur cudeschada da las ulteriuras aczias da la Repower ch'il chantun ha cumprà sa reducida per 34,4 milliuns francs per ils 31 da december 2013. Ma ni l'Axpo ni il chantun han l'intenziun da realisar perditas cun vender vinavant quest pachet d'aczias.
3. Las aczias da las autras societads d'ovras electricas ch'il chantun posseda na vegnan betg commerzialisadas a la bursa, uschia ch'ellas vegnan bilantschadas en il quint annual per la valur d'acquisiziun. Las valurs cudeschadas èn talas e qualas.
4. La perdita da valur da las aczias da las societads d'ovras electricas che las vischnancas possedan n'è betg enconuschenta a la regenza. Vi da l'entir parc da producziun grischun d'ovras idraulicas èn las vischnancas participadas cun circa 7 pertschient.
5. La regenza parta l'opiniun che en l'ambient actual stat er il tschains d'aua sut in grond squitsch. Ma er las investiziuns en ovras electricas èn periclitadas. Quai che pertutga las tractativas davart il return al proprietari n'han betg lieu ils gronds returns al proprietari immediat, mabain pir a partir da l'onn 2030. En quest reguard ha la regenza speranza che las perspectivas da la forza idraulica sajan intactas e che la forza idraulica gronda – che sto sa far valair sin il martgà praticamain sco suletta tecnologia da producziun senza promoziun dal stadi – vegnia puspè a sa revegnir e vegnia ad occupar ina rolla centrala en la producziun d'electricitad en Svizra.
6. Entaifer la conferenza da las regenzas dals chantuns alpins (CRCA) sa fatschenta il chantun gia dapi in temp pli lung intensivamain cun la situaziun actuala e cun las sfidas existentas. En il territori da la CRCA resultan circa dus terzs da la producziun da forza idraulica svizra, ma ils chantuns da la CRCA èn participads en media mo a circa 18 pertschient vidlonder. Plinavant è s'occupada er la conferenza dals directurs chantunals d'energia (CDEn), da la quala fan part tut ils chantuns, da la situaziun actuala. Quai cun buna raschun: Ils chantuns èn participads en total en media a circa 87 pertschient vi dal chapital da basa da las interpresas svizras per il provediment d'energia. La maioritad da las participaziuns a la forza idraulica sa chatta pia en proprietad dals chantuns da la Bassa e quels vegnan per consequenza tangads dals svilups actuals tuttina sco ils chantuns da muntogna.
La CRCA s'engascha – en accordanza cun la CDEn – sin plaun federal per realisar la strategia d'energia 2050 che ha l'intent da meglierar las cundiziuns generalas da la forza idraulica. En quest connex sa mussi che la strategia e che las mesiras dal rapport d'electricitad da la regenza (carnet nr. 6/2012-2013) èn anc adina valaivlas. Questa strategia e questas mesiras èn orientadas a lunga vista e demussan – sin fundament da las experientschas cun las midadas che han gì lieu en il passà – ina flexibilitad suffizienta per pudair reagir sin las cundiziuns generalas che sa midan. Il svilup e l'adempliment da las finamiras da la politica d'energia dal Grischun vegnan resumads e valitads annualmain en in rapport da monitoring ensemen cun ulteriuras finamiras che stattan en connex cun la lescha d'energia. A la regenza na pari betg inditgà da furmar ina task force e da repassar la strategia d'energia ch'è vegnida confermada l'onn 2012 dal cussegl grond.
19 da zercladur 2014